Kalaallit Nunaanni pineqaatissinneqarsimasunut inissiisarfiit qarasaasiatigut atortorissaarutinik pitsaanerusunik pissarsinissartik qilanaaraat
Kalaallit Nunaanni pineqaatissinneqarsimasunut inissiisarfiit teknikkikkut kinguariaqqapput, pisariaqartumilli pitsanngorsaasoqarpasilerpoq.
Qarasaasiatigut atortorissaarutit pitsaanerusut pineqaatissinneqarsimasunut inissiisarfiit iluaqutigissavaat, tamannali sukkavallaamik pissanngilaq, Nuummi pineqaatissinneqarsimasunut inissiisarfiup pisortaa oqarpoq.
Assi: Leiff Josefsen
Kalaallit Nunaanni pineqaatissinneqarsimasunut inissiisarfiit Danmarkimilu parnaarussiviit teknikkikkut assigiinngissuteqangaarput. Kalaallit Nunaanni sulinermi mappenik programminillu pisoqaavallaartunik atuineq suli ilisarnaataavoq.
Danmarkimili inatsisinik atortitsinermut ministeri Peter Hummelgaard (S) oqarpoq pineqaatissinneqarsimasunut inissiisarfinni qarasaasiatigut aaqqiissutissat nutaat atulersinnissaat sulissutigerusullugu.
Tamanna folketingimi ilaasortamut Aaja Chemnitzimut (IA) pingaaruteqarpoq. Nalunaarsuinermi pissutsit amigaataasut pissutigalugit Kalaallit Nunaanni sulianik suliaqarneq pisariaqanngitsumik nukippassuarnik atuiffiuvoq, taanna atuagassiami Fængselsfunktionæren-imi oqarpoq.
- Paasissutissanik katersineq aamma taamaappoq, maannakkummi nammineq suliarineqartarput. Taamaattumik suliaqarfimmi paasissutissat kisitsisillu amigaatigigajuttarpavut, pissarsiarinissaannut suliaq annertoorujussuusarmat. Tamanna politikkikkut sulinitsinnut akornutaallunilu ajornakusoortitsivoq, Aaja Chemnitz oqarpoq.
Nuummi pineqaatissinneqarsimasunut inissiisarfimmi pisortaq Peter Fomsgaard aamma isumaqarpoq pitsanngorsaanissaq piffissanngortoq.
- Tamanna sukkanerusumik ajornannginnerusumillu suliaqarnissamut iluaqutigissavarput. Sukkavallaamilli pinnginnissaa pingaaruteqarpoq, taamatummi sulineq misilittagaqarfiginngilarput. Malinnaasinnaasariaqarpugut. Taamaanngippat kukkuluttornerit pissapput, taanna oqarpoq.
