Kalaallit Nunaanni Politiit dronenut tunngasut malinnaaffigilluarpaat
Dronet suminngaanneernerannit ilisimaneqanngitsut piffissami kingullermi Danmarkimi mittarfinni arlalinni ajornartorsiortitsipput. Kalaallit Nunaannilu politiit Danmarkimi politiit assigalugit immikkut piareersimapput.
Assi: Oscar Scott Carl
Dronet suminngaanneernerannit ilisimaneqanngitsut pissutaallutik Danmarkimi mittarfiit arlallit, ilaatigut Københavnip mittarfia, sapaatip-akunnerani kingullermi matuneqarput.
Ministeriunerup Mette Frederiksenip pisut taakku attaveqaatinut pingaarutilinnut saassussinertut taavai, oqartussallu saassussinerit taamaattut akiorniarlugit ilungersunartorsiorput.
Kalaallit Nunaannili mittarfinni taamatut nalaataqartoqarpat qanoq pisoqassava? Sermitsiamit politiit aperaavut.
Saassussinerit assigiinngitsut iliuuseqarfigineqartarnerisut pineqassasut
Politiit immikkoortortaqarfii allat assigalugit upalungaarsimanerulersimallutik attaveqaatinillu nakkutilliinerulersimallutik, Kalaallit Nunaanni Politiit tamatumunnga atatillugu ilisimatitsipput :
- Saassussinerit assigiinngitsut dronellu pillugit politiit allat suleriusaat assigalugit iliuuseqartarpugut. Taamaattumik Kalaallit Nunaanni Politiit Danmarkimi politiit, PET-ip illersornissaqarfiullu piginnaasaat tamarmiusut atorsinnaavaat, kiisalu oqartussat suleqatigisallu allat, politiit akissuteqarlutik allapput.
Politiit Kalaallit Nunaanni avataanilu pissutsit qanimut malinnaavigalugillu dronet pillugit paasissutissat pingaarutillit paasiniaaffigineqartartut, Kalaallit Nunaanni Politiit nangillutik nassuiaapput.
Tassaasinnaapput innuttaasut nalinginnaanngitsunik maluginiagaqartut paasissutissiinerat. Politiit oqartussaasut allat Kalaallit Nunaannilu suleqatigisatik pissutsit pillugit aamma ataavartumik oqaloqatigisarpaat.
Politiit suleriaaseq eqqarsaatigalugu qanoq iliuuseqartoqartarnersoq qanorlu upalungaarsimasoqarnersoq itisiliinerorusinngillat.
Dronet iliuuseqarfigisinnaajumallugit Danmarki atortorissaarutinik pisiortortoq – misissuinerli kinguneqanngitsoq
Dronet Danmarkimi sapaatip-akunnerata siuliani ajornartorsiutaasut iliuuseqarfigisinnaalerumallugit atortorissaarutit amerlanerusut qanittukkut tikissasut, danskit illersornissamut ministeriat Troels Lund Poulsen ataasinngornermi inatsisinik atuutsitsinermut ministereqarfimmi tusagassiortunik katersortitsinermini oqarpoq.
- Illersornissamut ministereqarfiup atortussanik pisiortornermullu aqutsisoqarfia illersornissaqarfitsinnik qanimut suleqateqarnerup saniatigut atortunik allanik pisiortorpoq attartorlunilu, taakkulu ullumi imaluunniit piffissap sivikitsup iluani tikiunneqassapput. Taamaalilluni upalungaarsimanerput ataatsimut isigalugu pitsaanerulissaaq, Ritzau naapertorlugu oqarpoq.
Suut pisiarineqarsimanersut attartorneqarsimanersullu paasissutissiissutigineqanngilaq.
Politiit dronit suminngaanneernerat suli paasilluarneqarsimanngitsoq, Naalagaaffimmi politiit pisortaat Thorkild Fogde tusagassiortunik katersortitsinermi oqarpoq.
