KL

DK

Kalaallit Nunaanni Politiit upalugaarsimanermut akisussaasut atulersippaat

Nuummi innaallagiaaruttoorneq pissutigalugu Kalaallit Nunaanni Politiit upalungaarsimanermut oqartussaasut ataatsimeeqatigisarnerisigut ataqatigiissaarinermikkut upalungaarsimanermut aqutsisoqatigiit pilersippaat.

Politi
Thomas Munk Veirum
Journalist
Offentliggjort

Nutartigaq 18.45: 

Nukissiorfiit nalunaarutigaat Nuussuarmi ungasianiit kiassarnermut pilersuisoqaqqilersoq. 

Ajoraluartumilli suli Nuummi Qinngorpumilu ungasianit kiassarnermik pilersueqqilernissamut innaallagiaqanngikkallarpoq. Suli akunnialuit ingerlanerani taamaannissaa ilimanartoq, Nukissiorfiit nalunaarput.

Nuummi illoqarfiup ilarujussua nalunaaquttap akunnerini arfineq-pingasuni innaallagiaarussimalermat, Kalaallit Nunaanni Upalungaarsimanermut Pisortaqarfik maanna iliuuseqarpoq. Aammattaaq angerlarsimaffippassuit kiassartoqarunnaarsimammata amerlasuut nillertissimapput.

Upalungaarsimanermut aqutsisoqatigiit oqartussaasut assigiinngitsut suleqatigiinnerat ataqatigiissassavaat, tusagassiuutinullu nalunaarummi ilisimatitsissutigineqarpoq ataatsimeeqatigiittoqarsimasoq: 

- Ataatsimiinnermi Nukissiorfinniit ilisimatitsissutigineqarpoq innaallagissamik pilersuineq elværkimut sillimmataasunut nuukkallartoqassasoq Nuummi, Nuussuarmi Qinngorpumilu innaallagissamik pilersuinerup aallarteqqinnissaa anguniarlugu. 

- Taamaammat illoqarfiup innaallagissamik pilersorneqarnera tamaat unitsinneqarallarnissaa pinngitsoorneqarsinnaanngilaq, tamatuma kingorna naatsorsuutigineqarpoq nalunaaquttap akunnerini 3-4 angullugit innaallagissamik pilersueqqilernissap tungaanut ingerlasinnaasoq.

Tusassimiit ilisimatitsissutigineqarpoq illoqarfiup ilaani oqarasuaatinut angallattakkanut attaveqanngittoqarallartoq aammalu attavinnik kipisaqattaarfiusinnaasoq.

Nuummi, Nuussuarmi Qinngorpumilu innaallagissamik pilersueqqilernissap 3-4 tiimit ingerlanerani ilimanaateqaraluartoq sumiiffiit ilaanni akunnerni arlalinni innaallagiaqanngereerpoq, taamaammat Kommuneqarfik Sermersooq inimik kialaarfiusinnaasumik Nuummi Illorsuaq Timersortarfimmi pilersitsivoq, innuttaasut kikkulluunniit kialaartumukarnissaminnut tikilluaqqusaapput.

Nuummi napparsimavik politiillu innaallagissamik pilersuinermut sillimmatiminnik innaallagiaqarallarput

Nuummi annaassiniarnermut ulapugaarsimasut, Nuummi napparsimavik kiisalu politiit innaallagissamik pilersuinermut sillimmatiminnik innaallagiaqarallarput oqarasuaatitigullu attaveqarfigineqarsinnaallutik. Politiit pisarnermit amerlanerusunik Nuummi, Nuussuarmi Qinngorpumilu angalaartitaqarput oqarasuaatikkut atteqartoqarsinnaassanngikkaluarpat saaffigineqarsinnaasunik, aammattaaq periarfissaavoq politeeqarfimmut napparsimavimmulluunniit takkulluni saaffiginnittoqarsinnaanera.

Politiit ataavartumik Tusassip nittartagaaniit, Nukissiorfiit Facebookikkut qupperneranniit Kommuneqarfik Sermersuullu nittartagaanniit nalunaarutit politiit Facebookikkut qupperannut saqqummiussillattaassapput taamatuttaaq KNR-ikkut Sermitsiakkullu tusagassiutitigut nalunaarutit ilisimatitsissutigineqartassapput. 

Kalaallit Nunaanni upalugaarsimasut ataatsimeeqqissapput unnuup ingerlanerani killiffik qanimut oqaloqatigiissutigissallugu, taama Kalaallit Nunaanni Politiit ilisimatitsipput.

Ataatsimiinnissat

Upalungaarsimanermut aqutsisoqatigiit oqartussat assigiinngitsut suleqatigiinnerat ataqatigiissassavaat, tusagassiuutinullu nalunaarummi ilisimatitsissutigineqarpoq nal. 16.30 ataatsimiittoqareersoq, nal. 19.00 ataatsimiittoqaqqissalluni. 

Nal. 16.30 ataatsimiinnermi Nukissiorfiit ilisimatitsissutigaat nukissiorfiup ikiuutaasup aallartinnissaa suli suliarineqartoq. Nukissiorneq aallarteqqippat innuttaasut innaallagianeqqinnissaat nalunaaquttap akunnerinik pingasunik tallimanillu sivisussuseqassasoq ilisimatitsissutigaat

nukissiorfiit kommuneqarfik sermersooq inuiaqatigiit grønlands beredskabsstab samfund strømudfald nuuk

ATORFIIT Se alle jobs

Powered by Labrador CMS