Kalaallit Nunaannik tiguaanissaq pillugu apeqqarissaarnermi USA-p illersornissamut ministeria: Suna tamaat pilersaaruteqarfigaarput
Politikerit arlallit USA-p tiguaanissamik pilersaarutai piareersimanersut apeqquteqaqattaarput. Arlaleriaqaluni ministeri erseqqissaavoq tamanna itigartinneqarsinnaanngitsoq.
- Illersornissamut ministereqarfimmi suliagut tassaapput pilersaarusiorneq pisussanut tamanut, Hegseth kongresimi ataatsimiinnermi oqarpoq.
Assiliisoq: J. Scott Applewhite/Ritzau Scanpix
USA-p illersornissamut ministeria, Pete Hegseth, sisamanngornermi arlaleriarluni kongressimi ataatsimiititaliami aperineqarpoq, USA-p Kalaallit Nunaata aamma Panama-p tiguanissaanut pilersaaruteqartoqarnersoq.
Hegseth arlaleriarluni toqqaannartumik akinngilaq.
- Illersornissamut ministereqarfiup politikkiaava, Kalaallit Nunaata aamma Panamap pisariaqartillugu pissaaneq atorlugu tigusinnaanissatsinnut piareersimasariaqartugut?, demokrati Adam Smith NBC News naapertorlugu aperivoq, tassanilu oqallinnermi videoliaq saqqummiunneqarpoq..
Hegseth akissuteqarnermini siullermik Kinap sunniutaanik oqalulerpoq, demokrati akissutissamik piumasaqaraluartoq.
- Illersornissamut ministereqarfimmi suliassarput tassaavoq pilersaarutinik peqarnissaq, Hegseth akivoq.
Taava demokrati aperivoq, pilersaarutit "taamaattumik" peqartoqarnersoq.
- Illersornissamut ministereqarfiup suliassaa tassaavoq pisussanut tamanut pilersaarutinik peqarnissaq, Hegseth akivoq.
Smith aperivoq, tamanna isumaqarnersoq "pissaanermik atuilluni Danmarkip isaaffigineqarnissaa" pillugu pilersaaruteqartoqartoq.
Demokraatini ilaasortap apeqqutini naammassinngkklaa, Hegseth akeqqippoq illersornissamut ministereqarfimmi pisut tamaasa piareersimaffigineqartut, Adam Smithip ministeri erseqqissaasumik akeqqugaluaraa.
- Erseqqissaqqissaarlugu - Ilissi, pilersaaruteqarpusi Panama aamma Kalaallit Nunaat tigusinnaajumallugit pisariaqassappat, Smith oqarpoq.
Tassunga Amerikamiut illersornissamut ministeriat akivoq:
- Isumaqarpunga Amerikamiut kissaatigigaat Pentagonip (illersornissamut ministeriaqarfik, aaqq.) pisussanut tamanut pilersaaruteqassasoq, Hegseth oqarpoq.
Kingusinnerusukkut ministerip parteeqataa republikanerit sinnerlugit konkresimi ilaasortaq Mike Turner, Hegsethip oqaaseqaataanut uteqqippoq.
- Ikiornissat kissaatigivara, tassami oqaatsitit isumarinngisaanik inuit inerniliiniarsaripput. Apeqqarissaarfigitinninni naqissuserpat Kalaallit Nunaat pissaaneq atorlugu tiguassallugu pilersaaruteqanngitsusi, ilaa taamak paasisariaqarpoq? Taamatummi ullumikkut nalunaajaateqanngilatit (vidneudsagn, aaqq.) ilaa?, Mike Turner aperivoq.
Tassunga Hegseth akivoq:
- Uanga nalunaajaatigisara tassaavoq, Pentagon pisinnaasunut sunulluunniit assigiinngitsunik pilersaarutinik piareersimasuuteqartoq.
Kingumut Mike Turner aperivoq taamaattunik pilersaaruteqartoqarnersoq:
- Illit ullumikkut nalunaajaatit tassaavoq Pentagon Kalaallit Nunaannik isaaffigalugu tiguaanissamik pilersaaruteqanngitsoq, tamanna eqqorpa? Tassami neriuutigivara tiguaasinnaanissaq nalunaajaatiginngikkit.
Amerikamiut illersornissamut ministeriat akivoq:
- Qulakkeerniarlugu suulluunniit sioorasaarutit qunusaarutillu pinngitsoortinneqarnissaat, Kalaallit Nunaata suleqatiginissaa qilanaarivarput.
Amerikamiut præsidentiat, Donald Trump, arlaleriarluni Kalaallit Nunaata pigilernissaa pillugu kissaateqarluni erseqqissaasarpoq, aamma pissaaneq atortariaqalissagaluarpalluunniit.
Sisamanngornermi nalunaajaaneq Repræsentanternes husimi illersornissamut ataatsimiititaliap nalunaajaasitsinerani pivoq, tassani aamma Hegsethip illersornissamut ministeriaqarfiup Pentagonip missingersuutai pillugit saqqummiussivoq.
