Kalaallit Nunaat Parisimi isumaqatigiissummut sisamanngornermi ilanngutissaaq

Kalaallit Nunaat Parisimi isumaqatigiissummut ilannguttoq Naalakkersuisut siulittaasuata Múte B. Egedep (IA) 2021-mi nalunaarutigaa. Tamatuma kingorna isumaqatigiinnginneq piuvoq, tassa isumaqatigiissutip nunatsinnut kingunerisinnaasai sukumiisumik misissorneqassasut naalakkersuisooqataasup Siumup piumasarimmagu.

Politikkerilli kingorna isumaqatigiipput. Kalaallit Nunaallu silap pissusaanut isumaqatigiissummut ilanngunnera sisamanngornermi atsioqatigiissutigineqassaaq.

Tassungalu atatillugu Naalakkersuisut Naalagaaffiit Peqatigiit silap pissusianut tunngatillugu isumaqatigiissutaanut (UNFCCC) allatsi Simon Stiel kiisalu Danmarkip ineriartortitsinermi suleqatigiinnermut nunarsuarmilu silap pissusia pillugu politikkimut ministeri Dan Jørgensen tikilluaqquaat.

Naalakkersuisut tusagassiuutinut taama nalunaaruteqarput.

Kalaallit Nunaata Danmarkillu isumaqatigiissutaat nutaaq

Naalakkersuisup Kalistat Lundip (IA) - Naalakkersuisut sinnerlugit Inatsisartunillu suliassinneqarneq tunngavigalugu - Kalaallit Nunaat Parisimi isumaqatigiissummut ilannguttoq Simon Stielimut UNFCCC-mullu sisamanngornermi nalunaarutigissavaa

Tamatumunnga atatillugu Kalistat Lundip aamma Dan Jørgensenip nunani tamalaani silap pissusia pillugu isumaqatiginninniarnerni Naalakkersuisut aamma danskit naalakkersuisuisa akornanni suleqatigiinnissamut isumaqatigiissutaat nutartigaq atsiussavaat, Naalakkersuisut paasissutissiipput.

Kalistat Lundip nutaamik isumaqatigiissuteqarneq tulluusimaarutigaa:

- Naalakkersuisut aamma danskit naalakkersuisuisa akornanni suleqatigiinnissamut isumaqatigiissut nutartigaq piviusunut nutaanut, Kalaallit Nunaata Danmarkillu marluullutik Parisimi ilaalerfigisaannut naapertuuppoq.

Ministeri: Alloriarneq Kunngeqarfimmut pingaarutilik

- Maanna – Naalakkersuisut sinnerlugit – suleqatigiinnissamut isumaqatigiissutip nutarterneratigut Kalaallit Nunaata Parisimi isumaqatigiissummut ilaalernera pillugu nalunaaruteqarnissamut Inatsisartut aalajangiinerat piviusunngortissinnaagakku tulluusimaarutigaara”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Isumaqatigiissut Kunngeqarfimmut allorianeq pingaartuusoq silap pissusia pillugu ministeri Dan Jørgensen oqarpoq:

- Kalaallit Nunaata maanna Parisimi isumaqatigiissummut ilaalernera, taamaalillutalu ataatsimoorluta silap pissusiata allannguutaanut suliniutinik annertusititsisinnaalernerput nutaarsiassaavoq nuannerluinnartoq. Parisimi isumaqatigiissummi ataatsimoorsinnaalernerput alloriarneq annertuujuvoq, Kalaallit Nunaannuinnaanngitsoq, aammali Kunngeqarfimmut, Dan Jørgensen oqarpoq.

Atsioqatigiinneq Hans Egedep illuani pissaaq.