ANDREAS MOGENSEN KALAALLIT NUNAANNI

Kalaallit Nunaat sutigut tamatigut asseqanngilluinnarpoq

Avataarsualiartartoq Andreas Mogensen ippassaq sapaammi Kalaallit Nunaannut tikippoq. Ullut aqqaneq-marluk ingerlaneranni nunami sumiiffinni assigiinngitsuni tikeraarnissani ullumi aallartippaa. Perngaamik nunatsinnut tikeraarpoq.

Avataarsualiartartup Andreas Mogensenip Nuup saniatigut Sisimiut, Aasiaat Ilulissallu tikeraassavai.

Avataarsualiartartup Andreas Mogensenip nunatsinnut tikeraarnera inuppassuarnit nuannarineqarneratulli nammineq aamma assinganik nuannaarinnippoq, aatsaammi nunatsinnut tikeraarami.

- Kalaallit Nunaat sutigut tamatigut asseqanngilluinnarpoq. Siullertut nunarujussuuvoq pinngortitamigut immikkorluinnaq ittoq ikittuinnarnillu inulik, aamma nunami siammarsimaqisuni najugaqarput illoqarfinnit illoqarfinnut aqqusineqanngitsumi.

- Ungasissuserujussuit inuilaat inoqalaaginnartulluunniit, qaammataasat avataarsuaneersut inuiaqatigiinnut kalaallinut iluaqutaangaarsinnaapput. Pingaartumik nunarsuup taassumalu pinngortitaanik avatangiisiatalu nakkutigineqarnerannut.

Aammali umiarsuarnik timmisartunillu angallassinermi ajunaarnersuaqartillugulu qaannataasatigut attaveqaatit pinngitsoorneqarsinnaanngillat, minnerunngitsumillu attaveqaatit inuit akunneranni attavinnik pilersitsisinnaammata, Andreas Mogensen Sermitsiamut oqarpoq.

Inatsisit kinguariarput

Avataarsuanik ilisimatusarneq ingerlallualereeraluartoq, Kalaallit Nunaallu avataarsuanik ilisimatusarnermut pingaaruteqarluinnaraluartoq, inatsisitigut malittarisassat kinguariarput. Dorthe Juul Munchip, Ineqarnermut Attaveqaasersuutinullu Naalakkersuisoqarfimmit, Kalaallit Nunaanni inatsisit qanoq innerat saqqummiuppaa.

Danmarkimi 2015-imi Avataarsua pillugu inatsimmik taaneqartartoq atuutilerpoq, Kalaallit Nunaalli inatsimmi pineqanngilaq. Inatsilli Kalaallit Nunaanni atuutilersinnissaa pillugu maanna naalakkersuisut oqaloqatigineqartut, Dorthe Juul Munch oqaluttuarpoq.

Andreas Mogensenip tamanna maluginiarpaa, taamaattumillu avataarsuanik misissuineq politikkerinit soqutigineqarnissaa kaammattuutigaa.

- Naak avataarsualiartarneq nutaajugaluartoq, atortussiorneq ineriartorfiulluinnarpoq, isumaqarpungalu Kalaallit Nunaat tamatumani peqataasinnaassuseqarluartoq, taamaattumik inatsisiliornermut tunngasuinnaat pinnagit, aammali Kalaallit Nunaata qanoq iliuuseqarsinnaanera, kalaallit politikeriisa eqqumaffigippassuk pitsaassasoq isumaqarpunga.

Ilinniartut atuartullu naapinnissaat qilanaarigaa 

Nuummi ulloq sammisaqarfiusoq pissanganartoq naammassippat Andreas Mogensen tikeraarnerminut atatillugu Nuuk qimatsinnagu Erfalasorput oqartussaasunut tunniutissavaa.

- 2015-imi siullerpaamik avataarsualiarama qallunaat erfalasuat nassarpara, aappassaanillu avataarsualiarama erfalasut pingasut tamaasa nassarpakka (qallunaat, savalimmiormiut kalaallillu erfalasuat). Naalagaaffeqatigiinnermi nunat pingasuugatta tamanna pingaartissimavara, Andreas Mogensen oqaluttuarpoq.

Sisimiut, Aasiaat Ilulissallu tikeraassavai, tassanilu ilaatigut ilinniartorpassuit atuartullu naapissavai, tamannalu qilanaaraa.

Andreas Mogensen qaqugu tulliani avataarsualiassanersoq aperaarput:

- Naluara, maanna marloriarlunga avataarsualiarnikuuvunga, avataarsualiartartullu agguaqatigiissillugu marloriarlutik avataarsualiartarput, avataarsualiaqqikkusuppungali, taamaattumik iluatsitsiguma pingajussaanik avataarsualiarsinnaavunga, qaquguli taamaaliussanerlunga maanna oqaatigisinnaanngilara.

Nunarsuarput avataarsuanut ilaavoq

Avataarsualiartartut piffissap annersaani nunarsuarmi sulisarput, nunarsuarmit avataarsua ilisimatusarfigisarlugu, nunarsuarpullu avataarsuatulli misissortarpaat:

- Nunarsuaq avataarsuanut ilaasoq eqqaamassavarput, nunarsuatsinnilu pisartut pillugit ilisimatusarnerup pingaaruteqarneratulli ullorissanik nunarsuarmit isigisatsinnik ilisimatusarneq pingaaruteqartigaaq. Taamaattumik aamma Wild Nature Foundationimi suliniuteqarpunga, tassungalu atatillugu Kitaani nuna allanngutsaaliuganngortussaagunartoq pillugu kommunit (Sisimiut Aasiaallu) tikeraassavakka.

Powered by Labrador CMS