Naleraq Inatsisartunut qinersinissamut 62-it
missaanniittunik qinigassanngortitsivoq, Naleqqallu tunngaviusumik anguniagai
pillugit videoliamik saqqummiussinissaq maanna sulissutigineqaleruttorpoq.
Inatsisartunut qinersinissamut qinigassanngortittut ilagaat maanna
Folketingimut ilaasortaq Aki-Matilda Høegh-Dam, Siumumiit
ilaasortaajunnaaqqammersoq.
Naleraq Inatsisartunut qinersinissamut 62-it
missaanniittunik qinigassanngortitsivoq, Naleqqallu tunngaviusumik anguniagai
pillugit videoliamik saqqummiussinissaq maanna sulissutigineqaleruttorpoq.
Inatsisartunut qinersinissamut qinigassanngortittut ilagaat maanna
Folketingimut ilaasortaq Aki-Matilda Høegh-Dam, Siumumiit
ilaasortaajunnaaqqammersoq.
Taassuma Naleqqamut nuunnerminut
tunngavilersuutigaa, partii naalagaaffimmik pilersitsinissamik
pingaartitaqarmat, kiisalu inuiaat kalaallit oqaatsillu salliummagit.
Naalagaaffinngornissaq sulissutigissallugu Inatsisartunut
qinersisoqarnissaanik nalunaaruteqarnerup kinguninngua partiip siulittaasua
Pele Broberg oqarpoq.
- Naalagaaffinngornissaq, tassa timitalernissaa qinigaaffiup
tulliani sulissutigissuarput, aallartinnera taanna pingaartorujussuungami,
tullia kalaallit salliutinnissaat timitalersussuarput politikkikkut.
Uagutsinnut aallaavigaluta, taavalu aamma minnerunngitsumik sineriak tamaat
peqataatitsilluta ujartuinikuuvugut, Pele Broberg oqarpoq.
Tunngaviusumik isummat saqqummiutiaaraat
Naalakkersuisut siulittaasuata Múte Bourup Egedep
qinersinissap ullulerneqarneranik nalunaaruteqarnera sioqqullugu Naleqqap
tunngaviusumik isummersuutini saqqummiuppai. Naleqqap siulliulluni nunap
nammineersinnaanera tunngavigalugu naalagaaffinngortitsinissaq
piviusunngortikkusuppaa. Inuiaat kalaallit sutigut tamatigut
salliunneqartuarnissaat pisinnaatitaaffiutikkusuppaat. Kalaallit oqaasii
kinaassusiallu nunatsinni sutigut tamatigut salliunneqassapput. Allat
aallaaviginagit, immitsinnulli aallaavigaluta ineriartortitsisoqassasoq
qulakkeerusuppaat. Sineriak tamakkerlugu, illoqarfiit, nunaqarfiit
isorliunerusullu sipaarfiginagit inuerusarnagillu ineriartortikkusuppaat.
- Siullermik ineqarnermut aaqqissuusseqqinneq
allanngortissavarput. Attartortut inissiaatitik pigilertariaqarpaat.
Aappassaanik inuuniarnermi aningaasartuutit appasinnerusariaqarput.
Ingerlatseqatigiiffinnut politikki allanngortittariaqarparput, ullumikkummi
takusinnaavarput pisortat ingerlatseqatigiiffiutaat ajoraluartumik
iluanaaruteqarniaannarneq tunngavigalugu ingerlanneqartut, Pele Broberg
oqarpoq.
Namminiilivinnissamut aalajangernissaq pisariaqarpoq
Pele Broberg nassuiaavoq namminersorneq pillugu inatsimmi
paragraf 21 naapertorlugu siullertut danskit nalunaarfigeqqaassagivut
namminiilivinniarutta, alloriarnerullu tullerissagaa isumaqatigiinniarnissaq.
Danskit isumaqatigiinniarfigineqarnerat naammaginarsippat suliaq Inatsisartunut
saqqummiunneqassaaq. Suliaq akuerineqarpat inuiaqatigiinnut
taasissutigineqassaaq naggataatigullu Folketingimut taasissutigineqarluni.
- Kalaallit Nunaat namminersulivippat aningaasaqarneq
qanoq issava?
- Namminiilivinnissamut piffissaliinissamut
piumasaqaateqartoqanngilaq, soorlu aamma namminiilivinnissamut aqqut qanoq
ittuussanersoq piumasaqaateqartoqanngitsoq. Namminersornermut inatsit
naapertorlugu namminiilivinnissaq aalajangiiffigineqassaaq. Nunarput
aalajangereerpat isumaqatigiinniarnerit aallartinneqarsinnaapput. Aatsaat
tassanngaanniit isumaqatigiinniarnerit aallartinneqarsinnaapput, tamannalu
aatsaat aalajangertoqareerpat pisinnaavoq. Danmarkimi ministeriuneq aamma taama
oqarpoq.
- Danmark isumaqatigiinniarfigereerutsigu Inatsisartuni
oqaluuserineqartussanngussaaq, akuerineqarpallu suliaq pillugu aatsaat
paasititsiniaasoqarsinnaavoq innuttaasullu taasitinneqarlutik. Taamaattumik
namminiilivinnerup kingorna aningaasaqarnitta qanoq innissaanik aperiinnarneq
ajornarluinnarpoq, Pele Broberg oqarpoq.
