Kalaallit Peqqissartut Illuanni juullimut sammisaqartitsinerit

- Juulli tassaavoq ukiup ingerlanerani piffissaq immikkorluinnaq ittoq, Peqqissartut Illuanni nuannersumik nuannisaqatigiinnermik pilersitsiniarfigisagarput, Birtha Bianco, Kalaallit Peqqissartut Illuanni pisortaq oqarpoq.

Københavnimi Kalaallit Peqqissartut Illuanni ilaquttat ilanngullugit 88-it maannakkut najugaqarput. Taakkua affaasa missaat sivisuumik kræftimik katsorsarneqarput, taamaattumillu juullertinnagu Kalaallit Nunaannut angerlarsinnaanissaat naatsorsuutigineqarnani.

- Juulli najugaqartunut qanigisaminnut ileqqutoqqanullu pingaarutilinnut angerlarnissamut periarfissaqanngitsunut erloqinarsinnaasarpoq, Birtha Bianco oqarpoq.

Taamaattumik sulisut decembarimi assigiinngitsorpassuarnik sammisassaqartitsiniartarput, Peqqissartut Illuat taamaalilluni kissalaarnerulersinniarlugu nuannernerulersinniarlugulu.

- Akunnittarfiunngilaq napparsimmaviunaniluunniit, amerlasuunulli angerlarsimaffiugallartussaalluni, taamaattumik imminut ikiornissaminnut periarfissaqartunut tapersersuineq tamanullu nukissaqartunut peqataatitsineq sulissutigisarparput, Birtha Bianco oqaluttuarpoq.

Juullip ulloriai 50-init amerlanerusut

Juullimut nuannisarneq novembarip 20-anni aallarnisarneqariilaarpoq, tamatumani peqqissartut illuanni najugallit Kalaallit Illuutaannukaramik erinarsoqatigiit Aavaat novembarip 30-ani Christianskirkemi juullimi tusarnaartitsinissaminnut sungiusartut tusarnaariarlugit.

Novembarip 22-anni unnuap qeqqanut Vor Fruemi naalagiaqatigiittoqarpoq novembarillu 23-anni Gribskovimut angalaartoqarluni, tassani najugaqartut sulisullu juullimut pinnersaatissanik katersipput, taakkulu najugallit sulisullu ilusilersorlugit pinnersaasiaralugit.

Novembarimi sapaatip akunnerani kingullermi igalaani juullip ulloriai 50-it sinneqartut nivinngarneqarput. Saaffiginnittarfiup eqqaani ataatsimoorfiusartunilu orpinnik plastikinik mikisunik naasunillu aamma pinnersaasoqarpoq.

- Taavalu tallimanngornermi novembarip 29-anni orpik ikipparput, naatsiivimmilu tussiartoqarlunilu æbleskivinik sassaalliisoqarluni, Birtha Bianco oqaluttuarpoq.

Najugaqartut decembarip 11-anni juullimut nereqatigiipput qanigisaminnillu qaaqqusillutik. Mamarluinnartunik sassaalliisoqarpoq, soorlu qaleralinnik, kapisilinnik sequtsikkamik, qeerlutuut qatigaannik, puulukip neqaanik siatamik, savaaqqap neqaanik suppaliamik, soorunamilu risalamande-mik sassaalliisoqarluni. Aqaguani Christiansborgimi Inuit Ataqatigiit sinnerlugit Folketingimut ilaasortaq Aaja Chemnitz takornariartitsivoq.

– Juulliaqqami Christiansborg Slotskirkemi naalagiarnermik aallarnerneqassaaq, ulloqeqqasiornermilu kalaallit nerisassiaannik immikkut ittunik sassaalliisoqassalluni, nalunaaqutarlu 18.00 nereqatigiinneq aallartissaaq, tassani sassaalliutigineqassallutik puulukimineq siataq, naatsiiat kajortitat, rødkålit, risalamande, kalaallit kaagiat juullimullu mamakujuit aamma soorunami tussiaqatigiittoqassalluni, qitittoqassalluni orpiullu ataani poortugarsiassaqassalluni, Birtha Bianco oqaluttuarpoq.

Kop og Kandemit juullimi tunissutit

Kop og Kande Kalaallit Peqqissartut Illuannut juullimut poortugarsiassanik siornatut tunissuteqarpoq, taamaalilluni kikkut tamarmik orpiup ataani tunissutisiassaqartinneqarlutik.

- Tamanna qujassutigisorujussuuarput. Tassami kikkut tamarmik poortukkamik puuiagassaminnik tunineqartarnerat nuannaarnerulersitsisarami.