Kalaallit suliniutaasa EU-mit toqqarneqarnerat nersualaarneqartoq
GreenRoc-ip aqerluusassamik suliniutaanik EU-p suliniutissatut pingaarnerpaatut toqqaanera Aatsitassanut naalakkersuisup Naaja H. Nathanielsenip (IA) nuannaarutigaa.
EU-kommissionip suliassanut immikkut pingaaruteqartunut tapersersuinissamik isumassarsiaa nutaanik aqqutissarsiornissamut piumassuseqarnermik takutitsivoq aammalu nuannersorujussuulluni, Naalakkersuisoq Naaja H. Nathanielsen (IA), oqarpoq.
Assi: Oscar Scott Carl
Kujataani aqerluusassamik piiaanissamik suliniut EU-mi kommissionip immikkut ittumik allattorsimaffianut ilanngunneqartoq pingasunngornermi nalunaarutigineqarpoq.
Aatsitassanik periusissiamut pingaarutilimmik suliniutit katillugit 14-it allattorsimaffimmut ilanngunneqarput, Kalaallit Nunaannilu suliniutip toqqarneqarnera Naalakkersuisunit nuannaarutigineqarpoq:
- Toqqaaneq Kalaallit Nunaata aatsitassanut suliassaqarfimmi pingaaruteqariartuinnarneranik erseqqissaavoq aammalu nunatsinni nunap iluanut tunngatillugu ersarinnerulersitsilluni, Aatsitassanut Naalakkersuisoq Naaja H. Nathanielsen (IA) tusagassiutitigut nalunaarummi oqarpoq.
EU-kommissioni Naalakkersuisullu naapertorlugit suliniutit toqqarneqartut EU-kommissionimit, EU-mi nunanit ilaasortanit aningaasaqarnikkullu ingerlatsivinnit ataqatigiissaarisumik tapersersorneqarsinnaalernissaat allattorsimaffimmut ilanngunneqarnerup kingunerissavaa.
Taamaalilluni suliniutit aningaasalersorneqarnissaannut tigusisinnaasunullu attaveqarnissamut periarfissat ajornannginnerulersinneqassapput.
Nathanielsen: Aningaasalersuinissaq unammillerneqarusunnginnerlu unammillernarsimapput
Aningaasaliinissamut periarfissat ajornartorsiutaajuarsimapput, naalakkersuisoq oqarpoq:
Aatsitassat pisariaqartinneqartut pillugit suliassanut kajungernarnerusunik aningaasalersuinermut atugassaqartitsilernissap pisariaqartinneqarnera, ukiuni kingullerni Naalakkersuisut arlaleriarlutik oqaatigisarpaat.
- Suliassat pitsaasorpassuupput, kisianni nunarsuarmi aningaasalersuinissaq unammillernartuusimalluni, taamatullu nunanit allanit unammillerneqarusunnginnerup aammalu niuerfinni qalliuniarnerup aqqutissaq suliassanut arlalinnut suli sivisunerulersippaat, Naaja H. Nathanielsen oqarpoq.
Suliniutinik immikkut ittunik tapersersuineq nersualaarpaa:
- EU-kommissionip suliassanut immikkut pingaaruteqartunut tapersersuinissamik isumassarsiaa nutaanik aqqutissarsiornissamut piumassuseqarnermik takutitsivoq aammalu nuannersorujussuulluni, taanna oqarpoq.
GreenRoc-imit suliassaq Kalaallit Nunaata kujataani Amitsumi inissisimavoq. Suliassami aqerluusassamik piiaanissaq siunnerfigineqarpoq, taakkua ilaatigut biilit innaallagiamoortut batteriivinik tunisassiornermut atorneqartarput. GreenRoc-ip Kalaallit Nunaanni piiaanissamut akuersissummik qinnuteqaataa maanna tusarniaassutigineqarpoq.
