Isummersuut
Nammineerlunga eqqaamasara siulleq, taamani S-61-imik
Ilulissaniik Kangerlussuarmut timmisartoratta, 80-ikkkut
aallartinneraniusimassooq, Ilulissat mittarfik 1984-imi ammanngikkallarmat.
Isummersuut
Nammineerlunga eqqaamasara siulleq, taamani S-61-imik
Ilulissaniik Kangerlussuarmut timmisartoratta, 80-ikkkut
aallartinneraniusimassooq, Ilulissat mittarfik 1984-imi ammanngikkallarmat.
Eqqaamavara inuit nuannaartut, utaqqigaat SAS´p timmisartua København-imiit
tikinnissaa. Air Greenland-i nammineerluni København-imiit Kangerlussuarmut
timmisalinngikkallarmat. Kangerlussuakkooraangama nuannaartuaannartutut
misigisarpunga, immaqa ferierlunga aqqusaarakku, imaluuunniit feriemiit
angerlarmut ingerlaarama. Misigisuaannarpunga nuannaarnermik pissanganermillu
Kangerlussuakkooraangama. Aamma bar-eqarnikuuvoq mannakkut tax free iigaata
nalaani, eqqaamavara inersimasut arlallit aalakuulereersut ulaap tungaaniit,
piffissaq allaavoq taamani.
Kangerlussuaq oqaluttuassataqarpq ukiut tusindit arlallit.
Europamiut tikinngikkallarmata, tamanna piniariarfik pingaaruteqarsimavoq.
Kangerlummi pisussutit atorluarsimavaat, tuttut, umimmaat, puisillu
inuuniarnermut pingaaruteqarsimapput. Taamani kalaallit inoqarfeqarput
aasaanerani, ineriartortillugillu piniariaatsit siuarsimasut, qulakkeerlugit
neqissaqarneq, amit saarngillu. Piffik tamanna nooqattaarluni inooriaatsimut
pingaaruteqarsimavoq, pinngortitaq ataqqineqarluni, ilisimasaqarluarlunilu
atorluarneqartoq.
Nunaqarfiup oqaluttuarisaanermi nutaajunerusumi
pingaaruteqarnera sorsunnersuup aappaani aallartippoq, taamani amerikamiut
sakkutuut mittarfiat 1941-mi pilersimmassuk. Tamanna pivoq ambassadør Henrik
Kauffmann, isuma akerleriiffigineqartumi isumaqatigiissut atsiormagu,
amerikamiut akuerineqartut sakkutuut mittarfiinik Kalaallit Nunaanni
sanaartorsinnaalersillugit - tyskit
ilisimanngisaannik. Isumaqatigiissut pingaaruteqarpoq atlantikup avannaani
illersoqatigiit naalagaanerannut. Sakkutuutut mittarfiuvoq sorsunnerup
nillertup nalaani, 1990-ikkut aallartilaanerata tungaanut, amerikamiut
qimagunnerat tikillugu.
Kauffmann-ip iliuusaa immini oqaluttuassaavoq annertooq.
Sorsunnersuup kingorna Kangerlussuaq pingaaruteqartuarpoq,
1954-imi SAS nunarsuarmi siullersaalluni avannaarsuakkut angallavimmik
aallarniivoq, København-imiit Los Angeles-imut, Kangerlussuaq akunniffigalugu,
timmisartoq orsersortariaqarmat. Aqqut taanna siullersaavoq Europa-miit USA´p
kitaanut. Aqqutip taassuma teknologiimik siuariartorneq kisiat takutinngilaa,
aammali Kalaallit Nunaata annertusiartortumik angallannikkut Europa-miit
Amerika avannarlermut pingaaruteqarnerata. Kangerlussuarmi allagartaq silamiittoq,
ungasissusit allaqasoq, SAS´p nappartissimavaa. Ukiut 70-it qaangiupput ukioq
manna. Kangerlussuaq qitiusumik angallavittut atulerneraniik.
Ukiut qulikkuutaat arlalinni Kangerlussuaq atuupppoq
Kalaallit Nunaata nunat tamalaaniik isaaviatut. Avinngarusimasumi
inissisimagaluarluni, pingaaruteqarsimavoq angallattunut pillersuinermilu.
Kalaallit Nunaata mittarfiatut pingaarnersatut matuneqarnera taamaammat
nalaatat naanerattut malunnartuuvoq. Nuuk Ilulisallu qitiusumik nutaatut
inissinnerat Kalaallit Nunaata allanngoriarneraavoq, attaveqaatit nutaaliaasut
aallartinnerat, oqaluttuarisaanermik kingornussisut. Maannamut qujanaq,
Kangerlussuaq.
