Katuaq 2023-imi amigartooruteqartoq

Naak naatsorsuutit inernerit amigartooruteqarfiugaluartut, siunissaq qaamavoq, taama Katuami pisortaq siulersuisullu erseqqissaapput.      

- Siulersuisut uppernarsivaat Aningaasaateqarfik Katuaq suliffiusoq patajaatsoq ingerlalluartorlu, assigiinngitsorpassuarnik aaqqissuussaqarlunilu isumasioqatigiiffiusartoq, nunatsinnilu Coronap ajornartorsiortitsisimanerata nalaanit qaangiillualeriartortoq, tusagassiuutinut nalunaarummi allassimavoq.

Katuaq pineqaatissinneqartoq

Aningaasaateqarfik Katuaq 2023-imi 1,1 millionit koruuninik amigartooruteqarpoq. Amigartooruteqarnerup peqqutigaa, suliaq 2019-mi aallartittoq eqqartuussivikkut 2023-imi naammassineqarmat, Katuaq akiliisussanngorlugu eqqartuussiviup aalajangiinera. Suliaq aallartippoq suliffeqarfimmit Katuaq 2019-mi aningaasanik piumasaqarfigineqarmat, tusagassiuutitigut nalunaarummi allassimavoq.

Aammali eqqartuussiviup aalajangerpaa sulisuusimasoq amerlaqataanik Katuamut akiliissasoq. Sulisuusimasulli naammattumik akiliisinnaassuseqarnera ilimanarpallaanngimmat, siulersuisut aalajangerput, akiliutit tamaasa annaasatut naatsorsuutini inissinneqassasut. 

Pisoq uggornartoq

Taamaattumik ingerlatsinikkut amigartoornermik peqquteqarani, immikkulli ittumik pisoqarnera peqqutigalugu, Katuaq amigartoortoq siulittaasoq nassuiaavoq:

- Soorunami uggornarpoq ajuusaarnarlunilu 2023-imi amigartooruteqarnerput, nassuiaatissaqarporli. Eqqartuussiviup aalajangernera siulersuisut soorunami ataqqivaat, 2023-imili Katuaq tigoriaannarnik aningaasaqarluarmat, siulersuisut aalajangerput akiligassaq ataatsikkut tamaasa akilerniarlugit, tassa ukiuni 3-4-ini naafferartumik akilersornagit, taamaasiorutta akiligassavut ataatsikkut isumannaareerniassammata, Juaaka Lyberth nassuiaavoq, nangillunilu:

- Katuami pisortaq sulisuvullu pikkorissut peqatigalugit 2024-mut missingersuusiorpugut, 500.000 koruunit sinnerlugit sinneqartoorsiusussatut naatsorsuutigisatsinnik, taamaasilluta Katuap nammineq grundkapitalitut aningaasaatai pigeqqilissallutigit.