KUNNGEQARFIK DANMARK
Kenneth Høegh Issittoq pillugu aallartitatut toqqarneqartoq
Kalaallit Nunaata Danmarkillu akornanni politikikkut oqallittoqarnera. Kunngeqarfiup Issittoq pillugu aallartitaata toqqarneqarnerani Kalaallit Nunaanniit sunniuteqarsinnaanermik kissaateqartoqarnera suliap ilaraa. Maanna suliaq taanna naammassilertorpoq Issittorlu pillugu aallartitanngortoq Kenneth Høegh maanna sulinerminik aallartitsisinnaanngorpoq.
Kenneth Høegh Issittoq pillugu aallartitanngorpoq.
Assi: Jensine Berthelsen
Kunngeqarfiup Issittoq pillugu allartitamik toqqaanissaanut Kalaallit Nunaat aalajangeeqataanissamik kissaateqarnera pissutigalugu Danmarkip, Kalaallit Nunaata Savalimmiullu attaveqarnermik ataatsimiititaliaa sulingaatsiarsimasutut oqaatigineqarsinnaavoq.
Maannali suliaq naammassivoq. Issittoq pillugu aallartitamik toqqaaniarnermi Kalaallit Nunaat sunniuteqarneruliinnarani aallartitamik toqqaasinnaatitaalerpoq, taannalu taaguuteqarpoq "Senior Arctic Official Chair“.
Naalakkersuisut Kenneth Høegh, ullumikkut Kalaallit Nunaata USA-mi Sinniisoqarfiani pisortaq, toqqarpaat.
Kenneth Høegh Kalaallit Nunaanni Danmarkimilu nunanut allanut tunngasunik sivisuumik sulisimavoq.
1990-ikkut naalerneranni nunanut allanut tunngasunut ministereqarfimmi Nepalimi aallartitatut sulinera aallaartippoq, kingornalu Bangladeshimi 2009-miit 2013-ip tungaanut sulilluni. Nunanut allanut tunngasunut naalakkersuisoqarfimmi 2018-imi sulilerpoq, kingornalu Nunatta Washingtonimi aallartitaqarfiani pisortanngorluni.
Kenneth Høeghip nunanut allanut tunngasunut sulinermi saniatigut ukiuni arlalinni nunalerinermik suliaqarsimavoq.
Kenneth Høegh maanna Issittoq pillugu aallartitanngorpoq. Sulinera kalaallinit inuiaqatigiinnit aallaaveqassaaq aamma Senior Arctic Official Chair-itut sulissaaq. Tassa imaappoq nunat Senior Arctic Officialsimi ilaasortat siulittaasuuffigissavai, taannalu Issittumi Siunnersuisoqatigiit qullersaqarfigaat.
Tassalu Kenneth Høeghip Issittumi Siunnersuisoqatigiit siulittaasoqarfiani sulineq Kunngeqarfik sinnerlugu ulluinnarni isumagilissavaa.
