KL

DK

Killiffik: Upalungaarsimanermut piareersimasoqarunnaarpoq – Ruujorit qeruttoorsimanersut misissukkit

Nuummi arfininngormat unnukkut innaallagiaqaleqqimmat upalungaarsimanermut piareersimasoqarunnaarpoq. Nukissiorfiit nalunaarutaat kingulliit naapertorlugit sumiiffiit ilaanni suli innaallagiaqanngilaq.

Thomas Munk Veirum
Journalist
Saqqummersinneqarpoq

Arfininngormat unnukkut nalunaaqutaq 22.30 Kalaallit Nunaanni Upalungaarsimanermut Aqutsisoqatigiit ataatsimiipput, tassanilu Nukissiorfiit nalunaarput illoqarfiup pingajorarterutaata missaani innaallagissamik pilersuisoqaqqilersoq.

Arfininngornermi ullaap tungaani nalunaaqutaq qulit missaanni Nuup ilarujussua innaallagiaaruppoq.

Arfininngormat unnukkut ataatsimiinnermi Nukissiorfiit naatsorsuutigaat unnuap qeqqata missaani Nuummi innaallagiaqaqqilernissaa.

- Pilersaarusiornerit malillugit ingerlammata Kalaallit Nunaanni Upalungaarsimasussaatitaasut piareersimatinneqarunnaarput. Kalaallit Nunaanni Politiit ataatsimiinneq pillugu tusagassiuutinut nalunaarummi allapput. 

Nukissiorfiit nalunaarutaat naapertorlugu Uiami Qernertunnguillu ilaani suli innaallagiaqanngilaq.

- Qernertunnguani pilersuineq pitsanngorsarniarlugu containerimik ikkussinissaq sulissutigineqarpoq. Illoqarfimmi pilersuineq pingaarnerusoq pilerseqqinneqarpoq. Eqqaamasariaqarporli innaallagissamik kiassarnermit annertuumik atuinerup kingunerisaanik annikitsumik qamittoortoqarsinnaammat, Nukissiorfinnit allapput.

Nunatsinni Politiit pigaartuisa pisortaat Jeppe Andsager sapaatiummat ullaakkut Sermitsiamut oqarpoq oqartussaasut arfininngornermi ulloq naallugu pisoq pillugu qanimut suleqatigiissimallutik. 

Oqartussaasut innuttaasunut kajumissaaripput imermut aqqutit ruujorit qerisimanersut misissoqqullugit. Innaallagiaaruttoortoqarneratigut angerlarsimaffippassuit aamma kiassarneqarunnaarput. Taamaattumik qeruttoornikkut atortunik ajoqusertoqarsimasinnaavoq.

Politiit aamma ilisimatitsipput, Nuup Timersortarfiani aamma Nuussuarmi Timersortarfimmi kialaarfiit matuneqareersut. 

Politiit oqaatigaat Nuummi Illorsuaq Timersortarfimmi innuttaasut 300-t missaanniittut kialaariarsimasut.

Innaallagissamik atuinerup annikinnerulersinnissaa pillugu Nukissiorfiit siunnersuutaat innuttaasut malilluartariaqarpaat.

Kalaallit Nunaanni Politiit normua +299 701448 atorsinnaaleqqippoq. 

inuiaqatigiit

ATORFIIT Se alle jobs

Powered by Labrador CMS