KNI-mi pisortaaneq nassuiaavoq: Sinneqartoorutit nungupput
Ikummatissanit tunisanit sinneqartoorutit nungummata KNI ikummatissap akiinut tapiissuteqarsinnaajunnaarpoq.
Ikummatissap nunatsinni atuisunut akia Danmarkimi atuisunut akinut naatsorsorneqartunut kingullernut sanilliukkaanni, suli akitsuusernagit liiterimut 1,30 koruunit missaannik akikinnerusut Jeppe Jensenip erseqqissarpaa.
Toqqorsivimmit: Leiff Josefsen
Ikummatissap akia liiterimut 85 oorinik qaffanneqartoq KNI-mit marlunngornermi nalunaarutigineqarpoq.
Tamanna kattuffinnit KNAPK-mit aamma SIK-mit sakkortuumik isornartorsiorneqarpoq, ilaatigut nunarsuarmi niuerfinni akit appasinneranni ikummatissap akiata qaffanneqarnera apeqquserneqarluni.
Ikummatissanit isertitat immikkut ittumik sinneqartoorutaasut KNI-p Naalakkersuisunik isumaqatigiissuteqarluni akit appasinnissaat anguniarlugu atortagai maanna nungunneqarsimalermata akit qaffattut KNI-mi pisortaaneq Jeppe Jensen Sermitsiamut allakkatigut nassuiaateqarpoq.
- Atuisunut akit 2025-mi maajimi qaffannerat siornamut sanilliullugu ikummatissat pisiarineqarneranni akit qaffannerannik pissuteqanngilaq, kisianni ukiut siuliini immikkut ittumik sinneqartoorutit tapiissutigineqartartut nungunnerannit aamma atuisut ukiumi kingullermi sipaaruteqarsimanerisa kingunerisaannik pissuteqarpoq, Jeppe Jensen akivoq.
Danmarkimit akikinnerusoq
Ikummatissap nunatsinni atuisunut akia Danmarkimi atuisunut akinut naatsorsorneqartunut kingullernut sanilliukkaanni, suli akitsuusernagit liiterimut 1,30 koruunit missaannik akikinnerusut taassuma erseqqissarpaa.
Danmarkimi akitsuuteqanngitsumik ikummatissap akia Kalaallit Nunaannilu akitsuuteqanngitsumik ikummatissap akianut sanilliullugit takussutissami ataaniittumi pisortaanerup erseqqissaataa:
Suliffeqarfiup ikummatissat imerpalasut akiinut aalajangersaanerminni pisiarineqarnerannit akia, atuisunut assartuunneqarnerat tankinillu aserfallatsaaliuinermut aningaasartuutit aallaavigisaraat KNI-mi pisortaaneq nassuiaavoq.
Jeppe Jensenip suleriuseq ima nassuiarpaa:
- Naalakkersuisut isumaqatigiissuteqarfiginerisigut ikummatissat imerpalasut pisiarineqartup akii piffissami sivisunerusumi qulakkeerneqartarput, taamaalilluni atuisunut akit assersuutigalugu Danmarkimi akit nalinginut naleqqiullugit allanngorakulannginnerunissaat qulakkeerneqartarluni.
- Taamaattumik atuisunut akit nunani tamalaani ikummatissat akiinut naapertuuttuaannarneq ajorput, ingammik piffissami sivikitsumi allanngorartoqarnerani.
Nunarsuarmi niuernermit akikinnerujussuunissaa qulakkeerneqartoq
KNI taamaalilluni 2021-mi atuisunut akit niuernermi maanna akiinit appasinnerusumik inissinneqarnissaat qulakkeersimagaa erseqqissarpaa. Akit aalajangersimasut pillugit isumaqatigiissutit pissutaallutik atuisunut akit 2021-miit 2024-p aallartinneranut niuernermi akinit appasinnerunerannik pissuteqarpoq, soorlu takussutissami takuneqarsinnaasoq.
Pisortaaneq naapertorlugu isumaqatigiissutit taakku 2023-mi qaangiupput, tamatumalu kingunerisaanik ikummatissat 2024-mi pisiarineqarnissaannut aningaasartuutit qaffarujussuarmata atuisunut akit 2024-mi apriilimi akitsorput.
Akit qaffannerat atuisunit tamakkiisumik malugineqanngilaq, KNI-mi ukiut siuliini ikummatissanik, ingammik umiarsuarnut takornariartaatinut, tuniniaanermigut sinneqartooruteqarsimavoq.
- Ukiut siuliini immikkut ittumik sinneqartoorutit katersorneqarsimasut atuisut iluaqutiginiassammatikkit, 2024-mi akit qaffannerat annikinnerusumiitsinnissaat siunertariniarlugu aningaasaliissutigineqassasut Naalakkersuisut aalajangerpaat. Taamaattumik ikummatissap akia 2024-mi qaffannera piviusumit annikinneruvoq. Jeppe Jensen nassuiaavoq.
