KNI-p akissutaa Hans Enoksenip naammaginngilaa
KNI A/S-ip Sisimiuni qullersaqarfiani sulisut qassiunersut ingerlatseqatigiiffiup isertuummagu, Naleqqami politikerip Hans Enoksenip naammaginngilaa. Tamanna paragraf 37 naapertorlugu Naalakkersuisunut apeqquterpassuarnut tunngaviuvoq.
KNI A/S-ip Sisimiuni qullersaqarfiani sulisut qassiunersut sooq oqaatigiumaneqannginnersoq Hans Enoksenip paasisinnaanngilaa.
Leiff Josefsen
- KNI A/S, suliffeqarfiit inuiaqatigiit pigisai allat assiginagit, ”allaffeqarfissuarmini” atorfeqartut amerlassusaannut sooruna akissuteqarnerattuut ”pissutsit tunngaviusut patsisigalugit” paasititsiumanngillat, Sooq “ammasuuneq isertuaatsuunerlu” periuserinagit akiumanngillat, Hans Enoksen aperivoq.
Royal Greenland A/S-ip 2023-mi Nuummi qullersaqarfiani 104-nik sulisoqarnera, paragraf 37 naapertorlugu apeqquteqaammut marsip naanerani 2023-mi akissummi allassimasoq innersuussutigaa. Royal Greenland KNI A/S assigalugu Namminersorlutik Oqartussanit pigineqarpoq.
KNI A/S-imut tunngatillugu apeqqut taanna ippassaq ima akineqarpoq:
"KNI A/S pissutsit tunngaviusut patsisigalugit ingerlatsinermut aningaasartuutiminik taama itisiliiffiutigisumik tamanut paasissutissiineq ajorpoq".
Inatsisit tunngavigalugit nassuiaat
Tamakku ilisimatitsissutiginissaannut inatsisitigut aporfeqarnersoq Hans Enoksenip aamma paaserusuppaa.
Ingerlatseqatigiiffiit inuiaqatigiit pigisaasa “suliatik aqutsinertillu pillugit paasissutissat tamanut saqqummiunneqartarnerisigut, Namminersorlutik Oqartussat aktianik ingerlatseqatigiiffii isertuaatsuussasut” Naalakkersuisut ”tunngaviusumik” isumaqatigineraat, tassunga atatillugu aamma paaserusuppaa.
