KNI-p allaffissornikkut aningaasartuutai isertuunneqarput

"KNI A/S pissutsit tunngaviusut patsisigalugit ingerlatsinermut aningaasartuutiminik taama itisiliiffiutigisumik tamanut paasissutissiineq ajorpoq."

KNI Pilersuisup allaffeqarfissuani qassinik sulisoqarnersoq apeqqutigineqarmat akissut taama naatsigaaq. Pilersuisup allaffeqarfiata ingerlanneqarnera ukiumut qanoq aningaasatigut naleqarnersoq apeqqutigineqarmat aamma akissut taannaavoq.

KNR-TV-mi ussassaarutinut KNI qanoq aningaasartuuteqartartiginersoq Hans Enoksenip paragraf 37 naapertorlugu apeqquteqarluni aamma paaserusuppaa.

Akissullu naatsunnguaq akissutigineqaqqippoq:

"KNI A/S pissutsit tunngaviusut patsisigalugit ingerlatsinermut aningaasartuutiminik taama itisiliiffiutigisumik tamanut paasissutissiineq ajorpoq."

Nioqqutissat

Pilersuisup pisiniarfiini nunaqarfinniittuni nioqqutissaatinik Naalakkersuisut ikilisaanissamik pilersaaruteqarnersut Hans Enoksen apeqquteqarami, itisilerlugu akineqarnissaminik iluatsitsineruvoq.

- Inoqarfinnut minnernut avinngarusimasunullu nioqqutissanik ulluinnarni pisariaqartitanik aalajaatsumik pilersuineq ingerlanniarlugu Namminersorlutik Oqartussat KNI A/S-ilu nioqqutissanik pilersuineq pillugu sullissinissamik isumaqatigiissuteqartarput. Nioqqutissat pigineqartussat sullissinissamik isumaqatigiissummi aalajangersagaapput. Nioqqutissani pigineqartussani nioqqutissanik taarsersuisinnaalluni ingerlatseqatigiiffik pisinnaatitaavoq, nioqqutissani pigineqartussani nioqqutissap pineqartup pitsaassusaanut akianullu malunnaatilimmik assigiinngissuteqanngitsumik. Nioqqutissani pigineqartussani allannguutit sumiiffimmi kissaatit atugassaritinneqartullu isiginiarlugit aalajangersarneqartarput. Nioqqutissaq piumaneqarunnaarpat nioqqutissanit pigineqartussanit peerneqarsinnaavoq. Nioqqutissani pigineqartussani allannguutit annertuut, assersuutigalugu piumaneqannginnerat pissutigalugu, Namminersorlutik Oqartussanit akuerineqartussaapput, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund akissummi allappoq.

Tapisinerit atorunnaarsinneqartut

Pilersuisup pisortaasa ukiumoortumik sinneqartoornermi aningaasarsiamik qaavatigut qanoq annertutigisumik tapisitinneqarsimanersut Hans Enoksenip paaserusuppaa. 

- Pissutsit tunngaviusut patsisigalugit aqutsisut sulisullu akissarsiaannut pissutsit pillugit KNI paasissutissiissutiginninnissaminut pisussaatitaanngilaq, ukiumoortumik naatsorsuusiortarneq pillugu inatsit naapertorlugu pisortanut tunngasunik ukiumoortumik nalunaarusiani saqqummiussassat eqqaassanngikkaanni. KNI-mili bonusisitsisarnermut aaqqissuussinerit atorneqanngimmata paasissutissiissutigineqarsinnaavoq, KNI akissummi allappoq, bonusisitsisarnermullu aaqqissuussinerit 2021-mi atuutilersumik KNI-mi atorunnaartut ilanngullugu paasissutissiissutigaa.

- Bonusisitsisarnermut aaqqissuussinerit KNI-mi atorunnaarsivissorneqarput, taamaattumillu sulisut, aqutsisut imaluunniit pisortat bonusisitsisarnermut aaqqissuussinermut ilaatinneqanngillat, ilisimatitsissutaavoq.

Namminersorlutik Oqartussat ingerlatseqatigiiffiutaanni pisortaanerit assigiinngitsut tapisisarnerat upernaap ingerlanerani sammineqarpoq oqallisigineqangaatsiarlunilu, Royal Greenlandimi pisortaaneq Susanne Arfelt Rajaqmand 3 millionit koruuninik tapisisimasoq paasineqarmat, 2 millionit koruunit atorfineqqaarnermi tapisiatut, atorfininnermilu isumaqatigiissummut ilanngullugu 1 millionit koruunit 2023-mut aalajangersimasumik tapisiatut. Taamaalilluni 2023-mi katillugit 8,1 million koruuninik akissarsivoq.

Sulisunut ataasiartakkamik kajumissaatissiineq

Nunaqarfinni pisiniarfinni allanilu sulisut sinneqartoornermi sulilluarsimanerat pillugu tapisitinneqartarnersut apeqqummut ima akissuteqartoqarpoq:

- Pilersuisup pisiniarfiini sulisut KNI A/S-ip aamma SIK-p akornanni isumaqatigiissut tunngavigalugu akissaasersugaapput, qaangiuttoorlunilu sulinermut tunngatillugu akissarsiaqartitsinermut aalajangersakkat tassani isumaqatigiissutigineqarput. Suliffeqarfissuarmi KNI-mi sulisut tamatuma saniatigut, immikkut illuinnartumik pisoqartillugu ataasiartakkamik kajumissaatissinneqarsinnaapput, pineqartup qaammammusiaata annerpaamik amerlaqataanik.