KNI pillugu suliaq: Naatsorsuuserisut pisortarisimasaannut pineqaatissiissutaanikoq Nunatta Eqqartuussisuuneqarfiani qasukkarneqartoq
KNI-mi naatsorsuuserisut pisortarisimasaat Per Jensen peqquserlunnermut allakkanillu eqqunngitsunik suliaqarsimanermut ukiuni marlunni pineqaatissinneqarsimasunut inissiisarfimmiittussanngortinneqarpoq. Taamaalilluni eqqartuussiveqarfimmi pineqaatissinneqaqqaaraluarnera sivikillisinneqarpoq.
Nunatta Eqqartuussisuuneqarfian maani suliaq ataasinngornermi aallartippoq.
Assi: Morten Okkels
Per Jensen ukiuni marlunni pineqaatissinneqarsimasunut inissiisarfimmiittussanngorlugu Nunatta Eqqartuussisuuneqarfiani pingasunngornermi aalajangerneqarpoq. Eqqartuussisoqarfik Qeqqani ukiuni pingasuni pineqaatissinneqarsimasunut siorna inissiisarfimmiittussanngortinneqarnera taamaalilluni sivikillineqarpoq.
Eqqartuussisoqarfik Qeqqa Nunatta Eqqartuussisuuneqarfianiit isumaqatigineqarpoq, tassa Per Jensen naatsorsuuserisunut pisortaanermini KNI-mi akissarsialerinermi atortumi imminut ikkussimariarluni pisinnaatitaaffiginagu akissarsisarsimanermini peqquserluttuliorsimasoq.
Aningaasat suli akileraarusernagit 3 millionit sinneqartut peqquserluttumik aningaasarsiarineqarsimanngitsut Nunatta Eqqartuussisuuneqarfiani isumaqarput, taamaattumillu pineqaatissiissut sivikillineqarpoq.
Akiligassat eqqunngitsut
Per Jensen allagaatinik eqqunngitsumik suliaqarsimaneranik Eqqartuussisoqarfik Qeqqani pisuutinneqarnera Nunatta Eqqartuussisuuneqarfiani isumaqatigineqarpoq. Atsiornerit ilumuunngitsut aamma mailikkut allaqatigiinnerit ilumuunngitsut suliarisimavai kiisami akiligassat akuerineqareernikut allanngortittarsimallugit.
Per Jensen KNI-minnganniit siusinnerusukkut saqitsaannermut aamma suliassanngortinneqarnikuuaa, taannalu Danmarkimi eqqartuussivinni suliarineqarnikuuvoq. Pisuni tassani aamma pisuutinneqarpoq.
Pingasunngornermi ualikkut eqqartuussut nalunaarutigineqareermat Sermitsiamut oqaasissaqannginnerarpoq.
Eqqartuussaasut aqqi Sermitsiami nalinginnaasumik saqqummiunneq ajorpavut. Maannali Nunatta Eqqartuussisuuneqarfiani aalajangiinerup kingorna saqqummiupparput. Eqqartuussaasoq suliffeqarfimmi pingaarutilimmi atorfeqarnermini pinerlussimavoq.
