Innuttaasunut kiffartuussivimmi KNR-imi pisoq alla maanna eqqissiviilliorutaavoq.
KNR-imi sulisut 50-it missaanniittut TP-p isumaqatigiissutaa naapertorlugu atorfillit aningaasarsiaannut tapiliussamut tunngatillugu periutsimik allannguisoqarnera Tusagassiuutinik suliaqartut Peqatagiiffiata (TP)-p maannakkorpiaq misissorpaa.
Unnukkut, ullaakkut sapaatillu akunnerisa naaneranni sulinermi tapit pineqartut, TP-p ilaasortaminut nalunaarutaani allaqqavoq. Peqatigiiffiullu paasissutissiinera naapertorlugu taakku ullormiit ullormut atorunnaarsinneqarput.
Allannguut KNR-imit sulisunut pingasunngornermi ataatsimiinnermi ilisimatitsissutigineqarsimasoq TP ilaasortanut nalunaarummini allappoq.
Pisoq pakatsinartoq
TP-mi siulittaasup Arnaq Nielsenip KNR-imit iliuuserineqartoq paasisinnaanngilaa. Nalunaarullu TP-mi ilaasortat KNR-imi atorfillit pakatsissutigalugulu innuttaasunut kiffartuussivimmi siunissami suliinnarnissartik apeqquseraat taassuma Sermitsiamut oqaatigaa.
- Pakatsisimaqaat, paasinarporlu. Unnukkut, ullaakkut kiisalu sapaatit-akunnerisa naanerini, juullikkunni nalliuttunilu sulinerminni tapit aningaasarsissutiginerulaartaramikkit, Arnaq Nielsen oqarpoq, taanna TP-mi siulittaasuunermi saniatigut tusagassiorfimmi Sermitsiami atorfeqarpoq.
KNR-ip iliuusaa sulisunik nutaanik atorfinitsitsinissamut sulisuminnillu atorfeqartitsiinnarnissamut ajornakusoornerulersitsissasoq, TP-mi siulittaasup ernummatigaa:
- Nalunngilarput ukiuni kingullerni unammilligassaqartorujussuusimasoq. Maannalu pisoq KNR-imi sulisut atorfeqaannarusunnerannut nutaanillu atorfinitsitsinissamut iluaqutaanngilaq. Tamanna uggornarpoq, Arnaq Nielsen oqarpoq.
KNR: Tapit kukkussutaapput
KNR-ip tusagassiorfimmi sulisuminut allagaqaataa Sermitsiamit takuarput.
Sulisoq assersuutigalugu nalunaaqutaq ullaassakkut tallimaniit ualikkut marlup tungaanut sulinermut tapisitinneqartarnera KNR-imit kukkussutigineqartoq, KNR allappoq.
Sulinermi aningaasarsiat saniatigut assersuutigalugu nal. 05.00-imiit nal. 08.00-imut sulisimatilluni tapinik pisoqartaraluarpoq, ullormulli akunnerit arfineq-pingasuinnaat sulisoqartillugu tapinik tunniussineq kukkunerusoq KNR allappoq.
Aningaasarsianut isumaqatigiissut allatut paasineqartalersimanngitsoq, KNR-ip pisortaata Hans Peter Poulsenip Sermitsiamit apersorneqarnermini oqaatigaa.
Pisortaq: Piffissami aalajangersimasumi sulinermi tapisisoqartanngilaq
Pisortaq ima nassuiaavoq:
- Kapitali 8-mi tapit pineqartut piffissani taakkunani piareersimasuunermut imaluunniit immikkut suliartoqqusaasimanermi atuupput, imaannani piffissami tassani nalinginnaasumik sulinermi (akunnerit 40-t iluanni) tapitut tunniunneqartussaasut, allappoq, nangipporlu:
- Tassa nalunaaquttap akunnerini 40-ni nalinginnaasumik sulinermi, piffissaq sorleq apeqqutaatinnagu, nalinginnaasumik aningaasarsisoqartarpoq. Piffissami nalinginnaasuunngitsumi sulinermi tapit, piffissani aalajangersimasuni piareersimasutut sulisimagaanni aatsaat tunniunneqartarput.
Hans Peter Poulsenip aningaasarsianut isumaqatigiissummi paragraf 27 eqqartorpaa. Piffissami aalajangersimasumi sulinermi sulisunut tapeqartoq tassani allassimavoq:
Paragrafili taamatut paasineqassanngitsoq, taanna oqarpoq:
- Piffissani taaneqartuni sulineq piffissami nalinginnaanngitsumi sulinertut ingerlaannaq tapisissutaasussaanngillat. Aningaasarsianut isumaqatigiissummi kapital 8 pigaartuunermut tunngavoq, paragrafilu 27 tamatumunnga attuumassuteqartutut atuarneqassaaq, Hans Peter Poulsen Sermitsiamut allappoq.
Atorfinitsitsiniarnermut ajornartorsiutaanissaa ernummatiginngikkaa
Pisortaanerup sulisut pakatsisimanerat paasisinnaallugu oqarpoq, tamannalu pillugu sulisut peqatigiiffiannik oqaloqateqarnissamut tikilluaqqusaasut oqaatigaa.
Allannguut KNR-ip atorfinitsitsiniarneranut sulisunillu atorfeqartitsiinnarnissamut sunniuteqassanersoq pisortap ernummatiginngilaa:
- Sunniuteqangaarunnanngilaq. Akissarsianut tunngatillugu unammillersinnaalernissaq apeqqutaaneruvoq. Aningaasarsiat tusagassiorfinni allani atorfinnut imaluunniit pisortat suliffeqarfiinut sanilliukkaanni KNR unammillersinnaanngilaq.
- Sulisussarsiornermi tapi ataasiinnaq aalajangiisuunngilaq, Hans Peter Poulsen oqarpoq.
KNR-imi tusagassiortut aaqqissuisullu soraakaanerat aamma sulisut uippakajaalersarnerat pillugu Sermitsiamit siusinnerusukkut allaaserisarpavut.
Aamma pisortat arlallit taarserneqarput, ilaatigut pisortaq Hans Peter Poulsen maajip aallaqqaataani atorfinitsinneqarpoq.
