NUTAARSIASSAQ

KNR-imi sulisut suliaminnik unitsitsinissaminnik nalunaarput – pisortap soraarsinneqarnissaa piumasaraat

Nutaarsiassaqartitsivimmi pisortaq soraarsinneqanngippat KNR-imi nutaarsiassaqartitsivimmi, radiomi tv-milu sulisut juulip aallaqqaataaniit suliaminnik unitsitsiniarlutik nalunaarutigaat.

KNR-ip aallakaatitsivia nutaarsiassaqartitsivialu ataasinngornermi juulip aallaqqaataani marlunngornermilu juulip aappaanni inoqangaarunnanngillat, immikkoortortaqarfiit pingasut tamarmik sapaatip-akunnerata tulliani ataasinngornermiit sulinerminnik unitsitsiniarlutik aarlerisaarutigaat.

OBS: KNR-imi siulersuisuni siulittaasuugallartup Miki Jensenip oqaaseqaataa allaaserisap naqqani ilanngunneqarpoq.

KNR-imi aqutsisut ataasinngornermi juulip aallaqqaataani marlunngorpallu juulip aappaanni suliaminnik unitsitsisoqarnissaanik nalunaarfigineqarput. Taamatut KNR-imi sulisut sinnerlugit oqaaseqartartoq, KNR-ip nutaarsiassaqartitsiviani nittartakkami aaqqissuisuugallartoq Hanna Hviid Sermitsiamut ilisimatitsivoq.

- Nutaarsiassaqartitsivimmi pisortaq Anita Cramer Corpas soraarsinneqanngippat nutaarsiassaqartitsivimmi, radiomi tv-milu sulisut ataasinngornermi juulip aallaqqaataani marlunngornermilu juulip aappaanni suliaminnik unitsitsinissartik nalunaarutigaat, nalunaarummi allassimavoq.

KNR-imi pissutsit sulinermilu avatangiisit pillugit ernumassuteqarnermik allagaq Sermitsiap tallimanngornermi ullup-qeqqa sioqqullugu allaaseraa. Sulisut marluk sapaatip-akunnerani matumani soraarsimasut aamma eqqaaneqarpoq, ukiullu aallartinneraniilli aaqqissuisut pingasut soraarsimasut.

Tusagassiorfik KNR aatsaat taama ajornartorsiortigisoq tusagassiivimmi oqaaseqartartoq Hanna Hviid oqarpoq.

Suliffik toqqissisimananngitsoq

Nutaarsiassaqartitsivimmi, radiomi tv-milu sulisut sulinerminni avatangiisit atukkatillu pillugit unammilligassat eqqartorniaraluaraagamikkit tusaaniarneqarneq ajorlutik allakkami Sermitsiami ullumi tallimanngornermi allaaserineqartumi issuaaffigineqartumi allassimavoq.

- Oqaatsit naammanngimmata maanna iliuuseqarpugut. Ataasinngornerup ullaavani soraarsinneqarsimanngippat nutaarsiassaqartitsivimmi, radiomi tv-milu sulisut suliartornavianngillat, paasissutissiiput.

KNR-imi siulersuisuni siulittaasuugallartup Miki Jensenip Sermitsiamut ilisimatitsissutigaa pissutsit ilungersunarluinnarnerat siulersuisut eqqumaffigigaat, aaqqiagiinnginnerullu annikilliartortinnissaa maanna sulissutigineqartoq. Tamassuma saniatigut siulersuisut oqaaseqarsinnaanngillat, suliaq sulisumut ataasiakkaamut tunngassuteqarnera pillugu.

Powered by Labrador CMS