KNR: Tusagassiuinermi Sulisut Peqatigiiffiat ernumassuteqarluni siulersuisunut allagaqarpoq
Tusagassiuinermi Sulisut Peqatigiiffiat KNR-imi ilungersunartumik inissisimaneq pillugu allakkanik KNR-imi siulersuisunut anngussaqarput. Tassani ilaatigut atorfiit 19-it inuttassarsiorneqarnerat ernumanarluinnartutut isigalugu annguppaat. KNR-ip oqaluttuarisaanerani aatsaat taama amerlatigisunik atorfinnik inuttassarsiuussisoqartarpoq.
KNR-imi tusagassiortut 36-iupput, atorfiillu 19-it inuttassarsiuunneqarlutik.
Leiff Josefsen
KNR-ip nittartagagaani atorfiit inuttassarsiuunneqartut misissoraanni takuneqarsinnaavoq atorfiit 19-it inuttassarsiuunneqartut. KNR-ip oqaluttuarisaanerani aatsaat taama sulisussaaleqisoqartigaaq.
Taamaattoqarnera Tusagassiuinermi Sulisut Peqatigiiffiata ernumanarluinnartutut nalilerpaa. Peqatigiiffimmi siulittaasup tullia, Alice Sørensen ernumassuteqarnini Sermitsiamit apersorneqarnermini oqaluttuaraa.
- Tamanna ernumanarluinnarpoq, Alice Sørensen KNR-ip siulersuisunut allakkamik ernumassummik nassiussisimanertik pillugu oqarpoq:
- Ilaasortat KNR-imi atugaat ersarissumik ernumanarpoq, taamaammat allakkami ernumassuteqarluta allagaqarpugut iliuuseqartoqartariaqartoq.
KNR-i tamakkerlugu sulisut amigaatigineqartut
Siullermik nutaarsiassaqartitsivimmi tusagassiortut amigaatigineqarput, maannali KNR-imi immikkoortortaqarfinni ajornartorsiut siaruaappoq, TV-mik immikkoortortaqarfik eqqaassanngikkaanni. Alice Sørensen Tusagassiuinermi Sulisut Peqatigiiffiani siulittaasup tulliatut inissisimasup ilanngullugu eqqaavaa aqutsisut pingasut sisamalluunniit piffissami qanittuni atorfimminniit soraarsimasut, tamannalu ajortoqarnerani ersersitsinerarpaa.
- Taanna ersarissorujussuarmik
arlaannik iliuuseqartoqartariaqarneranik ersersitsivoq, Alice Sørensen naqissusiivoq.
- Sulisut amigaataanerannut
aningaasarsiat kisiisa siornatigut pisuutinniarneqartarput, kisianni maannakkut
ilaasortatsinninngaanniit aningaasarsianut attuumassuteqanngitsut aamma soorlu
assersuutigalugu aqutsinermut tunngasut ernumassutigineqartut anngunneqartalerput.
- Taamaammat aningaasarsiat kisimik ernumaatigineqanngitsut ilaasortatta
saaffiginnittarnertigut paasinarsivoq, taannalu ernumanarpoq.
Siulersuisuni siulittaasut marluk tunuartut
KNR-imi siulersuisuni siulittaasut marluk piffissap sivikitsup iluani tunuarput. Tamanna ajortoqarnerani ersersitsisoq siulittaasup tullia isumaqarpoq:
- Ernumanartorujussuugami taama amerlatigisut amigaatigineqarnerat.
Taavalu siulittaasut marluk piffissap sivikitsuararsuup iluani nammineerlutik
tunuarlutik. Ajorluinnartoqarneranik ersersitsigamik taakku, Alice Sørensen oqarpoq.
Siulersuisut iliuuseqarnissaat kissaatigineqartoq.
Siulersuisunut allagaq pingasunngornermi juunip tallimaani nassiunneqarpoq. Tusagassiuinermilu Sulisut Peqatigiiffiannit iliuuseqartoqassasoq neriuutigineqarpoq.
- Neriuppugut KNR-imi siulersuisut pissutsit iliuuseqarfigisinnaagaat, ernumanartumiimmi inissisimammata, Alice Sørensen oqarpoq.
KNR-i 90-95-llu akornanni sulisoqarpoq, taakkunani 20%-ii inuttassarsiuunneqarput.
