POLITIIT EQQARTUUSSIVIILLU
Kokaini 209 gram ukiut sisamat qaammatillu arfinillit isertitsivimmiittussanngortitsivoq
Kalaallit Nunaanni Eqqartuussiviit Qullersaata siusinnerusukkut eqqartuussut ataasinngornermi naqissuserpaa, taamaalillunilu kokainimik 209 grammimik nunatsinnut eqqusseriaraluartoq ukiuni sisamani qaammatinilu arfinilinni pineqaatissinneqarsimasunut isertitsivimmiittunssanngortinneqarpoq, taamak Kalaallit Nunaanni Politiit tusagassiuutitigut nalunaaruteqarlutik ilisimatitsipput.
Arnaq danskeq 209 grammi kokainimik nunatsinnut eqqusseriaraluarpoq. Maanna Kalaallit Nunaanni Eqqartuussiviit Qullersaata kredsrettip eqqartuussutaa malinneqassasoq naqissuserpaa, arnarlu pineqartoq ukiut sisamat qaammatillu arfinillit pineqaatissinneqarsimasunut isertitsivimmiittussanngortinneqarpoq.
Leiff Josefsen
Ukioq manna maajip 25-ani arnaq danskeq Københavnimiit Kangerlussuarmut timmisartorpoq. Tikinnermini akitsuuserisunit unitsinneqarpoq, pasitsaassisoqarmat ikiaroornartumik nassataqarsinnaasoq. Arnaq misissorneqarpoq nassaarsiffigineqarporlu ikiaroornartumik kokainimik 209 grammimik annertussusilimmik.
Tigusarineqarpoq Nuummullu timmisartuunneqarluni, aqaguanilu inatsisit tunngaviusut naapertorlugit killisiorneqarnermini nassuerpoq piaarnerpaamillu pineqaatissinneqarluni. Arnaq ukiuni sisamani qaammatinilu arfinilinni pineqaatissinneqarsimasunut isertitsivimmiittussanngortillugu Kredsretsip pineqaatissippaa.
Suliareqqitassanngortitsivoq
Pineqaatissinneqarnermi kingorna arnap pineqartup eqqartuussut suliareqqitassanngortippaa sivikilliliisoqarnissaanik piumasaqarluni, suliarlu Kalaallit Nunaata Eqqartuussiviani ataasinngornermi juulip 29-ani suliarineqarpoq. Eqqartuussisuuneqarfiup eqqartuussut atuutsinneqassasoq uppernarsarpaa, tamatumalu kingorna arnaq pineqaatissinneqarsimasunut inissiisarfimmukaanneqarpoq.
Unnerluussisoq immikkut ilisimasalik Lars Petersen tamanna pillugu oqarpoq:
- Ikiarornartunik sakkortuunik Kalaallit Nunaannut eqqusseriarsimaneq ilungersunartuuvoq. Eqqartuussutip ersersippaa, nalinginnaasumik annertugisassanngitsutut nalilerneqarsinnaasut sivisuumik pineqaatissiissutigineqartartoq.
- Kalaallit Nunaanni inuiaqatigiit ikittunnguupput, ikiaroornartullu sakkortuut inuiaqatigiinnut akornusiisinnaanerat annertuumik ajornartorsiortitsisinnaavoq. Taamaattumik ikiaroornartunik sakkortuunik Kalaallit Nunaannut eqqusseriartarneq Danmarkimiit sakkortunerujussuarmik pineqaatissinneqarnermik kinguneqartarpoq.
