Kokainimik annertuumik anngiortumik eqqussineq pillugu eqqartuussineq tallimanngornermi ullaap tungaani naammassineqarpoq.
Eqqartuunneqartup aappaa S kokainimik katillugit 488,5 graminik annertutigisumik ikiaroornartulereqataasimasutut aamma cannabisimik naatitseqataasimasutut ukiuni arfinilinni pineqaatissinneqarsimasunut inissiisarfimmiittussanngortinneqarpoq.
Kokainimik annertuumik anngiortumik eqqussineq pillugu eqqartuussineq tallimanngornermi ullaap tungaani naammassineqarpoq.
Eqqartuunneqartup aappaa S kokainimik katillugit 488,5 graminik annertutigisumik ikiaroornartulereqataasimasutut aamma cannabisimik naatitseqataasimasutut ukiuni arfinilinni pineqaatissinneqarsimasunut inissiisarfimmiittussanngortinneqarpoq.
Unnerluussutit
S tassaavoq 44-nik ukiulik Odensemilu inunngorsimasoq. S-ip unnerluutigineqarluni eqqartuunneqarnissaa 10-nik ukiulimmik inissinneqarnissaa unnerluussisumit piumasarineqarpoq unnerluussummi allassimasut naapertorlugit. S unnerluutigineqarpoq kokainimik katillugit 488,5 gram-imik hash-imillu naatitsinermut peqataanerminik. Tamakku tamaasa pinngitsuunerarpoq.
N tassaavoq 37-nik ukiulik Nuummilu inunngorsimasoq. N-ip unnerluutigineqarluni eqqartuunneqarnissaa 4-nik ukiulimmik inissinneqarnissaa unnerluussisumit piumasarineqarpoq unnerluussummi allassimasut naapertorlugit. N unnerluutigineqarpoq 112 gram-imik kokainimik piginnittuunerminik, taassuma S-imit tigusimanerarlugu tuniniaanissamut siunertaqarluni. Taanna itigartitsivoq, kisianni nammineq 30 gram-imik pisinerminik nassuerutigaa.
Narkokriminalitetimik saniatigut angutit taakku marluk immikkut unnerluutigineqarput navianartorsiortitsinermik, N-imilu unnerluutigineqarpoq tarnikkut persuttaasimanermik. Taakku aamma itigartitsipput. Marluullutik Nuummi anstaltimi tigummineqarput eqqartuussivimmi ataatsimiinnissamut sioqqutsisumik.
S unnerluussutinut tamanut pisuunnginneraraluartoq pineqaatissinneqarpoq.
S kokainip annertussuusaata affangajaanut pisuunngitsutut eqqartuussisunit nalilerneqarpoq.
Kokainip affaanut ikiaroornartulereqataasimasutut pinngitsuutinneqartoq
S-ip kokainimik anngiortumik eqqusseriaraluartup aappaa allaqatigiisarsimaneranut eqqartuussivimmi pisuutinneqarpoq. Pisumili tassani anngiortumik eqqusseriarnermi S-i suleqataasimasutut eqqartuussivimmit pinngitsuutinneqarpoq.
S-illi anngiortumik eqqusseriartup aappaa Ilulissanut timmisartumut bilitsisisimaneranut unnerluussummut eqqartuussivimmi pisuutinneqarpoq.
Taamaalilluni S kokainip annertussusaata affaangajaanut pinngitsuutinneqarpoq, taamaattumillu eqqartuussisut ukiuni arfinilinni pineqaatissinneqarnissaa naleqquttutut isigaat.
S Danmarkimi arlaleriarluni pineqaatissinneqarsimasoq, ilaatigut hashimik ikiaroornartunillu allanik ikinnerpaamik tallimariarluni pineqaatissinneqarsimasoq eqqartuussinerup ingerlanerani paasinarsivoq.
N tarnikkut naalliutitsisimasutut pinngitsuutinneqartoq
Unnerluutigineqartup aappaa N, ukiuni marlunni affarmilu pineqaatissinneqarsimasunut inissiisarfimmiittussanngortinneqarpoq.
N kokainimik 112 grammimik, S-imit tuniniaqqitassanngorlugu pisimasaminik, tigumminnittutut unnerluutigineqarpoq.
Unnerluussummut tassunga pisuunnginnerarluni kokainimik nammineq pissaminik 30 grammimik peqarnini nassuerutigaa.
Allattaaviit immiussallu arlallit tunngavigalugit N kokainimik 112 gramimik tigumminnittutut pisuusutut eqqartuunneqarpoq.
Ikiaroornartulerisimasutut unnerluunneqarnermi saniatigut N tarnikkut naalliutitsisimasutut aamma unnerluutigineqarpoq. Unnerluussummut tassunga pineqaatissinneqarnissaanut piumasaraatit naammassineqanngimmata pinngitsuutinneqarpoq, sioorasaarisimasutulli pineqaatissinneqarluni.
Tarnikkut naalliutitsinerit unnerluussummi allaatigineqartut arlallit 2024 sioqqullugu pisut, tassa inatsisip 2024-mi januaarimi atuutilernissaa sioqqullugu pisimammata, pineqaatississutiginissaanut pissutissaqanngitsut eqqartuussivimmi tikkuarneqarpoq.
Aammattaaq unnerluutigineqartup N-ip pinerlineqarnerartullu akornanni uumissuinermik asanninnermillu takutitsinerit, sumiginnaasimaneraanerit allanillu pisuutitsinerit illuatungeriit marluullutik pissusilersuutigisimagaat nalilerneqarpoq.
Eqqartuussisup N-ip siornatigut pineqaatissinneqarnikuunngimmat ukiuni marlunni affarmilu pineqaatissinneqarsimasunut inissiisarfimmiittussanngortitsinneranut tunngavilersuutigaa.
Eqqartuussaasut unnerluussisullu eqqartuussut suliareqqitassanngortissanerlugu eqqarsaatigeqqaassavaat.
Pineqartut marluk tigummigallarneqaannassasut eqqartuussisup aalajangerpaa.
