Eqqartuussisoqarfik Sermersuumi nunatsinni ikiaroornartulerinermik ukiorpassuit ingerlaneranni suliat pingaarnersaanni Sermitsiaq malinnaassalluni piareerpoq. Kokainimut tunngatillugu suliani annerpaasoq ilimanarpoq. Suliaq pillugu ilimannittut qaaqquneqartut arlallit ataasinngornermi tusarfigissavagut.
Unnerluussisussaatitaasup pineqartoq, uani S-imik taasarput, ukiuni qulini pineqaatissinneqarsimasunut inissiisarfimmiittussanngortinneqassasoq piumasaraa. Killiligaanngitsunimik pineqaatissiisoqarnerup saniatigut pineqaatissiissut Nunatsinni sukaganerpaaq.
Eqqartuussisoqarfik Sermersuumi nunatsinni ikiaroornartulerinermik ukiorpassuit ingerlaneranni suliat pingaarnersaanni Sermitsiaq malinnaassalluni piareerpoq. Kokainimut tunngatillugu suliani annerpaasoq ilimanarpoq. Suliaq pillugu ilimannittut qaaqquneqartut arlallit ataasinngornermi tusarfigissavagut.
Unnerluussisussaatitaasup pineqartoq, uani S-imik taasarput, ukiuni qulini pineqaatissinneqarsimasunut inissiisarfimmiittussanngortinneqassasoq piumasaraa. Killiligaanngitsunimik pineqaatissiisoqarnerup saniatigut pineqaatissiissut Nunatsinni sukaganerpaaq.
S Danmarkimi inunngorpoq Asiamilu naggueqarluni, tigusarineqarnissanilu sioqqullugu ukiumik ataatsimik marlunnilluunniit sioqqullugu Kalaallit Nunaannukarsimavoq.
Kokainimik anngiortumik eqqussuinerit marluk siorna qaammatip ataatsip ingerlanerani iluatsinngitsut S-ip pilersaarusiorsimagai imaluunniit aaqqissuusimagai unnerluussisussaatitaasut uppernarsiniarsaraat. Kangerlussuaq Nunatsinnut pingaarnertut isaaviugallarmat - pinerluttunut aamma.
Anngiortumik eqqussuisut marluk unitsinneqartut eqqartuunneqarlutillu
Arnaq 209 graminik kokainimik iioraasimasoq Kangerlussuarmi ilanngaaserisuniit 2024-mi maajip 25-ani unitsinneqarpoq. Angut 167,5 gram kokainimik iioraasimasoq 2024-mi juunip 17-iani aamma unitsinneqarpoq. Marluullutik ukiuni sisamani affarmilu pineqaatissinneqarsimasunut inissiisarfimmiittussanngorlugit eqqartuunneqarput.
Eqqusseriarnerni taakkunani S aaqqissuussisuusoq unnerluussisussaatitaasoq isumaqarpoq, tamannalu ilumoorpat S timmisartumut ilanngikkaluarluni eqqussuinermi suleqataasutut pineqaatissinneqassaaq.
S-ip anngiortumik eqqussuisut marluk taakkua nalunngisarigai tallimanngormat eqqartuussinermi paasinarsivoq. Arnaq eqqusseriaraluarnikoq Nuummi imerniartarfimmi Daddysimi naapeqqaarsimavaa.
S-ip taakku marluk nalunngisaralugit uppernarsarpaa. Angut anngiortumik eqqussisoq Kalaallit Nunaannut tikeraarnini pillugu allaffigisimavaa, pinerlunneranulli peqataasimannginnini aalajangiusimavaa.
Ateq eqqunngitsoq atorlugu angalasoq
S Aasianniit Ilulissaniillu angalatilluni Kangerlussuarmi 2024-mi juunip 28-ani aamma unitsitaavoq. Ateq eqqunngitsoq atorlugu timmisartumi Kangerlussualiarsimavoq, angutillu allap anngiortumik eqqusseriaraluartup allaaserisami siusinnerusukkut eqqartukkatta akiliutaa atorlugu. S-i taamatut angalasimanini nassuerutigaa.
S-ip siusinnerusukkut pineqaatissinneqarnikuunerminit qaammatit pingasut suli amigaatigigamigit, oqartussanit paasisaarusunnginnami, taamatut angalasimalluni oqaluttuaraa.
S Nuummi najugaqarfimmi ikiaroornartumik cannabisimik annertunngitsumik naatitseqataasimasutut siusinnerusukkut unnerluutigineqarpoq. Suliamilu tassani inummut N-imik taasatsinnik kokainimi 112 gramimik tunniussisimasut.
N kokainimik 112 gramimik paarisaqartutut nuliassaminullu tarnikkut nakuusersimasutut sioorasaarisimasutullu unnerluunneqarpoq. Tarnikkut nakuuserneq pinerluttulerinermut inatsimmi nutaajuvoq, N-ilu Nunatsinni siullersaalluni tanna tunngavigalugu pineqaatissinneqarsinnaalluni. N ukiuni sisamani pineqaatissinneqarsimasunut inissiisarfimmiittassanngortinneqarnissaa unnerluussisussaatitaasup kissaatigaa.
Politiit immikkut suliaqartuisa Romeomik taaguutillit 2024-mi tigusaraat. Taakku immikkut sungiusarsimasuupput pisuni immikkuullarissuni orniguttartut.
N kokainimik paarisaqarsimanini nassuerutigaa. 30 gramiinnaanerarlugilli nammineq pissani.
S N-ilu attaveqarnerat ilungersunartuusoq eqqartuussinerup ingerlanerani paasivarput. N S-imut kokainisisimanerarpoq. N Nuummi pineqaatissinneqarsimasunut inissiisarfimmiilereersoq S-ip allaffigisimavaa. N-ip sioorasaarutitut taanna paasivaa. N-ip politiinut oqaaseqaatai S-ip sunnerniarsimagai unnerluussisussaatitaasup ilimagaa.
Eqqartuussinermi suli qulaajagassaqartoq
Eqqartuussisoqarfik Sermersuumi ulluni tulliuttuni apeqqutit soqutiginartut akissutisineqartussaapput.
Assersuutigalugu:
2024-mi anngiortumik eqqussisimasutut pineqaatissinneqarnikut kokainit kiminngaanniit pissarsiarisimanerlugu oqaatigineqassanerpa? Unnerluussisussaatitaasoq S-ip N-imut kokainimik annertuumik sooq tunniusissimasorivaa? Qanoq ililluni uppernarsarniarpaa?
S-imuna siusinnerusukkut pineqaatissinneqarnikuunini suli naammassinngisaa suusoq? Nuummi canabisit naatinneqarnerini suliami susoqarsimasoruna? Nunatsinni tarnikkut nakuusertoqarsimaneranut pineqaatissiineq siulleq pissava?
S-ilu ikiaaroornartulerisimasutut toqutsisoqarsimaneranut pineqaatissiisoqartarneranit sakkortunerusumik pineqaatissinneqassava?
Ulluni tulliuttuni taakku akissutisissavagut. Ataasinngornermi sukaallugu aallarteriissaagut, tassanimi pisumut ilisimannittut soqutiginartut arlallit aggersarneqarnikuupput.
