KL

DK

Kommune Kujallermi angerlarsimaffeqanngitsunut kialaarfik nutaaq

Angerlarsimaffeqanngitsut kialaarfissaqalerput. Decembarip aallaqqaataa aallarnerfigalugu Kommune Kujalleq Naalakkersuisut suleqatigalugit Qaqortumi kialaarfimmik nutaamik pilersitsivoq, taama  Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik tusagassiuutitigut nalunaarummi paasissutissiivoq.

Tôrtia Reimer-Johansen
Journalist
Offentliggjort

KIALAARFIUP SIUNERTARAA

  • Tunngaviusumik pisariaqartitat naammassissallugit, soorlu nerisassat, uffarneq, qasuersaarneq, isumassorneqarneq, sulisunik atuisunillu allanik allamik saaffissaqanngitsunik oqaloqateqarneq.
  • Ulluinnarni piginnaasassat pillugit siunnersuineq ilitsersuinerlu.
  • Pisortat aaqqissuussaannut attaviliisoq: Kommunip sullissisuinut innuttaasunik sumiiffii malillugit naapitsisartunut, akerlianik innuttaasut kommunip allaffianukanngikkaluarlutik (tarnip pissusaannik ilisimasallit, inunnik siunnersortit il.il.)
  • Atoqqitassanngorlugit iluarsaassinermik suliassat pillugit sammisaqartitsinermut neqeroorusiorneq.
  • Kajumissutsimik sulineq sulisut piukkunnarluartunit ikorfartorneqartoq aqunneqartorlu ilanngutitillugu (atuisut isaannik isigalugu pitsaassuseq).
  • Angerlarsimaffeqanngitsut eqimattat mianernartut toqqissisimasumik eqqissisimaffeqarnissaat.
  • Sumiiffinni atornerluinermik sullissinermut suleqataaffissaq.
  • Inooqatigiinnermik ilaalersitsisumillu sammisaqartitsinerit neqeroorutigalugit soorlu umiatsiamik angalanerit
  • Ujartuilluni sulineq ammasumillu siunnersuineq.

Kialaarfik innuttaasunut angerlarsimaffeqanngitsunut neqeroorutaavoq, tunngaviusumik pisariaqartitat naammassineqarnissaannut periarfissaqalerluni, soorlu nerisassat, uffarneq, qasuersaarneq, isumassorneqarneq, sulisunik atuisunillu allanik oqaloqateqarneq, taama  Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik ilisimatitsivoq.

Naalakkersuisut Angerlarsimaffeqanngitsunut Periusissiaannut ilaatillugu, Qaqortumi kialaarfimmik nutaamik pilersitsineq Naalakkersuisut tapiissuteqarfigaat. Naalakkersuisut suliniut 2024-mi 750.000 kr-inik tapiissuteqarfigaat aamma 2025-mi suliniut suli tapiiffigineqassasoq naatsorsuutigineqarluni.

Kommunini angerlarsimaffeqanngitsunut suliniutit arlallit ilagaat kialaarfeqarneq, angerlarsimaffeqanngitsunut suliniutit nukittorsarnissaannik siunertaqartoq.

Qaqortumi kialaarfiup siunertaraa pisortani aaqqissuussamut attaviliiniissaq, innuttaasut atugarliortut sumiiffii malillugit sullissisunit naapinneqarnissaat immikkut ittumik ukkatarineqassalluni.

Kialaarfik tassaassaaq pisortanut aaqqissuussamut aallaavittut atorneqartussaq, innuttaasut pillugit sulineq tamakkiisumik sammiveqartoq. Atornerluinermik ajornartorsiutit, angerlarsimaffeqannginneq, suliffissaaleqineq imaluunniit allatut ajornartorsiuteqarneq kommunip innuttaasullu akornanni suleqatigiinnikkut isiginiarneqassapput ataatsimoortumillu suliarineqassallutik.

- Naalakkersuisut Kommune Kujalleq angerlarsimaffeqanngitsut pillugit sulineranut tapiissuteqarnermut assut nuannaarput. Aalajangiisuulluinnarpoq, innuttaasut atugarliortut pillugit kommunit tamakkiisumik sammivilimmik sulinissaat. Kialaarfik tassaavoq atugarliortunut neqeroorut pitsaasoq, atugarliortut takkutiinnarsinnaallutik eqqissisimaarniarlutik kialaariartorlutik, peqatigalugu kommunip sullissisui ikiuinissamut piareeqqasut, Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane oqaaseqarpoq, nangillunilu:

- Pingaaruteqarluinnarpoq kommunit atugarliortunut assingusumik neqerooruteqartalernissaat, innuttaasut sullissisut suliffeqarfiillu akornanni uteqattaartinneqannginnissaat pissutigalugu. Atugarliortut saaffigisassaqassapput pitsaasumillu ilitsersuunneqarlutik. Maannakkut atugarliortut Kommune Kujallermi taamaaliorsinnaalerput.

Kommune Kujallermi borgmesteri, Stine Egede (IA) isumaqataavoq:

 - Kommunitta angerlarsimaffeqanngitsunik ajornartorsiuteqarneq assut ilungersuuppaa. Kialaarfiup nutaap innuttaasut naligalugit naapinnissaannut minnerunngitsumillu sapinngisaq malillugu pitsaanerpaamik ikiornissaannut periarfissippaatigut. Kommunip Naalakkersuisut tapiissuteqarnerat assut nuannaarutigaa, aamma suliniutivut nukittorsarnissaanut piareersimavugut.

Qaqortumi kialaarfimmik pilersitsinissamut aningaasaliisoqarpoq. Kialaarfik tassaassaaq sumiiffinnik ujartuiffissaq aamma angerlarsimaffeqanngitsut kommunillu akornanni attaveqarfissaq.

Aningaasaliissutit kommunip iniutaanik allanngortiterineq aqqutigalugu neqerooruteqarnerup pilersinneqarnera kiisalu sulisunut, kialaarfimmik ulluinnarni ingerlatsisussanut, akissarsianut aningaasartuutit matussusissavai.

inuiaqatigiit samfund

ATORFIIT Se alle jobs

Powered by Labrador CMS