KL

DK

Kommune Qeqertalimmi borgmesteri: – Ukioq 2024 pisoqarfiusimaqisoq naavoq

Ukiumut nutaamut, kommunimut Inatsisartunullu qinersiviusussamut iserpugut. Kommune Qeqertalik aningaasaqarnikkut isumannaatsoq, aningaasaateqarfik sanaartugassanik ukiunut tulliuttunut isumannaarinniffiusimasoq, minnerunngitsumillu meeqqat inuusuttuaqqanik ilaqutariinnillu pitsaanerusumik sullissinissamut sakkussaqarlualersimasoq tullissanut ingerlateqqissinnaagamigit, borgmesterip nuannaarutiginerarpaa.

Tôrtia Reimer-Johansen
Journalist
Offentliggjort

Borgmesteri, Ane Hansen ukiortaami oqalugiaammini kommunimi kommunalbestyrelsimi qinigaaffimmi suliniutigisimasatik eqqaavai.

Ilaatigut utoqqarnut sullissinermi siuariartorfiusoq, innuttaasunut innarluutilinnut atukkatigut siuariartorfiusoq, akileraarummik appaaneq, inuussutissarsiortunik siuarsaaffigiuminarsaaneq, siunertanillu nutaanik siunniussaqarfiusoq soorlu takornariartitsineq eqqarsaatigalugu oqalugiarnermini oqaatigaa.

-  Suliassat kajuminnartut tullissatsinnut pitsaasumik aallartiffigineqarsinnaasut ingerlateqqissinnaagakkit nuannaarutigeqaara.

Teknologip ineriartorneranut malinnaaniapiloorneq

Ane Hansenip oqaluttuaraa teknologip ineriartorneranut kommunimi innuttaasut malinnaaniapiloorsimasut. 

-  Teknologi aqqutigalugu ineriartorneq pitsaasorpassuaqaraluartoq allannguuterpassuarnut malinnaaniapiloorneq inuppassuit akornanni aamma misigineqarput. Sungiusimasagut soorlu allakkeriveqarneq, Nukissiorfiit, aningaaseriveqarnikkut piumasaqaatit sukaterneqarnerat, angallannikkut bilitsisiniartarfiit qarasaasiamik taarserneqartut inuppassuarnik malinnaaniapiloortitsipput, innuttaasullu ilaannik allannguuterpassuit sunniunniapiloorneqarlutik, allannguutit qarasaasiaq aqqutigalugu ingerlanneqartut ataatsikkut ingerlanneqartut amerlangaarmata inuunitsinnut sunniuteqarput.

-  Aamma pisortaqarfinni arlalinnik qarasaasiap ineriartornerani atortussiat ilaasa torrallataanngitsumik suliarineqarneri pissutigalugit arlalinnik misillerfigisarpugut soorlu inunnik isumaginninnermut inatsisiliat kingulliit suliffissarsiornermut tungasut qarasaasiami atortussiat pitsaasuunnginneri kommunini sulisutsinnut uangutsinnullumi assoroortitsisimaqaat sulilu iluarsivinneqaratik.

Naak unamminarsimagaluartoq ineriartornermut malinnaallualersimanerarput.

Ane Hansenip oqalugiaammini naggasiigami  neriuutiginerarpaa inuit nutaat amerlasuut qineqqusaarumaartut:

-  Innuttaasut qinersinikkut sunniuteqaqataasinnaanersi suleqataarusunnersilu atorluarisiuk aamma neriuppunga inuit nutaat amerlasuut qinigassatta akornanniikkumaartut, nukiit nutaat siunniussat nutaat ineriartornermi nutaaliaasumi pisariaqartittuaannarpagut, sassartaarluarisilu.

inuiaqatigiit ane hansen kommune qeqertalik nytårstale samfund

ATORFIIT Se alle jobs

Powered by Labrador CMS