KL

DK

Kommuni sipaarniuteqangaassaaq

Kommune Kujalleq aningaasaqarnermik iluarseeqqinnissamut pilersaarusiamut atatillugu 2025-mi atuinini 45-50 millionit koruuninik annikillissavaa. 2026-mi sipaarniuteqaqqittoqassaaq.

- Maanna pisut aqunnialissavavut suliassaralu pingaarnerpaaq maanna tassaalerpoq kommunip aningaasaqarnera erseqqissumik qulaajassallugu, kiisalu naatsorsuutit 2022 aamma 2023-mut ukioq manna akuerineqartissallugit, taamaalillutik kommunalbestyrelsit nutaat kommunip aningaasaqarnerata qanoq issusianik takunnissinnaallualerniassammata, Stine Egede oqarpoq
Thomas Munk Veirum
Tusagassiortoq
Saqqummersinneqarpoq

Kommune Kujallermi aningaasaqarneq ilungersunartorujussuuvoq, maannalu tigoriaannagassanik 100 millionit koruuninik qaffaanerup akuerineqarnissaanik qulakkeerinnittussaq aningaasaqarnermik iluarseeqqinnissamut pilersaarusiaq annertooq kommunalbestyrelsip akueraa.

Taarsigassarsinissaq Naalakkersuisunit akuerineqaqqaartariaqartoq, taarsigassarsiallu ukiut tallimat ingerlaneranni akilerneqassasut piumasaqaatigineqartoq, kommuni tusagassiuutinut nalunaarummi allappoq.

Kommunep ukiumut 35-40 millionit koruuninik sinneqartooruteqarfiusunik missingersuusiornissaanik tamanna isumaqarpoq, tassa ingerlatsinermut aningaasartuutini 2024-mi atuinermit 2025-mut missingersuutini ingerlatsinermut aningaasartuutit 45-50 millionit koruuninik appartinneqassapput.

Tamatuma saniatigut ukiuni 2026-mit 2030-mut tigoriaanagassatut atorallakkanik akilersuinissamut ukiumut 20 millionit koruunit nassaarineqartassallutik, kommune allappoq.

Borgmesteri: Aningaasarpassuit sipaarneqassapput

Septembarimi atorfinitsitsinerit pisiarnerillu unitsikkallarneqareersullu kommuni taama nalunaaruteqarpoq, tamannali naammanngilaq.

Ukioq manna siusinnerusukkut paasineqarpoq kommuni 40 millionit koruuninik akileraarutinut A-nut akiliisimanngitsoq, taamaalillunilu aningaasat allanut atorneqarsimammata kommunillu karsiani aningaasat amigaatigineqarmata, kommune akiitsoqangaalersimavoq. Tamatuma saniatigut kommuni isumaginninnermut aningaasartuuteqarnerulersimavoq, Qaqortumilu sulisunut inissianik pisisariaqarsimalluni.

Aningaasaqarnermik iluarseeqqinnissamut pilersaarusiap akuerineqarnera nuannaarutigalugulu eqqissiallaatigalugu, borgmesteri Stine Egede oqarpoq:

- Ataatsimoorluta kommunip aningaasaqarneranik aaqqiiniaqatigiinnissarput pingaaruteqarpoq. Aningaasarparujussuit pineqarput, taakkulu angalanermut, meeqqanik inissiinermut pisiniarnermullu missingersuutinik appaanikkut ileqqaarutigineqassapput, kiisalu akissarsiatigut ileqqaarniartoqassalluni.

- Aaqqiissutissatut siunnersuummik sutigut tamatigut pisariillisaasoqarsinnaaneranik takutitsisumik saqqummiivigineqarpugut, borgmesteri oqarpoq.

Takunnissinnaallualerniarneq ilungersuutaasoq

Borgmesteri nangilluni oqarpoq akiitsoqarneq unnuap ingerlanerani pinngitsoq:

- Akiitsoqarnitsigut inissisimanerput 2021-mili ilisimareersimasuugutsigu, aningaasaqarnermillu aqutsissummut nutaamut ikaarsaarnerput iluatsilluarnerusimasuugutsigu, qularinngilara ullumikkut taama inississimalersimanavianngikkaluartugut. 

- Maanna pisut aqunnialissavavut suliassaralu pingaarnerpaaq maanna tassaalerpoq kommunip aningaasaqarnera erseqqissumik qulaajassallugu, kiisalu naatsorsuutit 2022 aamma 2023-mut ukioq manna akuerineqartissallugit, taamaalillutik kommunalbestyrelsit nutaat kommunip aningaasaqarnerata qanoq issusianik takunnissinnaallualerniassammata, Stine Egede oqarpoq.

samfund kassekredit inuiaqatigiit økonomi genopretningsplan borgmester stine egede kommune kujalleq

ATORFIIT Se alle jobs

Powered by Labrador CMS