Kommunimi soraarniuterpassuit: Atugarissaarnermut immikkoortortaqarfik sulisunik amigartoq
Qeqqata Kommuniani Atugarissaarnermut Immikkoortortaqarfimmi qaammatip matuma naanerani sulisut amigalissapput. Atugarissaarnermut pisortaanerup, Paneeraq Olsenip Sermitsiamut uppernarsarpaa isumaginninnermut siunnersortit arlallit atorfimminnit soraarniuteqarsimasut.
Asseq toqqorsivimmit: Leiff Josefsen
Meeqqanut, pingaartumik angerlarsimaffiup avataani inissisimasunik sullissisunut sunngiuteqangaatsiassasoq, Atugarissaarnermut pisortaaneq, Paneeraq Olsen ilisimatitsivoq:
- Sulinnaarnerit soorunami tamarmik peqquteqarput, ilinniaqqinnermik, qitornat ilinniaqqinnissaat pingaartillugu allamut nuuttut kiisalu allamik misileerusunermik peqquteqartumik.
Soraarniuteqartuni atorfiit ilaatigut makkuupput; angerlarsimaffimmi ikiortit ningiuat, immikkoortortami sullissisoq, atugarissaarnermi immikkoortortaqarfimmi pisortaq kiisalu meeqqanut inunnik isumaginninnermi siunnersortit pingasut.
Atugarissaarnermut pisortaanerup Sermitsiamut paasissutissiissutigaa atorfillit inuttaaruttut pillugit aaqqiiffiginiarlugit sulissuteqarlutik. Ilaatigut allaffiup iluani sulisunik nikisiterisinnaaneq taartaasussanillu sulisoqarsinnaanissaq eqqarsaatigineqarluni.
- Sulisut taarserneqarnissaata tungaanut meeqqanut pingaartumik angerlarsimaffiup avataani inissisimasunik sullissisunut sunniuteqangaatsiassaaq, sulisut pingasut soraartussaammata, Paneeraq Olsen oqarpoq.
