Kommunimut qinigassanngortittut pingasut Nuummi ineriartorneq sammigaat

Atassummeersoq Nikolaj Rosing, Nuummi Inuit Ataqatigiit immikkoortortaqarfianni siulittaasoq Ludvig Larsen aamma Siumut Nuummi immikkoortortaqarfiani siulittaasoq Jørgen Wæver Johansen Kommuneqarfik Sermersuumi kommunalbestyrelsimut qinigassanngortittut eqqarsaataat, takorluugaat partiillu inuussutissarsiornermut politikkiat tusarnaarniarlugit Nuummi Sulisitsisut tallimanngormat unnukkut ataatsimiinneranni peqataapput.

- Mittarfittaaq atulersimavoq, takornariartitsisartullu aasaru nalinginnaasumiit ulapinnerussasut naatsorsuutigineqarpoq.

- Takornariartitsinermut inatsit nutaaq aamma atuutilerpoq, kisianni inatsit nutarterneqarsinnaaqqullugu ingerlaavartumik oqaloqatiginnittarnissarput qulakkeertariaqarparput. Takornariartitsineq siunissami inuussutissarsiutit pingaarnerit ilagilissavaat. Naatsumik oqaatigalugu, Nuummi inuussutissarsiorneq ingerlalluarpat nunamut tamarmut iluaqutaassaaq, taamaammallu Nuummi ineriartorneq qulakkeerneqassaaq, Ludvig Larsen (IA) oqarpoq.

Taassuma aamma aallarnisaaneq oqaluuseralugulu namminersortut pisortallu suleqatigiinnerulernissaat kissaatigaa. Aammattaaq inissaaleqineq, ukiut 15-it tikillugit utaqqisoqarsinnaasartoq, aaqqiiffigisariaqartoq erseqqissarpaa.

Kommuni siulliulluni iliuuseqarniartuusoq

Jørgen Wæver Johansenip, Siumumeersup, ullumikkut namminersorluni inuussutissarsiuteqartup, kommuni siulliulluni iliuuseqarniartuusoq maqaasivaa.

- Inuttut inuussutissarsiortutullu maqaasinerpaasara tassaavoq kommunip pisariaqartunik suleqatigiinnermik pilersitsinissamut nammineq iliuuseqartarnissaa, taamaalilluta tamatta ineriartornermik inuiaqatigiinnilu naleqarnerulernermik pilersitseqataasinnaaniassagatta, oqarpoq.

Nuuk Kalaallit Nunaanni ineriartornermi assortuussutigineqanngilluinnartumik qitiusutut isigaa.

- Nuuk, tamatta ilisimasatsituut, Kalaallit Nunaanni inuussutissarsiornikkut qitiulluinnarpoq – Kalaallit Nunaanni ineriartornermut ingerlatitseqqittuuvoq illoqarfiillu annersaraat. Suleqatigiilluarutta takornariartitsinermi, aalisakkanik inuussutissanillu suliareqqiinermi, takornariarfissanik ineriartortitsinermi, aatsitassarsiornermi nukissiuutinillu nutaanik atuinermut periarfissarpassuaqarpoq, tassanilu aamma tunisassiornissamut periarfissat qanoq iluaqutiginerpaasinnaanerlugit qanorlu kinguneqassanersut paasiniassavagut, Jørgen Wæver Johansen oqarpoq. 

Akunnittarfiliortut

Atassummiit Nikolaj Rosingip Nuummi attaveqaasersuutit pitsaanerusut ineriartortinnissaat akunnittarfimmillu sanaartornissaq sulissutiginiarpai.

- Atassutip attaveqaasersuutit samminerujumavai. Aqqusinermi biilit amerlasarnerinik unammilligassaqarpugut, sullorsuarlu ukiualuit matuma siornali allilerneqartussaq suli allilerneqanngilaq. Maanna mittarfissuaqaleratta tamanna aaqqittariaqarparput. Takornariaqarneq inuussutigisariaqarparput, taamaammat inuit apuussinnaannginnerat iluaqutaanavianngilaq.

- - Aamma tikeraat unnuiffissaqarniassammata akunnittarfiliortoqarnissaa qulakkeertariaqarparput. Aamma arlallit ukiut marluk missaanni akunnittarfiliornissamut nunaminertamik pissarsinissartik utaqqisimagaat nalunngilarput, Nikolaj Rosing oqarpoq.

Taassumattaaq Royal Greenlandimi sulisut qullersaqarfimmi sulisunut inissialiornissaq kiisalu ilaqutariit meerartallit atugaat pitsanngorsarniarlugit sulisut amerlanerusut attatiinnarnissaat qulakkeerniarpaa.

- Meeqqeriviit, atuarfiit peqqinnissaqarfiillu ingerlalluarnissaat qulakkeertariaqarparput. Ingerlalluanngippata ilaqutariit illoqarfimmi ingerlalluarnissartik ajornakusoortissavaat, pingaartumik perorsaasunik ilinniartitsisunillu amigaateqartoqartillugu. Tamanna pitsaanerusumik iliuuseqarfigisariaqarparput, tamannalu Atassummit sulissutigissavarput, Nikolaj Rosing oqarpoq.

Demokraatit Naleqqallu peqataasussatut naatsorsuutigineqaraluartut sisamanngornermi unnukkut ataatsimiinnermi peqataanngillat.

Inuussutissarsiornermut siunnersuisoqatigiit ingerlanngitsut

Kommuneqarfik Sermersuumi inuussutissarsiornermut siunnersuisoqatigiit pitsaanerpaamik ingerlanngitsoq Nuummi Sulisitsisut oqarput, taakkulu qinigassanngortittut qanoq ilillutik Nuummi inuussutissarsiortut peqataatinneqarnissaat qulakkeerniarneraat paaserusuppaat.

- Inuussutissarsiorneq ukiuni kingullerni unittoorsimavoq, Nuummi Inuit Ataqatigiinneersoq Ludvig Larsen, siunnersuisooqatigiinni aallaqqaataaniilli ilaasortaasoq, nassuerpoq.

- Aallarnisaasut aporfissaqaraangamik suliniutiminnik unitsitsisartut suli naammattoortaratsigit siunnersuisoqatigiinnik aallarnisaasunut pitsaanerusumik siunnersuisinnaasunik pisariaqartitsivugut. Takornariat amerlanerusut illoqarfimmut tikittarnissaat naatsorsuutigineqarpoq, kisiannili takornarialerisut takornarianillu kiffartuussisussat suli naammanngimmata, kiisalu akunnittarfiit amigaataammata inuussutissarsiornermut siunnersuisoqatigiit uummarissarneqaqqinnissaat pisariaqartipparput, Ludvig Larsen (IA) oqarpoq.

Jørgen Wæver Johansen (S) nutaamik aallartikkusuppoq.

- Aallarteqqittariaqarpugut. Illoqarfiit pingaarnersaanni nunatsinni inuussutissarsiortut amerlanerpaaffianni inuussutissarsiornermut siunnersuisooqatigiit unittooqqammata kommunimik suleqateqarneq unittooqqassasoq ilumoorsinnaanngilaq. Tamatta eqqorneqarpugut, aallartitseqqittariaqarpugullu. Nutaamik mittarfittaarpugut, kisianni akunnittarfiliortoqanngilaq, kommunilu inuussutissarsiortullu suleqatigiilluarsimasuuppata ineriartorneq angusimasinnaagaluarput angusinnaasimanngilarput, Jørgen Wæver Johansen oqarpoq.

Nuuk Arctic Circle Businessitut, Qeqertalimmi Inuussutissarsiornermut Siunnersuisoqatigiittut imaluunniit Innovation South Greenlandimut assingusumik inuussutissarsiornermut siunnersuisooqatigeeqartariaqarpoq taanna isumaqarpoq.

Atassummeersup Nikolaj Rosingip inuussutissarsiornermut siunnersuisooqatigiinni ataqatigiissaarisoqarnissaa qulakkeerniarpaa.

- Ippassaq qaaqqusissut tigugakku Nuummi inuussutissarsiornermut siunnersuisooqatigeeqartoq aatsaat paasivara. Tamanna alianarpoq. Nittartagaq iserfigigakku ilaasortat 17-iupput, taavali nalunngisama ilaat ukiut marluk sinnerlugit ataatsimiigiarnissamut aggersagaasimanngitsoq paasivara. Tamanna nukissanik atorluaannginneruvoq. Tamanut piffissaajaataavoq. Nukiit pitsaanerusumik atortariaqarpavut. Inuussutissarsiornermut siunnersuisooqatigiinnik ataqatigiissaarisulinnik peqarneq silatusaarneruvoq, kisianni aamma imaqarniliaqanngimmat suut oqaluuserineqarnersut imaluunniit inuussutissarsiortut politikkerillu sunik kissaateqarnersut takusinnaanngilarput. Taama pisoqarnera alianaqaaq. Kissaatigaara ingerlaqqissasoq, taamaammat kikkut tamarmik peqataanissamut periarfissaqarniassammata ataatsimiigiaqqusisartumik ataqatigiissaarisoqassaagut, Nikolaj Rosing oqarpoq.

Qineqqusaartut pingasut kommunalbestyrelsimut ilaasortanngorunik inuussutissarsiortunik qaninnerusumik suleqateqarnissartik tamarmik isumaqatigiissutigaat, taamatuttaarlu kommunip inuussutissarsiortunut attartortittakkat pillugit sulianik suliarinninnerani piffissaq qanoq atsigisoq atortarneraa oqallisigineqarpoq.