KOMMUNE KUJALLEQ PILLUGU EQQARTUUSSINEQ
Akileraartarnermut tunngatillugu suliami uissuumminartumi Kommune Kujalleq ingasattumik sumiginnaasutut taamaammat eqqartuunneqarpoq
Aningaasaqarnermut aaqqissuussineq nutaaq Akileraartarnermullu Aqutsisoqarfimmit akileeqqusisoqarsimannginnera Kommune Kujallermut suliami utoqqatsissutaanngillat, Kalaallit Nunaanni Eqqartuussivik Kommune Kujalleq pillugu aalajangerpoq. Eqqartuussivilli qajassuussinissamut peqqutissaqarpoq.
Kommune Kujalleq akileraartarnermut aqutsisoqarfimmut 4 million koruuninik akiliisussanngortinneqarpoq.
Assi: Trine Juncher Jørgensen
Kalaallit Nunaanni Eqqartuussiviup Kommune Kujalliup 2023-mi aamma 2024-mi qaammatini qulini akileraarutit A-t piffissaq eqqorlugu akilinngitsoorsimammagit qaammatinilu pingasuni akiliisimanngilluinnarsimammat ingasattumik sumiginnaasutut pisuutillugu eqqartuuppaa.
Taamaammat akileraartarnermut aqutsisoqarfimmit 4.000.000 koruuninik akiligassinneqarput.
Tamanna eqqartuussummi Sermitsiap takusinnaasaani atuarneqarsinnaavoq.
Kommune Kujallermi kukkunerit isertuunneqarsimasut katersorsimasullu pissutigalugit aaqqissuussinerit, aningaasaqarneq akiliinerillu, ilaatigut akileraarutit A-t suliffeqarnermullu akitsuutit, pillugit paasissutissanik naammattumik peqannginneq eqqartuussiviup aalajangiinermini tunngavigaa.
Kommuni 2021-mi aningaasaqarnermut nutaamik aaqqissuussamik atulersimasoq, tamannalu pitsaanerpaamik ingerlasimananilu aningaasaqarnermik nakkutigiuminaatsitsilersimasoq ilisimannittut arlallit eqqartuussivimmi apriilip 21-ani oqaluttuarput. Siunnersortittaaq avataaneersoq naapertorlugu kommunimi piginnaasalinnik amigaateqartoqarsimavoq.
Eqqartuussivilli naapertorlugu tamanna utoqqatsissutissatut isigineqarsinnaanngilaq.
Nammineerlutik Akileraartarnermut Aqutsisoqarfimmut nalunaaruteqartut
Kommune Kujalleq piffissaq eqqorlugu akiliisimanngitsoq, taamaammallu akiligassat akilerneqarnissaat nukingisaarneqarsimanngitsoq Akileraartarnermut Aqutsisoqarfiup nammineq paasisimanngikkaa ilisimannittut aamma oqaluttuarput.
Tamannali aamma utoqqatsissutaanngilaq, akileraartussammi akileraarutinut tunngatillugu pisussaaffimminnik ilisimaarinninnissaq taakkualu eqqortinnissaat namminneq akisussaaffigaat.
Unnerluussisussaatitaasup Akileraartarnermut Aqutsisoqarfik sinnerlugu 6,1 million koruuninik akiligassinneqarnissaat piumasaraa, tassa akiligassat 1,5 procentii.
Akiligassiissulli 4 millionit koruuninut appartinneqartariaqartoq eqqartuussiviup aalajangerpaa.
Kommune Kujalliummi Akileraartarnermut Aqutsisoqarfimmut nammineerluni nalunaaruteqarsimanera eqqartuussiviup qajassuussinittamut peqqutissatut isigaa.
Kommune Kujalliup taarsigassarsisimanera 2025-milu upernaakkut akiitsut tamarmik erniaqartillugit akiliinera saammaassinertut aamma isigineqarpoq.
Suliamut aningaasartuutit Naalagaaffiup akilissagai
Kommune Kujalleq suliami aningaasartuutinik akiliissasoq unnerluussisussaatitaasut aamma piumasaraat – naalagaaffiup karsia nalinginnaasumik akiliisaraluarpoq, kisianni tamanna kommunip akisussaaffigisariaqaraa unnerluussisussaatitaasoq Kristian Buskov Nierhoff isumaqarpoq.
- Ukiorpassuarni sianilluanngitsumik iliorsimapput, maannalu akisussaaffimmik tigusiumanatik inuiaqatigiit aningaasaataat suli amerlanerusut atorlugit eqqartuussivimmut suliassanngortitsiput, taanna eqqartuussivimmi inaarutaasumik oqaaseqarnermini oqarpoq.
Kisiannili Kalaallit Nunaanni Eqqartuussiviup tunngaviusumik aalajangiinermit allaanerusumik aalajangernissaminut immikkut ittumik pissuteqartoqanngitsoq paasigamiuk naalagaaffik suliami aningaasartuutinik akiliisussanngortippaa.
