Politeeq isallugulu kiigaa – parnaarussaassanngilarli

Arnap politeeq isappaa, taamaakkaluartorli pinerloqqikkuni taamaallaat parnaarussaassasoq, Kalaallit Nunaata Eqqartuussivia nalinginnaanngitsumik aalajangiivoq.

Eqqartuussaanissaq sivisuumik utaqqissagaanni pineqaatissiissummi annikilliliivigineqarneq pisinnaasoq Nunatta Eqqartuussiviata aalajangernerata uuma takutippaa.

Assi: Morten Okkels

Morten Okkels Morten Okkels Tusagassiortoq

Saqqummersinneqarpoq 3. Maaji 2026 - 13:54

Annonse

Politiinut persuttaaneq nalinginnaasumik inuup persutaasup pinngitsoornani parnaarunneqarneranik kinguneqartinneqartaraluarpoq. Tamatigulli taamaanneq ajortoq, Kalaallit Nunaata Eqqartuussivigata ulloq 25. februar eqqartuussinermini arnamik eqqartuussinermini aalajangiivoq.

Pisoq arfininngornermi juunip pingajuani 2023-mi unnukkut pivoq. Arnaq 30-t sinnerlugit ukiulik Nuummi inissiami fiisteqataavoq. Inuit allat oqaannerannik nalunaarutiginninnermut atatillugu politiit piffimmut takkupput.

Arnap nilliaffigaluni aallartikkaani, alleqqumigullu patikkaani, politeeq eqqartuussivimmi nassuiaavoq. Paffequserniarlugu paffiatigut tigoreeraa arnap tikia kiivaa.

Eqqartuussinermi peqataasut uppernarsarpaat: - Suliassat suliarineqartarnerisa sivisunerat unammilligassaavoq

Arnaq pisunnginnerarpoq. Persuttaasimaneralu uppernarsarneqartoq Sermersuup Eqqartuussivia Nunattalu Eqqartuussivia aalajangiipput, taakkunanilu marlunni ulluni 30-ni parnaarussassanngortinneqarpoq.

Nunattali Eqqartuussiviata pineqaatissiissutip aatsaat pinerloqqinnermi atuutsinneqalernissaa aalajangerpaa. Tamanna suliap sivisuumik ingerlanneqarsimaneranik patsiseqartinneqarpoq, taamaalillunilu tamanna pineqaatissinneqartumut iluaqutinngortinneqarpoq. Sermitsiap siusinnerusukkut sulianik sivisuumik ingerlatsisarnermik ajornartorsiut sammivaa.

Suliami matumani pinerlunnerup pineranit suliap nunatta eqqartuussiviani naammassineqarneranut ukiut marluk affarlu ingerlaqqaarput. Tamannalu ukiumi ataatsimi misilinneqarluni pineqaatissiissutip aatsaat pinerloqqinnermi atortussanngortinneqarnissaanut aalajangiisuuvoq.

Sermitsiap persutaanernik sulianik annikinnerusunik malittarisaqartarnera nalinginnaasuunngilaq, taamaammallu suliap nalinginnaanngitsumik inerniliivigineqarnera aatsaat kingusissukkut paasivarput. Tamannalu februaarip 25-iani eqqartuussinermit maanna suliap allaaserineranut piffissap ingerlaqqaarneranut patsisaavoq.