Kommunip ATV-nut aqqutip affaa atoqqaarfissiorpaa
Qeqqata Kommuniata arfininngormat oktobarip tallimaani Sisimiut Kangerlussuullu akornanni ATV-nut aqqutip affaa siulleq ammarpaa. Tamanna pivoq Nunalerinermut, Imminut Pilersornermut, Nukissiutinut Pilersuinermullu Naalakkersuisoqarfiup akuersineratigut.
Foto: Qeqqata Kommunia
PAASISSUTISSAQQISSUT
ATV-nut aqqummi angallannermi angallannermut inatsit atuuttuusoq Qeqqata Kommunianit erseqqissaatigineqarpoq. ATV-nut aqqutitsigut angallannermi, imaatigut imaluunniit qamuteralannik angallannermituulli arlaliusoqartariaqaraluarpoq.
Taamatuttaarlu oqarasuaatit satellitsikkoortut aamma/imaluunniit in-reach-it nassarneqartariaqaraluarput, taamaalilluni attaviit ajoquserneratigut imaluunniit kinguartoornermi ilaqutaasunut attaveqartoqarsinnaassalluni aammalu ikiortissarsiortoqarsinnaassalluni.
ATV-nut aqqutikkut taamaallaat angallattoqartarnissaa aammalu ATV-nut aqqutip avataatigut angallattoqartannginnissaa Qeqqata Kommunianit erseqqissaatigineqarpoq.
Angallanneq nunakkoorutinik taamaallaat pissaaq, soorlu ATV-t UTV-llu.
ATV-nut aqqutip affaata atoqqaarfissiorneqarnera Qeqqata Kommunianut pingaartuuvoq, aqqutilli sinnera aappaagu aasaru aatsaat ammarneqassaaq.
Aqqusineq 84 kilometerisut takitigisoq siulleq Kangerlussuup eqqaani Kellyvillemiit atuarneqarsinnaavoq, Sisimiulli eqqaani aqqutip sinnerata ammarnissaa 2025-mi aasakkut aatsaat pissaaq.
Tamanna septembarimi imeqarfiup qanittuani aqquserngup qulakkeerneqarnissaanut naatsorsuutiginngisanik unamminartunik nalaataqarnermik patsiseqartoq, Qeqqata Kommunia paasissutissiivoq.
Sisimiuni erngup pitsaassusaata qaffasissuujuarnissaa qulakkeerniarlugu, imeqarfik sinerlugu aqqusinivimmik sinaakkusersukkamik kiisalu pakkersimaartitsisumik kuussinilimmik sanaartortoqassaaq.
- Ajoraluartumik imeqarfik sinerlugu aqqutissiami naatsumi qaqqamik navianaallisaanissamut unamminarsinnaasunik nalaassisoqarsimavoq. Taamaattoqarneranilu unamminartut misissuataarneqarneranni septembarimi sanaartorneq unitsinneqarsimalluni.
Maannakkullu 2024-p sinnerani qaqqamik navianaallisaanermik ingerlatsisoqarnissaa aammalu 2025-mi maajimi juunimilu aqqusinermik naammassiniaanerup ingerlanissaa pilersaarutaavoq, taamaalionikkullu 2025-mi juulip aallaqqaataata missaani aqqusineq ammarneqarsinnaassalluni.
Affaa periarfissagissaartoq
Aqqutip siulliup Kellyvillemiit 84 kilometerisut isorartutigisoq innuttaasunut, piniartunut takornarianullu periarfissagissaartitsivoq:
Illerngit illuarfiusut marluusut 2 km.-isut aammalu 4 km.-isut takitigisut Qorlortumut Tasersuarmullu ingerlaviusuupput. Qorlortumit nunarsuarmioqatigiinnut kingornussassamut Aasivissuarnut pisuttoqarsinnaavoq, qajartortoqarsinnaavoq imaluunniit ukiup qanoq ilinera apeqqutaalluni sisoraartoqarsinnaalluni . Tasersuarmit Itinnermut, Sarfannguanut aammalu Sisimiunut umiatsiarluni ingerlaqqittoqarsinnaavoq. Illerngit illuarfiusut Kellyville-mit 22 km.-inik 24 km.-inillu ungasissuseqartumik inissisimapput, Qeqqata Kommunia allappoq.
Erseqqissaatigineqassaaq imeqarfimmi aqqusinikkut aammalu Sisimiut eqqaani ATV-nik aqqutikkut angallanneq suli inerteqqutaammat. Apisimaleriarpat ukiut siuliitulli imeqarfiup killeqarfiani aqqutissiatigut qamuteralannik angalasinnaaneq periarfissaaqqissaaq.
ATV-nut aqqutip siulliup affaata ammarnissaanut Borgmester Malik Berthelsen Naalakkersuisoq Kalistat Lund-imik atorfilittaanillu suleqateqarneq nuannaarutigaa, aammalu aasaqqippat ATV-nut aqqutip tamarmiusup ammarneqarnissaanut qilanaarluni.
