INNUTTAASUT ILUARISIMAARINNINNERAT PILLUGU MISISSUINEQ
Kommunit ilusilersugaanerannik nalilersuineq aallartinneqartoq
Ataasinngorneq maajip 13-iani innuttaasut iluarisimaarinninnerat pillugu misissuineq annertooq aallartinneqarpoq. Innuttaasut 4.274-it e-Boksikkut apeqqutinik nassiussarsisimapput.
Kommunit kattuffigisimasaata KANUKOKA-p siornatigut kommunit ataatsimoorussatigut sullittarnikuuai. Kisianni 2009-mi kommunit kattunnerisa kingorna, kommunit ataatsimoorussamik kiffartuussinissamut pisariaqartitaat allanngorsimavoq taamaattumillu KANUKOKA juulimi 2018 matuneqarpoq. Maanna kommunit ataatsimoorussamik inatsisilerinermut aningaasaqarnermullu kiffartuussiveqalernikuupput.
Assiliisoqarfik: Kanukoka
Kommunit aaqqissuussaanerannut isummat qanoq ittuua aamma kommunit qanimut oqartussaaqatigiinnermut tunngatillugu sullissinerat pillugu isummat qanoq ittuua?
Innuttaasut 4.274-inik amerlassusillit akornanni misissuinermut atatillugu apeqqutinik nassiussarsisimaguit, taava periarfissaqarputit isummatit oqaatigalugit innuttaasut iluarisimaarinninnerannik misissuinermi apeqqutinut akissuteqarnikkut.
Inuit apeqqutinik nassiussarsisimasut agguataarnerat
Paasissutissiisoq: Naalakkersuisut
Innuttaasut iluarisimaarinninnerat pillugu misissuineq tassaavoq kommunit aaqqissuussaanerannik nalilersuinerup ingerlanneqartup ilaa. Nalilersuineq Inatsisartunut tunniunneqassaaq 2024-mi ukiaanerani ataatsimiinnermi.
Apeqqutinik akisassiorluni misissuineq innuttaasut toqqakkat e-Boks-ianut tunniunneqarpoq ataasinngornermi maajip 13-ani ingerlassallunilu akisut innuttaasut amerlassusaannut sanilliullugu naammagineqalernissaasa tungaanut, taamak ilisimatitsivoq nunami namminermi immikkoortortaqarfimmi pisortaq Brandur F. Karlsson.
Misissuineq sukumiisoq
Tunngaviusumik ilisimatusarnermi ataatsimiititaliaq
Tunngaviusumik ilisimatusarnermi ataatsimiititaliaq:
- Najaaraq Demant-Poort, Ph.d.-studerende, Ilisimatusarfik
- Birger Poppel, emeritus, Ilisimatusarfik
- Kelton Minor, Postdoctoral Research Scientist, Columbia University
- Jørgen Jeremiassen, nunaqarfimmi pisortaq, kommunit kattuffianni toqqarneqarsimasoq
- Per Lyster Pedersen, siunnersorti, Kalaallit Nunaanni Naatsorsueqqissaartarfik
Siunnersuisartoq:
VIVE - Inuiaqatigiinni misissueqqissaarnermut ilisimatusarnermullu qitiusumik ilisimatusarfik
Meeqqerivinnik, atuarfinnik, utoqqaat sullinneqarnerannik, timersornermik, kulturimik sunngiffimmillu sullissinermik, innarluutilinnut sullissinermik kommunit ingerlatsinerat ilaatigut qanoq igineqarnersut tusarniaassutinut ilaapput. Taakkuupput ilaatigut kommuninit ingerlanneqartut pillugit Naalakkersuisut apeqqutinik misissuinermi innuttaasut isummersornissaannik kissaateqarfigisartagaat.
Aammattaaq kommunit sumiiffigisami aammalu nunap immikkoortuani sullissinerat qanoq igineqarnersoq paaserusunneqarpoq, ilanngullugulu paaserusunneqarpoq kommunit katitigaanerat allanngorteqqinneqassappat kingunissaasut ilanngullugit sillimaffigialugillu piareersimaffigineqarnersut.
500-it missaanniittut akissuteqareerput
Soorlu siusinnerusukkut taaneqareersoq, apeqqutinik akissutissiorluni misissuinermut akissuteqarnissamut killigititaqanngilaq. Misissuineq ingerlaannassaaq, akissutit utertinneqartut sumiiffigisameersut innuttaasut aperineqarsimasut akissuteqarsimasullu naammagineqalernissaasa tungaanut.
Maanna tikillugu innuttaasut soqutiginnilluarnerat akissuteqarnissamillu akuersaartumik peqataanerat annertoorujussuusoq takuneqarsinnaavoq, allagaq apeqquterpassuarnik imalik nassiunneqarpoq ataasinngornermi maaji 13-ani, sapaatillu akunneratalu naanerani 500-it missaanniittut akissuteqarlutik immersuipput.
Ullumi marlunngorneq Naalakkersuisut nunami namminermi immikkoortortaqarfianit SMS aqqutigalugu allagaqarput innuttasunut toqqakkanut eqqaasitsissummik, aamma pingajussaaneerluni innuttaasut oqarasuaatikkut attavigineqassapput peqataanissaminnut kaammattorneqarlutik innuttaasut iluarisimaarinninnerat pillugu misissuinermut peqataaqqullugit.
