KL

DK

CAMP KULLOQ

Kullorsuarmi eqqagarpassuit katersorneqarput eqqaaviliaanneqarlutillu

Peqatigiiffik Kalaallit Meerartaat (Foreningen Grønlandske Børn) juulip 15-iani aallartittumik ullumikkullu tallimanngornermi naammassisumik Kullorsuarmi aasaanerani camperneq ingerlappaat. Isikkamik arsaanneq aamma kunngiusaarluni pinnguarnerit, petangue aamma frisbee-mik pinnguarneq ingerlanneqartut ilagaat. Kisianni ataatsimut sammisaq ataaseq allaaneruvoq: eqqakkanik katersineq eqqaaviliaassuinerlu.

Assit Kullorsuarmi eqqakkanik katersinermeersut, kajumissutsiminnik suliaqartut Kullorsuarmiullu suleqatigiillutik eqqagarpassuit katersorpaat eqqaaviliaallugillu.
Assit Kullorsuarmi eqqakkanik katersinermeersut, kajumissutsiminnik suliaqartut Kullorsuarmiullu suleqatigiillutik eqqagarpassuit katersorpaat eqqaaviliaallugillu.
Assit Kullorsuarmi eqqakkanik katersinermeersut, kajumissutsiminnik suliaqartut Kullorsuarmiullu suleqatigiillutik eqqagarpassuit katersorpaat eqqaaviliaallugillu.
Assit Kullorsuarmi eqqakkanik katersinermeersut, kajumissutsiminnik suliaqartut Kullorsuarmiullu suleqatigiillutik eqqagarpassuit katersorpaat eqqaaviliaallugillu.
Jensine Berthelsen
tusagassiortoq
Saqqummersinneqarpoq

Camp Kulloq nunaqarfimmi atugarissaarnermut ataqatigiinnermullu siuarsaataasumik peqatigiilluni sammisaqaqatigiinnissamik suliniuteqaqatigiinnissamillu siunertaqarpoq, minnerunngitsumik meeqqanut inuusuttunullu tunngatillugu – ukioq mannali erngertumik iliuuseqarfigisarialimmik suliassaqarfiuvoq.

Nunaqarfimmimi sumiiffinni assigiinngitsuni eqqakkat uninngaannartumik qaleriiaatiinnalersimapput: puut eqqaaviit, uumasut toqungasut timaat, anartarfiup puui eqqakkallu allat qimmit siaruartersimasaat. 

ATV-mut ingerlatsisinnaanermut allagartaqannginneq eqqakkat eqqaaviliaanneqartannginnerannut pissutaasoq

Kommunimi sulisut ATV-nut eqqakkanik eqqaavissuarmut assartuutinut ingerlatsisinnaanermut allagartaqanngillat, aputaarukkaangallu qamuteralaat atorsinnaajunnaaraangata eqqakkat uninngaannalertarput. 

Aviaaja Danielsen Kullorsuarmi najugaqarpoq Camp Kullormilu kajumissutsiminik suleqataalluni. Taanna ima oqaluttuarpoq eqqakkat tipeqartut peqqissutsimullu ulorianartuullutik:

- Nunaqarfimmi pisuttuarujoortarpunga. Ukioq mannali eqqakkat ajorluinnarput. Maajimili eqqakkanik eqqaavissuarmut assartuinerit arlaqanngillat, - assut tipeqarput aamma peqqissutsimut ulorianarput. Taamaattoqarnera kisima tujorminartinngilara, amerlasuummi kajumissutsiminnik eqqakkanik katersisimapput, ingerlatsisinnaanermulli allagartaqannginnatta eqqakkat assartorsinnaanngilagut qanorlu iliuusissaaleqinarsimavoq.

Helene Dørup Tuluit Nunaanneersuuvoq kajumissutsimillu suleqataasut nunanit tamalaaneersut ilagalugit. 

- Ullaakkut ataatsimeeqatigiinnerit ilaanni, nunaqarfimmiut nunanillu tamalaaneersut ullaat tamaasa ingerlattagaanni eqqakkanik katersinermik suliaqarsinnaanerluta eqqartorparput. Kajumissutsiminnik suleqataasut nunanit tamalaaneersut arlaqartugut ingerlatsisinnaanermut allagartaqarpugut taamaaliornikkullu aaqqiissutissarseqataasinnaalluta, Helene oqaluttuarpoq.

Kajumissutsiminnik suleqataasut ilaat ATV-mik ingerlatsisinnaanermut allagartaqarput

Innuttaasut namminneq suliniuteqarnerat aqqutissaavoq. Ullualunnguit ingerlanerini, kajumissutsiminnillu suliaqartut nunaqarfimmiut nunanillu tamalaaneersut suleqatigiilluarnerisigut, eqqakkanik katersinissaq aaqqissorneqarpoq. Kommunimi sulisut, Camp Kullormilu kajumissutsiminnik suleqataasut nunaqarfimmiut nunanilu tamalaaneersut innuttaasullu allat ikiuukkusuttut takkupput ullullu ataatsip ingerlanerinnaani eqqakkat ikiliserujussuarneqarput.

Aviaajap Helenellu isumaqatigiillutik taama suliniuteqarneq iluatsitsiffiulluarnerarpaat. 

- Kullorsuarmi kommunimilu innuttaasut assut qiimapput, suleriallaqqeqalutik inussiarnisaaqalutillu. Peqataaffigalugu isumaqaqaaq, Helene oqaluttuarpoq. 

Aviaajap aamma inuit taama amerlatigisut kivitseqatigiissillugit katersorneqarsinnaanerat nuannaarutigaa. 

- Nunaqarfik pisuttuarfigissallugu nuannerseqqippoq aamma tipeqarpallaarunnaarpoq. Neriuppunga taamatut suliniuteqarneq tamatsinnut takutitsissasoq innuttaasut nammineerlutik suliniuteqartarnerat allanngueqataasinnaasoq, aammalu kingusinnerusukkut nunaqarfimmi unammilligassat allat taamatut iliuuseqarfigisinnaassagigut, eqqagassanik piiaaneruppat allaappalluunniit, Aviaaja naggasiivoq.

Peqatigiiffik Kalaallit Meerartaat aasat tamaasa nunatsinni campeqartarpoq. Kullorsuarmiinnerlu sioqqullugu Nanortalimmi 9. juli - 30. juli campi ingerlanneqarsimavoq.



kullorsuaq affaldsbortskaffelse foreningen grønlandske børn sommercamp samfund inuiaqatigiit

ATORFIIT Se alle jobs

Powered by Labrador CMS