Kunngeqarfik Danmark Issittumi Siunnersuisoqatigiinni siulittaasunngorpoq
Kunngeqarfik Danmarki, Kalaallit Nunaat siuttoralugu, Issittumi Siunnersuisoqatigiinni ukiuni marlunni tulliuttuni siulittaasuussaaq.
Norgemi nunanut allanut ministeri Espen Barth Eide Issittumi Siunnersuisoqatigiinni siulittaasuuffimmik nunanut allanut tunngasunut naalakkersuisumut Vivian Motzfeldtimut tunniussivoq.
Assi: Javad/NTB/Ritzau Scanpix
Issittumi Siunnersuisoqatigiinni siulittaasuuffik, Norgep illoqarfiisa ilaanni Tromsømi, Kunngeqarfimmut Danmarkimut tunniunneqarpoq.
Kunngeqarfik, Kalaallit Nunaat siuttoralugu, Issittumi Siunnersuisoqatigiinni ukiuni tulliuttuni marlunni siuttuussaaq. Issittumilu nunat inuiaallu unammilligassaannut ataatsimut aaqqiissutissanik suliaqartuussalluni.
Nunanut allanut ilisimatusarnermullu naalakkersuisup Vivian Motzfeldtip (S) Norgep nunanut allanut ministerianit Espen Barth Eidemit siulittaasuuffik pisortatigoortumik tiguaa.
Siulittaasuunermi ilisarnaat kaataq Vivian Motzfeldtimut Tromsømi tusagassiortunik katersortitsinermi tunniunneqarpoq.
Tromsømi tusagassiortunik katersortitsinermi Espen Barth Eide Norgep Issittumi Siunnersuisoqatigiinni siulittaasuunerani naammassineqarsimasut pillugit oqaluttuarpoq.
- Qularinngilara siulittaasoq nutaaq aalajaatsumik siulersuiumaartoq, oqarpoq.
Taama oqariarluni siulittaasuuffik Vivian Motzfeldtimut tunniuppaa.
- Ukiuni tulliuttuni marlunni suliassatta aallartinnissaanut piareersimallutalu qilanaaqaagut, siulittaasuuffiup tigoqqammernerani taanna oqarpoq.
Nunap inoqqaavi peqataatinneqassasut
Issittumi nunap inoqqaavi suliniummut peqataatinniarlugit naalagaaffiup qulakkeertariaqaraa ilanngullugu oqaatigaa.
- Innuttavut piujuartitsisumik ineriartortitsinermut peqataatinneqassapput.
Kunngeqarfiup Danmarkip siulittaasoqarfimmiinnerani suliassat pingaarnerit saqqummiuppai.
- Kunngeqarfiup Danmarkip Issittumi naalagaaffiit tamaasa ataavartumillu ilaasortat suleqatiginissaat qilanaaraa, Vivian Motzfeldt oqarpoq.
USA-mik Ruslandimillu suleqateqarneq
Matoqqasumik ataatsimiinnermi, USA-p Ruslandillu peqataaffigisaanni, qanoq pisoqarsimanersoq tusagassiortut najuuttut apeqquteqarfigaat. Pissutsit assigiinngitsut patsisaallutik nunat taakku marluk attaveqarfiginerat ajornakusoorsinnaasarpoq.
Piffissami nalorninartorsiorfiusumi matumani nunat ilaasortaasut arfineq-pingasut suleqatigiinnerat qanoq ingerlassanersoq Vivian Motzfeldt aperineqarpoq.
- Norgetut siuttuulluartiginissarput kissaatigaarput ammanerulerusullutalu – naluarpulli qanoq pisoqarumaaneqarsoq, oqarpoq.
USA-p arlaleriarluni Kalaallit Nunaannik aqutsilerusunnini oqariartuutigisareermagu USA-mik isumaqatigiinniarnerit qanoq ingerlasimanersut aamma apeqqutigineqarpoq.
- Qallunaajorusunnginnerput amerikamioorusunnginnerpullu erseqqissumik oqaatigisareeripput isumaqarpunga, Vivian Motzfeldt oqarpoq.
Erseqqissarpaali USA-mut attaveqarluarnissaq pisariaqartoq, isumannaallisaanermummi tunngammat.
USA Ruslandilu nalunaarummut nutaamut ullumi nunanit arfineq-pingasunit atsiorneqartumut qanoq tapersiinersut naggataatigut apeqqutigineqarpoq.
- Ataatsimiinneq matoqqasumik ingerlanneqarpoq ingerlalluarlunili. Nunallu assigiinngitsut saqqummiukkusutaat nalunaarummi allassimapput, Espen Barth Eide akivoq.
Ruslandip Ukraine februaarimi 2022-mi tiguarmagu Issittumi Siunnersuisoqatigiit sulineq unammillerneqarpoq. Atorfilittat politikerillu qaffasissumik inissisimaffillit ataatsimiinneq maanna ajorput, Siunnersuisoqatigiinnili teknikkikkut suleqatigiissitat qarasaasiakkut ataatsimeeqatigiissinnaapput suliassatillu pingaarutillit ingerlatiinnarlugit.
