Kunngip Kalaallit Nunaannut tikeraarnerani pisussat takukkit

Kunngi Frederik Kalaallit Nunaannut ataasinngorpat tikissaaq. Tikeraarnerani pisussaq kunngikkormiut maanna saqqummiuppaat.

Kunngip tikeraarnera Danmarkimi Amalienborgimi pisortatigoortumik aallartissaaq, tassani Naalakkersuisut siulittaasuat Jens Frederik Nielsen (D) kunngip tikilluaqqussallugu. Tassanngaanniit marluullutik Nunatsinnut aallassapput.

Nuummut ataasinngorpat unnukkuani nalunaaqutaq 19.30 tikissapput.

Kunngi Kapisilinnut marlunngornermi ullaap tungaani tikeraassaaq. Katuami nalunaaqutaq 15.00 kaffillertoqarpat kunngi Nuummi innuttaasunik naapinneqarsinnaassalluni.

Tamatuma kingorna kunngi Frederik Nuup eqqaani pisuttuarluni pinngortitaq, uumasut oqaluttuarisaanerlu paasisaqarfigissavai.

Ulloq naggaserlugu Hans Egedep Illuani nereqatigiittoqassaaq, Jens-Frederik Nielsen Naalakkersuisunut ilaasortat ilagalugit qaaqqusisuulluni.

Siriusip alapernaarsuiartortitai

Kunngip Nuummut tikeraarnera Ilisimatusarfimmi pingasunngorpat naggaserlugu Uumassusililerinermi Bachelorinngorniarfimmi SILA-mi ilinniartut naapissavai.

Kunngi tamatuma kingorna Station Nordimut, Kalaallit Nunaanni sakkutooqarfinni avannarpasinnerpaamukassaaq. Illersornissamut ministeri Troels Lund Poulsen (Venstre) angalaqatigissavaa.

Tassunga tikeraarnissamut pilersaarutit illersornissamut ministeriaqarfimmit saqqummiunneqassapput.

Kunngi Siriuspatruljen peqatigalugu Qaanaamiit Station Daneborgimut qimusserlutik sisamanngornermi maajip aallaqqaataani aallassapput.