KL

DK

Kuno Fencker Aaja Chemnitzimut politiinut nalunaarutiginninnissamik siorasaarivoq

Inatsisartuni ilaasortaq, Kuno Fencker (S), USA-mut kisimiilluni angalanermini nunatsinnut utersimalereerpoq, angalanerminilu ilaatigut nunatta pisiarineqarnissaanik isumaqatiginninniarnissamut pisinnaatitsissummik Trumpimut tunniussinissamik siunnersuuteqartumik naapitsilluni. Angalanera politikkikkut oqallinnermik pilersitsivoq, aammalu aalassatsitsivoq apeqqusersuisoqarluni eqqortuusinnaanersoq nammineq "suliaq ingerlassinnaagaa". Tamatumunnga atatillugu folketingimi ilaasortaq Aaja Chemnitz (IA) imminut narrujuummisitsisimasoq isumaqarpoq, taassumalu tamanit takuneqarsinnaasumik utoqqatsernissaa piumasaraa.

Jensine Berthelsen
tusagassiortoq
Saqqummersinneqarpoq

Inatsisartuni ilaasortaq, Kuno Fencker (S) kisimiilluni USA-mut angalavoq Donald Trumpip præsidentinngortinneqarnerata nalaani. Tamanna pivoq nammineq isummani naapertorlugu "Naalakkersuisut iliuuseqanngimmata".

Tamatuma malitsigisaanik politikkikkut malissuarsiortoqalerpoq, angerlamut uternerata kingorna.

Fenckerip attaveqaqatigiittarfiit atorlugit nalunaarutigaa, oqaaseqaatit, nammineq isummani naapertorlugu, imminut nikanarsaasut katersorlugit politiinullu nalunaarutiginiarlugit.

Sermitsiap paasisai naapertorlugit aamma politikkikkut eqqissiviilliornerit maanna nalaanneqarput, tassanilu politikkereqatiminit nikanarsarneqarsimasutut misigisimalluni, maannalu folketingimi ilaasortamut Aaja Chemnitzimut (IA) saassussilluni, Aaja isornartorsiuinikuummat Kuno USA-mi inuttut angalanerarluni inuiaqatigiit kalaallit sinnerlugillusooq, pingaartumik attaveqaqatigiittarfiit atorlugit, oqaaseqarsimanermini, Kalaallit Nunaanni innuttaasunik sinniisuusutullusooq oqaaseqartarnera pillugu.

TV2-mi Naleqqap siulittaasuata, Pele Brobergip Trump kajumissaarpaa suliniutini ingerlatiinnassagaa Kalaallit Nunaannut tunngasoq annertuumillu aalassatsitsisoq pillugu, Aaja Chemnitzip akerliliilluni oqaaseqarfigaa, ilanngullugulu Kuno Fenckerip kisimiilluni iliuuserisimasaanut tunngatillugu oqaaseqarluni "oqarsinnaavunga, tamanna nunamut ajoqusiisumik ingerlatsineruvoq", tassalu taanna Fenckerip sakkortuumik qisuariarneranut politiinullu unnerluutiginninnissamut sioorasaarineranut pissutaasutut isikkoqarpoq.

Aaja politiinut unnerluutiginninnissamik sioorasaarneqarsimanini uppernarsarpaa

Aaja Chemnitzip uppernarsarpaa Kuno Fenckerimit allagarsisimalluni politiinut unnerluutiginninnissamik sioorasaarinertalimmik, piumasaminik malinninngippat:

- Ilumoorpoq, Kuno Fenckerimit allagarsivunga, politiinut unnerluutiginninnissamik imaqartumik, kisianni eqqissillunga tiguara. Politikkerituvut, politikkikkut isummavut ersersissarsinnaavagut, politikkikkullu isummersorutta isummanik, aamma akerliusunik, utertitsiffigineqarsinnaanissarput naatsorsuutigisinnaasariaqarparput.

- Politikeritut pingaaruteqarpoq nalilersinnaassallugu oqaaseqaatit qanoq Kalaallit Nunaannut qanoq sunniuteqarsinnaanersut aamma eqquisinnaasut. Inuttullu nammineq akisussaaffigisamik oqaaseqaraanni, inuiaqatigiit sinnerlugillusooq oqalunnginnissaq aamma eqqumaffigineqartariaqarpoq.

- Aamma pingaaruteqarpoq erseqqissassallugu, Naalakkersuisut tassaasut innuttaasut demokratiskimik qinersimasaat, tamatta sinnerluta sinniisut, aammalu Inatsisartuni folketingimilu ilaasortatut Naalakkersuisut tunuliaqutaaffigiumasimagaanni tamanna aamma malinneqassasoq.

Oqaloqatigiinneq pisortatigoortumik aqqutitigut ingerlanneqassaaq

Sermitsiamit ilisimasagut naapertorlugit, Inatsisartuni ilaasortap Kuno Fenckerip (S) Folketingimi ilaasortamut Aaja Chemnitzimut (IA) toqqaannartumik politiinut unnerluutiginninnissamik sioorasaarinermini innersuussutigisimagaa, pinerluttulerinermik inatsimmi § 99, nikanarsagaanermut tunngasoq.

Kuno Fenckerip innersuussutigaa, Aaja Chemnitzip pisuutissimagaani nunamut ajoqusiisumik suliaqarsimanerarlugu, taamaammallu Chemnitzip tamanit takuneqarsinnaasumik utoqqatserlunilu oqaatsini utertissagai.

Aaja Chemnitzili taamaaliunngilaq. Oqariartuutini attatiinnarniarpaa, tassalu  Naalakkersuisut innuttaasunut sinnerlugit oqaaseqassasut:

- Isumaqarpunga pingaaruteqartoq, pingaartumik piffissami matumani, annertuumik nalorninartumi, paasissutissat kukkusut Trump-imut suleqataanullu, tamatumalu saniatigut Amerikami aqutsisoqarfimmut, siammarterneqannginnissaat isumagissallugu pisussaaffigigipput, isumaqarpungalu pingaaruteqartorujussuusoq, oqaloqatigiinneq pisortatigoortumik aqqutitigut ingerlanneqassasoq, tamannalu Naalakkersuisut ingerlappaat.

Sermitsiamit Kuno Fencker (S) oqaaseqartinniarlugu sulissutigaarput.

aaja chemnitz kuno fencker inuiaqatigiit samfund usa

ATORFIIT Se alle jobs

Powered by Labrador CMS