KL

DK

Kuno Fencker itisilliivoq: Inunnik naapinniaannarpakka

Siumumi politikerip USA-mut angalanini, qaaqqusissutinik kusanartunik tunineqaraluarluni, nammineq inuttut angalanerusoq aalajangiusimavaa. Frihedsbrevetimi isornartorsiuilluni allaaserisaq tusagassiornermut ileqqorissaarnermut naapertuutinngitsoq Kuno Fencker oqarpoq.

Morten Okkels Tusagassiortoq
Saqqummersinneqarpoq

Inatsisartunut ilaasortaq Kuno Fencker (S) itisiliitissallugu sisamanngornermi siusinnerusukkut neriorsuutigaarput. Frihedsbrevetimi allaaserisaq "Kunos fede ferie"-mik (Kuno sulinngiffeqarluni angalanera nuannersoq aaqq.) tunngavigalugu.

Allaaserisami Frihedsbrevet naapertorlugu Kuno Fencker aaqqissuussanut 100.000 koruunit sinnerlugit naleqartunut isissutissanik tunineqartarsimavoq, aamma Amerikami politikkerinik isummersortartunillu isertortumik ataatsimeeqateqarsimavoq. Allaaserisaq tusagassiorfinnit allanit issuaaffigineqarpoq.

Tamannali ilumuunngitsoq Kuno Fencker ataatsimiinnissani sioqqullugu Sermitsiamut naatsumik oqaatigaa. Apersorneqarnera maanna allaaseraarpoq.

- Kuno Fencker, Frihedsbrevimi allaaserisami suna eqqunnginnerarpiuk?

- Atuanngilara. Ullaaq naallugu ataatsimiittaqattaarpunga tusagassiuutillu tamaasa misissornissaannut piffissaqarnanga.

Qanoq ilillutit allassimasut ilumuunngitsoq paasisinnaaviuk?

– Tamanna pillugu arlalinnik takusaqarpunga. 100.000 koruuninik pissarsisimasunga KNR issuaalluni allappoq. Ilumuunngitsumik pasillerneruvoq.

Inuttut angalaneq aalajangiusimagaa

Kuno Fenckerip erseqqissarpaa nammineq angalasimalluni, timmisartuussinerillu allat nammineq akilersimallugit, tamannalu uppernarsarneqarsinnaasoq. USA-miinnerminni klubitut ittumi ineeqqamiissimavoq, angalaqatimi Trumpimillu nuannarinnittup Jørgen Boassenip attaveqaatini aqqutigalugit inissarsiarisimasaani.

Kuno Fenckerip Donald Trumpimut præsidentinngortitsinermut atatillugu nalliuttorsiornerit arlallit najuuffigisimallugit oqaatigaa.

Hispanicip præsidentinngortitsinermi nalliuttorsiornerani politikkerillu tusaamasat, soorlu Marco Rubio aamma Ted Cruz, peqatigalugit ilaasimavoq. Tamannali ajornartorsiutaanngitsoq oqarpoq.

- Nalliuttorsiornerit ilaannut peqataavunga, attaveqaatikka akeqanngitsunik isissutissaqarmata. Aamma politikkikkut katerinnermut akeqanngitsunut peqataavunga, Kuno Fencker oqarpoq.

Attaveqaatit akeqanngitsumik nalliuttorsiornernut peqataanissamik imminnut tunisarnerat nalinginnaasuusoq naqissuserpaa.

- Newsmax’ Inaugural Eve Celebrationimut taava peqataasimavutit?

- Akunnerup affaani tassaniippunga ingerlallungalu. Qaaqqusissut immikkuullarissutit isiginngilara, oqarpoq.

- Jørgen Boassen peqatigalugu Turning Point USA-mik taaguutilimmit nalliuttorsiornermi, nalinginnaasumik 100.000 koruunit sinnerlugit akeqartartumi, peqataavit?

- Turning Point? Sunaanersoq qanorlu akeqarnersoq naluara.

Kuno Fenckerip Kalaallit Nunaata soqutigisaanut akerliusumik iliuuseqarsimanani erseqqissarpaa, aamma partiimi Siumup politikkikkut anguniagaanut akerliusumik iliuuseqarnani.

- Tamakku akueralugit namminerlu inuttut angalanertut taagit inuit eqqarsarnartoqartippaat. Qanoq isumaqarfigaajuk?

- Jørgen inuttut nammineq isersinnaappat, taava uanga aamma isersinnaavunga.

- Jørgenili Inatsisartuni politikeriunngilaq?

– Jørgenip ikinngutaatut peqataavunga. Illat aamma ilagisimasinnaagaluarpai. Inuit naapinniaannarpakka ilagerujoorlugillu.

Sisamanngornermi ualikkut Kuno Fencker Frihedsbrevetip allaaserisaa pissuserluttutut ileqqorissaarnerluttutullu taallugu tusagassiuutinut nalunaaruteqarpoq.

– Kalaallit Nunaata siunissaa pillugu tamanut ammasumik oqallinneq piviusorsiortumik unneqqarissumillu tunngaveqassasoq kajumissaarutigaara, tusagassiuutillu paasissutissiinissaq – paatsuunganartunik saqqummiinatik – suliassarigaat, Kuno Fencker oqarpoq.

kuno fencker inuiaqatigiit samfund siumut usa inatsisartut

ATORFIIT Se alle jobs

Powered by Labrador CMS