Lars-Emil Johansen Lars Møller-Sørensenilu Nunatta Eqqartuussisuuneqarfiani pinngitsuutinneqartut
Naalakkersuisut siulittaasorisimasaat Lars-Emil Johansen kommunimilu pisortaasimasoq Lars Møller-Sørensen peqquserlussimasutut unnerluunneqarneranni eqqartuussut Nunatta Eqqartuussisuuneqarfiani pingasunngornermi nalunaaqutaq pingasunut saqqummiunneqarpoq.
Lars-Emil Johansen Lars Møller-Sørensenilu pinngitsuutinneqarput.
Foto: Leiff Josefsen
Lars-Emil Johansen Lars Møller-Sørensenilu peqquserlunnerarneqarnerminni pinngitsuutinneqarput.
Nunatta Eqqartuussisuuneqarfiani pingasunngornermi ualisoq aalajangerneqarpoq.
Aalajangiineq eqqartuusissut tamarmik isumaqatigiissutiginngilaat, tassa eqqartuusseqataasut marluk pinngitsuutitsinissamik aalajangiisut ataaseq akerliuvoq.
Unnerluutigineqartut Eqqartussisoqarfik Sermersuumi 2025-mi januaarip 15-ianni ajorsaramik pinngitsuutinneqaqqullutik suliareqqitassanngortitsinikuupput. Taamani pineqaatissinneqarsimasunut ukiup affaani inissiisarfimmiittussanngortinneqarput.
Suliami Lars-Emil Johansenip Kommuneqarfik Sermersuumi siunnersortitut atorfia, taamanikkut kommunimi pisortaasimasup Lars Møller-Sørensenip atorfinitsinneqarnera, pineqarpoq.
Eqqartuusseqataasut: Isumaqatigiissut paatsoorneqarsinnaasoq peqquserlunnerunngilaq
Unnerluutigineqartunut marlunnut unnerluussutit naapertorlugit tamanna suliffik piunngilaq, Lars-Emil Johansenillu 730.000 koruuninik piumasaqarfigineqarani aningaasarsiutigalugu.
Nunatta Eqqartuussisoqarfiani eqqartuusseqataasut marluk Eqqartuussisoqarfik Sermersuumi aalajangiineq akerlilerpaat. Tassa atorfinitsitsinermi isumaqatigiissummi suut suliarineqassanersut eqqaaneqanngikkaluartoq, Lars-Emil Johansen isumaqatigiissut naapertorlugu suliaqarnini ajunngitsorsissutigisinnaagaa aalajangerneqarluni.
Taamaattumillu peqquserlunnerunngitsoq Nunatta Eqqartuussisoqarfiani inernilerneqarpoq.
Uppernarsaatit nutaat allannguutaasut
Lars-Emil Johansenip Lars Møller-Sørensenillu imminnut ilisarisimannginnerat, Lars Møller-Sørensenip isumaqatigiissummik atsiornissamut piginnaatitaasimanera nalunaarusiortoqarsimaneralu eqqartuussisut pinngitsuutitsinerminnik tunngavigaat.
Uppernarsaatit nutaat Nunatta Eqqartuussisuuneqarfiani saqqummiunneqartut aalajangiisuulluinnarput.
Unnerluutigineqartut taakku marluk oqiliallannerat malunnarpoq, imminnullu pilluaqqunerat takuneqarsinnaavoq.
Lars-Emil Johansen: Nuannaaqaanga
Suliaq nanertuutaasimaqisoq Lars-Emil Johansen oqarpoq:
- Naapertuilluanngitsumik eqqartuunneqartutut misigisimaneq nammataralugu nuanninngilluinnartuuvoq, eqqartuussineq naammassineqaqqammersoq Sermitsiamut oqarpoq, nangillunilu:
- Unnerluussisup kammalaatersorneraaneranut ilumuunnginneranik uppernarsaatit Nunatta Eqqartuussisuuneqarfiani saqqummiunneqarsinnaanerat nuannaarutigeqaara. Lars Møller-Sørensenimi inuttut ilisarisimasarinngilara.
Lars-Emil Johansenip pinngitsuutinneqarnini unnugu malunnartinniarlugu oqarpoq, ilaquttanilu pinngitsuutinneqarnini pillugu qujasaqqaassavai.
Apeqqut: Siunnersortitut suleqqissagunarpit?
- Kommuunimuunngutsoq. Sulliseqqissanngilakka, Lars-Emil Johansen iluarisimaartoq oqarpoq.
Nunatta Eqqartuussisuuneqarfiani Eqqartuussisoqarfik Sermersuumilu suliaq unnerluussisussaatitaasumit Københavnip Vestegnenimeersumit suliarineqarpoq.
