Løkke ataatsimeeqateqareerluni: Kalaallit Nunaannik tiguaanialersaartoqarnera eqqaqqittariaqanngilaq

- Kunngeqarfiup inissisimaffia oqaloqatigiinnermi erseqqissarneqarpoq. Isumaqarpungalu oqariartuut tamanna pimoorullugu tiguneqartoq maannalu Washingtonimullu apuunneqarluni.

- USA qanimut iligaarput, iligiillu akornanni kilitsissiaqarnissaq akuerineqarsinnaanngilaq. Oqariartuut tamanna ersarilluinnarpoq.

Nunanut allanut ministeri Lars Løkke Rasmussen Danmarkimi Amerikamiut aallartitaqarfiannik sisamanngornermi ualikkut ataatsimeeqateqareerluni oqarpoq.

USA-p Kalaallit Nunaanni kilitsissiaqarusunnerunera aviisimi Wall Street Journal-imi allaaserisaqarneqareersoq nunanut allanut ministereqarfiup aallartitaq ataatsimiigiaqquaa.

Amerikamiut aallartitaata, Nunanut allanut ministereqarfiup pisortaata Naalakkersuisullu sinniisaata oqaloqatiginerannit Løkke Rasmussen oqaaseqarsinnaanani erseqqissarpaa.

- Taamatut suleqatigiitsigisinnaanngilagut

Nuummi aallaartitaqarfiup matuneqarnissaa piviusunngorsinnaanngitsoq oqarpoq:

- Nuummi Danmarkimiluunniit USA-p aallartitaqarfiisa matunissaat aalajangiinerussaaq annertuumik kinguneqartussaq. USA Danmarkimik iligiipput qanimut suleqatigiittut, ukiorpassuillu suleqatigiinneq taanna ingerlarsimavoq.

- USA uagut Kalaallit Nunaatalu isumannaatsuuneranut pingaaruteqarluinnarpoq, taamaattumik qanimut attaveqarluarnissarput kissaatigaarput, tamannalu pissutigalugu immikkut iliuuseqarpugut. Taamatut suleqatigiissinnaanngilagut, Lars Løkke Rasmussen oqarpoq, taassumalu Donald Trumpip Kalaallit Nunaata tiguarnissaa pillugu oqaasii sakkortuumik isornartorsiorpai:

- Kalaallit Nunaannik tiguaanialersaarneq eqqaaqqittariaqanngilaq. Paasisinnaavarali Kalaallit Nunaat suli soqutigineqarmat, tamannalu Danmarkimi Kalaallit Nunaanniluunniit isumaqatigineqanngilaq. Naalakkersuisut sinniisaat oqaloqatigiinnermi peqataammat naalagaaffeqatigiinnermi nunat arlaat namminneq isummernani naalagaaffeqatigiinnermili ataatsimut isumaqartoqartoq uppernarsarneqarpoq, nunanut allanut ministeri oqarpoq.