KL

DK

Løkke nuannaaqisoq Nuummi: Immitsinnut qaninnerulerpugut

Nunanut allanut ministerip ingammik nuannaarutigaa inuusuttut nunat naalagaaffeqatigiinniittut maanna ajornannginnerusumik angalasinnaalernerat. Lars Løkke Rasmussen Nuummut minnerata kingorna oqaloqatigaarput.

Lars Løkke Rasmussen Nuup mittarfiani isersimaartarfimmiittoq, sisamanngormat ualikkut oqalugiaqattaartoqarmat.
Morten Okkels Tusagassiortoq
Saqqummersinneqarpoq

Sisamanngorneq ulloq tikeraarpassuarnut nuannaarfiuvoq, mittarfik nutaaq kiisalu Nuup Københavnillu akornanni aqqut toqqaannartoq atoqqaartinneqarmata. Immaqa nuannaarnerit ilagaat nunanut allanut ministeri Lars Løkke Rasmussen (M). Kim Kielsenimik (S) isumaqatigiissuteqarneratigut 2018-imi mittarfissaq nutaaq tunngavissaqalerpoq, taamanikkut aappaa ministeriunerusoq aappaalu Naalakkersuisut siulittaasuat.

- Periarfissaqartuaannarneq ajorpoq politikkimi arlaata piviusunngortinnerani peqataaffigisat nalliuttorsiutigisinnaanerat. Angallannermut ministererpassuaqarpoq aqqusinnianik ammaasunik, allat aalajangiinerisigut pilersitanik, qalersamik qiorsinermiit ukiorpassuit qaangiunnerisigut. Taamaattumik inuttut nuannaaqaanga ullumikkut peqataasinnaagama, Lars Løkke Rasmussen oqarpoq nangillunilu:

Soorunami mittarfiup massuma inissinnera pingaarnerpaavoq. Maanna naammassivoq, Ilulissaniittorlu aamma naammassingajalissaaq – ilami ukiut arfiniliinnaat matuma siornagut maannakkut aningaasalernissaanut periutsip inissinneraniit.

Aap, akuerineqarnera timminerlu siulleq pisariaqanngitsumik imminnut ungasinngillat?

- Naamik, immassaq unnukkut innarama nassuerutigaara akuerineqarnissaa suli inissinngitsoq, isumaliorpunga: Nå, aqagu susoqassanersoq takussavarput. Naggataagulli inissipput.

Kalaallit nunaminnut qaninnerulersut

Isumaqarpit Danmarkip Kalaallillu Nunaata akornanni attaveqatigiinnermut aqqut nutaaq sunniuteqassasoq?

- Taamaassorivippara. Ilaatigut immitsinnut inuttut qaninnerulissaagut, aningaasatigullu aporfissat aamma piffissap ingerlanerani annikinnerulissallutik. Sulissutigiuarsimavara naalagaaffeqatigiit immikkoortuini tamani inuusuttut amerlanerusut imminnut tikeraarnissaminnut periarfissaqarnerulernissaat, siunissamilu ajornannginnerulerluni. Aamma kalaallit Danmarkimiittut 20.000 isumaliutigaakka, nunagisaminnut attatveqarnerat ajornannginnerulissammat.

Lars Løkke Rasmussenip neriuutigaa, maanna pitsaasumik ineriartortoqalissasoq soorlu nammineq ukiut qulikkaat marlussuit ingerlanerini malugisimasaattut.

- Taamanikkut pissutsit imaapput savalimmiormiut inuusuttut aallaraangamik amerlaqisut uteqqinngisaannartartut. Maannali takusinnaavara arlaanik allanngortoqarsimasoq, attaveqaasersuinerup pitsanngoriartornera ilutigalugu, inuusuttorpassuillu assersuutigalugu ilisimatusarnerminni angerlamut uternissaat ajornannginnerulerlunilu akikinnerulersimalluni.

Københavnip mittarfiani Naalakkersuisoq Kim Kielsen 700 million koruuninut danskisut oqaaseqarluni ilinnut qujavoq. Taamaattumik taamanikkut niuerluarsimassaaq?

- Uangattaaq isumaqarpunga isumaqatigiissut pitsaasuusoq. 700 million koruuniinnaammi pineqanngillat. Suleqatigiilluta suliassap naammassinera aamma pineqarpoq.

ny lufthavn i nuuk lufthavn inuiaqatigiit kim kielsen københavn lars løkke rasmussen samfund

ATORFIIT Se alle jobs

Powered by Labrador CMS