Løkkep Troels Lundillu Trumpip Kalaallit Nunaannut soqutiginninnera pingaaruteqartutut isigaat
Trump Kalaallit Nunaat pillugu pingaarutilimmik ersersitsisoq Lars Løkke isumaqarpoq. "Eqeersaat,“ Troels Lund-Poulsen isumaqarpoq.
Trumpip Kalaallit Nunaat soqutigineranik pingaarutilimmik ersersitsisoq illersornissamut ministeri Troels Lund-Poulsen (V) aamma nunanut allanut ministeri Lars Løkke Rasmussen (M) isumaqarput.
Assi: Liselotte Sabroe/Ritzau Scanpix
Illersornissamut ministerip Troels Lund Poulsenip (V) Amerikamiut præsidentiata Donald Trumpip Kalaallit Nunaata aqulernissaanik soqutiginninnera Danmarkimut naalagaaffeqatigiinnermilu isumannaallisaanermut politikkimut "eqeersaatitut“ isigaa.
Politikenimut oqarpoq.
- Trumpip Europamut Amerikamiut isumannaallisaanermut aningaasartuutit akilertarnerat attatiinnarnissaa qaangiuttoq paatsuungassaanngitsumik ersersippaa. Pissutsit nutaat Europamut atuutilerput. Minnerunngitsumik Ukrainimi sorsuttoqarnera pissutigalugu.
- Eqeersarneqarneq assigiinngitsorpassuartigut oqiliallannarpoq, tassami Europap maanna illersornissaq oqallisigileratsigu. Imaanngitsoq Amerikamiut isumannaallisaanermik isumaginnittuassasut, oqarpoq.
Trumpip Kalaallit Nunaannut soqutiginninnera pillugu maannakkut paatsiveerusimaarneq “ajunngitsumik kinguneqarsinnaasoq” nunanut allanut ministeri Lars Løkke Rasmussen (M) isumaqarpoq.
Løkke Berlingskemut oqarpoq.
- Isumaqatigiinngissuteqartarpugut, tamannali paasinnissinnaannginnertut paasisariaqanngilaq, oqarpoq.
Trumpip qinigaaffimmini siullermi 2017-imiit 2021-mut Nord Stream 1, Ruslandip gassiisa pinngitsoorneqarsinnaannginnerannik pilersitsisimasoq, mianersoqqussutigereernikuuga Løkkep tikkuarpaa.
- Europap Ukraine sakkutooqarnikkut tapersersunngikkaa aamma paasiuminaatsippaa. Arlaleriarluni pingaarutilimmik oqaaseqarpoq, qaqutiguinnarlu oqaasii piviusuunngitsuusarlutik, oqarpoq.
Danskit naalakkersuisui illersornissaq pillugu isumaqatigiissut nutaaq ataasinngormat atsiorpaat, tassanilu 14,6 milliardit koruunit Danmarkip Issittumi Atlantikullu avannaani sakkutooqarnermik annertusaanissamik immikkoortinneqarput.
Umiarsuarnik issittumi angallatissanik nutaanik pingasunik aamma dronenik ungasissumut angalasinnaasunik nakkutilliisunik marlunnik pisisoqassaaq, aamma qaamataasatigut attaveqaatit nukittorsarneqassapput. Aningaasat katillugit 11,8 milliardit koruunit sakkutooqarnermut atorneqassapput.
Isumaqatigiissut sivisuumik suliarineqarpoq, maannali Trumpip Kalaallit Nunaata Danmarkimit oqutsilernissamik soqutiginninnini ersersimmagu nukinginnartunngorpoq.
Tamanna pillugu Trump aperineqarami, Kalaallit Nunaat oqartussaaffigilerniarlugu Danmarkimut aningaasatigut pillaanissani imaluunniit sakkutuunik atuisinnaanini tunuarsimaarfiginngilaa.
Aamma taama soqutiginninnini præsidentitut kingullermik atuuffimini ersersippaa. Tassani ministeriunerup Mette Frederiksenip naalagaaffeqatigiinnerup issittortaaniittunik tuninisinissani itigartippaa.
Maannali qallunaat naalakkersuisuisa periaasaat atorfilittatigut pivoq.
/ritzau/
