Atassut naalakkersuisoqataaginnassanerluni isummissasoq

Atassutip Inatsisartunut ilaasortaatitaasa upernaaq manna oqaluuserisassanngortitaat arlallit, partiip siorna qineqqusaarutigisimasai, soorlu akileraartarnermut inoqarfiusimasullu Illorsuit najugaqarfigineqaqqinnissaanut tunngasut naalakkersuisoqataasa, tassa Demokraatit Inuit Ataqatigiillu, illuatungerluinnaanik isumaqarfigalugit akerlilertarpaat. 

AAMMA ATUARUK

Atassut naalakkersuisoqatiminit isumaqatigineqanngitsoq

Taama isumaqatigiissinnaannginneq pillugu, Atassut naalakkersuisoqatigiinni qanoq inissisimanersoq pillugu, Sermitsiap partiip siulittaasua aperaa.

- Maannakkumuugallartoq aap, naalakkersuisoqataanerput ingerlakkallarparput. Killiffigigallakkagut ajorinagit atorpagut, naak ilaatigut qineqqusaarutigisimasagut imaaliinnarlugit angusinnaanngikkaluarlugit, Aqqalu C. Jerimiassen oqarpoq.

Aallartitat aalajangiissasut

Naalakkersuisoqataanerli partiip sinniisaasa ukiaru naapeqatigiinneranni allanngortinneqarataannaasoq, taanna aamma oqarpoq.

- Atassut oktobarip naanerani novembarillu aallartilaarnerani ataatsimeersuartussaavoq. Naalakkersuisoqataaneq tassani aamma qaqinneqarumaarpoq. Atassutip aallartitai taakkuujumaarput pingaarnerpaamik aalajangiisussat qanoq ingerlariaqqittoqarumaarnersoq, partiip siulittaasua oqarpoq.

Maannakkut ingiaqataanissi akuersaarallarneranut ataatsimiititaliani akisussaaffilerujussuarni, soorlu aningaasaqarnermut aamma aalisarnermut ataatsimiititaliani siulittaasuuffeqarnersi naalakkersuisoqataaginnarnissinnut tunngavileeqataappat?

AAMMA ATUARUK

Naalakkersuisut Illorsuit najornissaat navianartutut isigaat

- Annerusumik oqimaalutarineqarsinnaanngillat taakkua. Siulittaasuuneq taamaallaat akisussaaffimmik annertuumik tunniussaqaannartarpoq pissaaniliinermik annerusumik tunniussineq ajorpoq. Isumaqanngilanga taakkua toqqammavigalugit naalakkersuisoqataanerput iluatigalugu pigipput, Aqqalu C. Jerimiassen oqarpoq.

Naalakkersuisoqatitik isorigaat

Atassutip naalakkersuisoqatitik, Naalakkersuisunut ilaasortaasimasoq, Folketingemut maanna ilaasortaq, Naaja H. Nathanielsen (IA), aamma Peqqissutsimut Inunnullu Innarluutilinnut Naalakkersuisoq, Anna Wangenheim (D), Folketingemut ukioq qinersinissamut atatillugu qinigassanngortinnerat sakkortuumik isornartorsiornikuuaat. Tamannali naalakkersuisoqataajunnaarnerannik kinguneqarnikuunngilaq. 

Atassutip taama isornartorsiuinerata kingorna, upernaakkut ataatsimiinneq aallartimmat, partiip ilaasortaatitai Inatsisartut ataatsimiititaliaanni inissanik amerlasuunik pissarsipput.