KL

DK

ISUMAGA

Maanna iliuuseqarit

Ilaquttavut, ikinngutivut, ilisarisimasavut suleqativullu ukiortaarsiorluaqqussallugit ukiortaarsiungajalerpugut. Oqaloqatigiinnermut atatillugu immaqa ukiortaami qanoq anguniagaqarnersut aperinngikkutsigit nammineq suna anguniarnerlugu oqaluttuarisarparput.

Paornánguaq Kleist Tusagassiortoq
Saqqummersinneqarpoq

Oqaaseq “Ukiortaami anguniakkat” ujarakku makku nuipput: ”Ukiortaami anguniakkani nuannarineqarnerpaat inuit peqqissusaannut tunngapput. Sanigornissaq nuannarineqarnerpaavoq, peqqinnarnerusunik nerisaqarnissaq timersornerunissarlu naligiingajallutik tulliullutillu pingajuupput. Aningaasanik katersinissaq aningaasaqarnermillu pitsanngorsaanissaq appasinnerulaartumi inissisimapput, tallimaattullu ilaquttat ikinngutillu ilaginerunissaat allassimavoq.” (Tigulaariffik: Ritzau)

Ukiortaami suna anguniarnerlugu aalajangissallugu nammineerlunga ileqqorinngilara. Ukiulli ilaanni anguniagaqartarnikuullunga nassuerutigissavara, tamannalu pillugu Facebookimi eqqaamasat nuigaangata eqqaasinneqartarpunga. Tassunga tunngatillugu immikkuullarinngilanga, anguniakkammi timersornermut, inuunerissaarnerulernermut sulianullu tunnganerusarmata alapernaasiinnarsimanngilanga.

ISUMAGA

Isuma allaaserinnittup inuttut nammineq isumaanik ersersitsisuuvoq.

Anguniakkakka piviusunngorteriartarpakka, inuunerullu ilaani aamma angusarpakka. Ukiualunni timersungaatsiarlungalu peqqinnartunik nerisarneq ulluinnarnilu aalanerunissaq ukkataraara. Suliffinnut tunngatillugu – atorfeqartarninni marloriarlunga - suliffigisanni ilorrisimaannginnama allamik suliffittaarpunga. Anguniarakku anguara. Imminut ajugaaffigalungalu avatangiisinniittut ajugaaffigisutut misigigakkit iluarpoq.

Allani iluatsinneq ajorpakka. Anguniakkakka angusinnaanngikkaangakkit ajorsartutut misigisarnera puigorniarpallanngikkullu ajuusaannginniassagama utoqqatsissutissarsiupallattarpunga. Imminummi anaartarujoorluni nukissamik piffissamillu atuineq ajortaqaaq. Sunalu pillugu?

Qaqukkulli iluatsinngitsoortarpa? Ukiortaami anguniakkat ulloq siullermiit atulertarpat? Imaluunniit ukiup naannginnerani angugaanni naammappa? Imminut ajunngitsuliorfiginissaq aappaagumut, qaammatip tullianut sapaatilluunniit akunnerata tullianut kinguartinnagu ullut tamaasa imminut ajunngitsuliorfigisarnissaq pitsaanerunnginnerpa?

Decembari qiteqquttoq uigalu ukiuni 24-ni katiffissiorpugut. Katinnginnitsinni ukiut pingasut peerareeqqaarnikuugatta inuunitta affaa sinnerlugu najornikuuvugut. Tassa ukiut 27-it inooqatigiippugut. Arlallit taamak sivisutigisumik sivisunerusumilluunniit najornikuusut nalunnginnakkit annerusumik eqqarsaatigineq ajorpara. Piffissalli ilaani taamak sivisutigisumik najorniaraanni qanoq iliortoqartarnersoq aperitittarpugut. Qanoq asannileqqaannaavissinnaallutalu nuannariiginnarsinnaanersugut.

Ukiorpassuarni inooqatigiinneq manissuinnaasoq upperineqarsinnaanngilaq. Inuttut allatulli immitsinnut kamaassinnaalluta, kamaammiussinnaallutalu assortuussinnaavugut. Tamakkiisumilli isigalugu najorusuppugut. Soorunami tatigeqatigiinneqarlunilu ataqqeqatigiinneqassaaq, immitsinnulli toqqarnikuuvugut. Uangalu isiginnittaasinni tassa inuuneq.

Katiffissiornerluta katiffissiunnginnerlutaluunniit eqqarsaatigineq ajorparput. Ulloq puigukkajukkipput ilaquttatsinnit illaruaatigineqartarpoq. Taamaammat eqqaamagaangatsigu persuarsiutigisarparput, ulluinnarnili immitsinnut peruarsiutiginissarput aamma eqqaamasarparput. Uiusoq kisimi naasunik tunisisussaanngilaq. Uanga aamma tunisisussaavunga. Naasummi qalipaatigissut marlunngornerinnarsuarmi nuannequtaasarput.

Taamaammat: Imminut ajunngitsuliorfigerusukkuit iliuuseqarit. Peqqinnarnerusumik inuuneqarusukkuit taamaaliorit. Ataasinngorpamut, qaammatip tullianut aappaagumulluunniit utaqqinak. Massakkut iliuuseqarit. Ullut tamaasa iliuuseqarit. Ajutooruillu imminut anaatarniaqinak. Ajutooruit nikeriarlutit ingerlaqqiinnassaatit. Tamanna ukiortaami anguniagaasariaqanngilaq.

sundhed samliv inuiaqatigiit motion nytårsforsæt samfund økonomi

ATORFIIT Se alle jobs

Powered by Labrador CMS