Qamanaarsuup Sermia takornariareerlugu præsident Emmanuel Macron, Mette Frederiksen aamma Jens-Frederik Nielsen Nuummut uteqqipput, tassani Nuutoqqami tusagassiortunik katersortitsinertik ingerlatissallugu.
Jens-Frederik Nielsen tusagassiortunik katersortitsineq aallarnerlugu franskit præsidentiannik tikilluaqqusivoq:
- Nuannaarpunga ataqqinaatitullu tigullugu Nuummi tikeraarnerni tikilluaqqusinnaagakkit.
- Ulloq kangerlummi nuannerluinnartumik atorparput, sermersuarlu aamma takullugu, Jens-Frederik Nielsen oqarpoq.
Naalakkersuisut siulittaasuat nangilluni oqaluttuarpoq silap pissusiata allanngoriartornera kalaallinut sunniuteqangaatsiartartoq:
- Suleqatigisakka takunnitsissinnaasimagakkit nuannaarpunga, iliuuseqartariaqarpugummi, Jens-Frederik Nielsen oqarpoq.
Ilanngullugu oqaatigaa nuannaarutigalugu Frankrigimut aammali EU-mut qaninnerusumik suleqateqarsinnaanissaq oqaloqatigiissutigineqarsinnaammat:
- Nunarput periarfissanik pisuussutinillu ulikkaarpoq, suleqatigiikkuttalu tamatsinnut iluaqutaasinnaapput.
Qujavoq
Taama oqareerluni USA-mi Donald Trumpip piffissami kingullermi tatisimanninnerata nalaani illersuisimaneranut Macron qutsavigaa:
- Naalakkersuisut inuiaqatigiit kalaallillu sinnerlugit qujarusuppunga, Jens-Frederik Nielsen oqarpoq, tusarnaariallu ersaattaatigaatsiarlutik.
Jens-Frederik Nielsen ilanngullugu oqarpoq neriuutigalugu tikeraarnerup kingorna Frankrigimut suleqatigiinnerusoqalissasoq.
Macron: Nuummi generalkonsulatimik ammaassaagut
Præsident Macron aamma oqaaseqarpoq. Taannalu Kalaallit Nunaannut tikeraarsinnaagami qujavoq:
- Taama tikilluaqqusaatigineq pillugu tussunnguvugut. Qamannga pisumik qujanaq, Emmanuel Macron oqarpoq, kingornalu kalaallisut oqaaseq "qujanaq" oqaatigalugu nuannarineqaqisumik.
Macron taamaaseriarluni franskisut aamma oqalugiarpoq, oqarlunilu Kalaallit Nunaat Kunngeqarfik Danmarkilu tapersersorlugit, nunap killeqarfigisai eqqarsaatigalugit.
Taassuma erseqqissarpaa Frankrigip EU suleqataasullu tamatigut illersortuassagai.
- Frankrigimi tamarmik EU-lu isumaqarput Kalaallit Nunaat tiguneqaannarsinnaanngitsoq, præsident oqarpoq.
Taanna oqarpoq Frankrig aalajangersimasoq Nuummi generalkonsulatitaassasoq.
Taama oqareerluni præsidenti oqarpoq silap pissusiata allanngoriartornera pillugu ilisimatusarnissaq pingaaruteqartoq, Frankrigillu Kalaallit Nunaannut suleqateqarnini nukittorsarusukkaa.
Præsidenti naggasiilluni oqarpoq Frankrig, Kalaallit Nunaat Kunngeqarfillu ullumimuut siunissamut ataqatigiittuassasut.
Mette Frederiksen: Illersornissakkut unammillernartut oqaluuseraagut
Mette Frederiksen oqalugiarnermini Jens-Frederik Nielsenip tikilluaqqusilluarneranut qujavoq, Emmanuel Macronillu tikeraarneranut aamma qujalluni.
- Nunatut immitsinnut illersornissamut ataatsimoornerput nunattalu siunissami illersornissaanut piareersimanerput upperaara, Mette Frederiksen oqarpoq sillimaniarnikkullu pissutsit maanna atuuttut oqaasertalerlugit:
- Tikeraarnermi matumani issittumi nunat sillimaniarnikkut unammillernartui oqaluuseraagut, pingaartumik Nunarsuup kitaani, Ruslandimi aamma Kinami sillimaniarnikkut najummatsisimasoqartillugu.
- Rusland ukiumi matumani nunap immikkoortuini pineqartuni sakkutooqarnikkut annertusaasimavoq, Mette Frederiksen oqarpoq.
- Erseqqissumik oqaatigisareerparput USA suleqatigerusullugu, tamannali nunat akornini ataqqinninnermik tunngaveqassasoq, Mette Frederiksen oqarpoq erseqqissarlugulu Danmark nunat Natomi ilaasortaasut peqatigalugit Kalaallit Nunaannik sillimaniarnikkut illersuinerminni annertusaanissamik piareersimasoq.
Macron: Tikeraarnissaq pillugu Trump oqaloqatiginikuuara
Apeqquteqartoqarsinnaalermat Macron aperineqarpoq Kalaallit Nunaannut tikeraarnissaq pillugu Donald Trump oqaloqatigisimaneraa.
Macron oqarpoq oqaloqatigisimallugu, taamatullu tikeraarneq pillugu G7-imi ataatsimiittussanngorunik oqaloqatigiinneq nangissallugu.
- Maanna takutitsivigut akisussaaffimmik tamatta tigusisariaqarluta, ataqqinninneq suleqatigiinnerlu tunngavigalugit.
- Aqagu oqaloqatigiinneq nangissaaq, tassanilu oqarfigissavara periarfissaqartugut ataqqinninneq tunngavigalugu suleqatigiinnissamut, unammillernartut arlallit pitsaasumik iliuuseqarfigissagutsigit.
- Kalaallit Nunaat pillugu erseqqissumik ilumoorussisumillu oqarfigissavara, Emmanuel Macron oqarpoq.
Macronip erseqqissarpaa USA eqqarsaatigalugu pitsaanerpaamik iliornerussasoq Kalaallit Nunaanni oqartussanik suleqateqarneq, taamaattumillu Donald Trumpip iliuuserisaa tassa iligisat siorasaarnissaat inissaminiinngitsoq.
Macron aamma aperineqarpoq Trump aalajangissappat nunamik tiguaariarniarluni, Kalaallit Nunaat illersornissaanut piareersimanersoq. Macronilli apeqqut taanna erseqqissumik akinngilaa, illuatungaanilli apeqquteqarluni oqaaseqarfigalugu:
- Isumaqarpunga USA NATO-p iluani ilitut inissisimarusussasoq, iligiinni ilaajumalluni.
- Europamiusullu USA-mik pisariaqartitsinermut annikillisartariaqarparput. Imaanngilaq iligiikkaanni taava aamma imminnut annertuumik pisariaqartittariaqartut, Emmanuel Macron oqarpoq.
