Maligassiuisut pingasut nersornaaserneqarput
Naalakkersuisut Siulittaasuat Múte Bourup Egede ullumi inunnut pingasunut kajumissutsimik sulisimasunut, imminut toquttarnermik pinaveersaartitsinermi allanngueqataasimasunut nersornaasiivoq. Tamanna pisoq Qamani 2024 ataatsimeersuartitsinerani.
Foto: Andreas Poulsen / Naalakkersuisut
Nersornaaserneqartut, Lars Møller, Hans-Henrik Nielsen aamma Nuka Aqissiaq Semsen, tunniusimanertik misiginneqataasinnaassusertillu pillugit nersornaaserneqarput, taakkualu Kalaallit Nunaanni inuppassuit inuunerannik allannguisitsisimapput.
Naalakkersuisut siulittaasuat, Múte B. Egede nersornaasiivoq:
- Asasakka Lars Møller, Hans-Henrik Nielsen kiisalu Nuka Aqissiaq Semsen. Tamarluinnassi maligassiuisuuvusi. Nunatsinni sunniuteqarluartuuvusi, takutipparsilu kajumissutsimik sulineq qanoq iluaqutaatiginersoq. Pimoorussinersi aqqutigalugu atorfissaqartitsinerpaanut neriuuteqalersitsisimavusi. Ilungersuussilluartumut nersornaatisinersi pissusissamisoorpoq. Imminut toquttarnerup akiorniarnerani inuiaqatigiit ataatsimoorluta iliuuseqartariaqarpugut.
Qamani 2024-mi ataatsimeersuarnermi immikkut ilisimasallit soqutigisaqartullu sapaatip-akunnerani matumani Kalaallit Nunaanni imminut toquttarneq akiorniarlugu iliuuseqarnerunissamut ataatsimeersuartinneqarput.
