Malittarisassaqanngilaq: Taxartartutut allagartaqaratik angallassisunik politiit malersuisinnaanngillat

Kommuninit politiiniillu taxartarnerup malittarisassiorneqarunnaarnikuunera pillugu, taxartartut akornanni ernumasoqarpoq.

Assersuutigalugu kilometerimut akigitinneqartut aamma akuersissummik tunineqartartut amerlassusaat kommunit aalajangertarunnaarpassuk, „inatsisaatsutut ingerlasoqalernissaa“ aarleqqutigalugu, Ilulissani taxartartoq Knud Fleischer Sermitsiamut oqarpoq.

Inatsisit pisoqaavallaartut politiinut ajornartorsiutaanngitsut Kalaallit Nunaanni Politiit Sermitsiamut ilisimatitsipput, tassami taxanik angallassinerup qanoq malittarisassalerneqartiginissaa politikkikkut aalajangigassaammat:

Akileraartarnermut Aqutsisoqarfimmut nalunaarutigineqarsinnaapput

- Tamanna inatsisitigut malittarisassaqassanersoq taamaalillunilu politiinit suliarineqassanersoq politikkikkut aalajangigassaammat, imatut ajornartorsiutaanngilaq.

- Tamanna pillugu malittarisassaqannginneq pillugu, aqqusinermi angallannermi inatsisit nalinginnaasut saniatigut aamma allanik politiit pillaasinnaannginnerat erseqqippoq, inuilli namminneq biiliminnik inunnik angallassinermut akiliisitsisunik Akileraartarnermut Aqutsisoqarfimmut nalunaaruteqarsinnaapput, Kalaallit Nunaanni Politiit allakkatigut akissuteqarlutik ilisimatitsipput.

Allatut oqaatigalugu taxartartutut allagartaqaratik angallassisunik ilaasunik angallassinerminni akiliisitsisartunik politiit unitsitsisinnaanngillat.

- Maannakkut inatsimmi atuuttumi taxartartutut allagartaqarani angallassineq inerteqqutaanngitsoq Kalaallit Nunaanni Politiit isumaqarput. Biilinilli tamatigut politiit unitsitsisinnaapput misissuillutillu.

Biilersinnaanermut allagartaqartariaqartut - politiilli akisussaaffiginngikkaat

- Taxartartutut allagartaqarani angallassisoqartoq politiit paasigunikku, suliamut tunngasumik akileraartarnermut oqartussaasut ilisimatissavaat, tassami akileraarutitigut isertitat pineqarsinnaammata, politiit akissuteqaamminni allapput.

Aquttut taxartartullu ilinniarsimanissaat sillimmasernissaallu pillugit piumasaqaatit pillugit, inuussutissarsiutigalugu biilersinnaanermut allagartamik piginnittoqartariaqartoq, Aqqusinermi Angallannermut Aqutsisoqarfimmit Kalaallit Nunaanni Politiit ilisimatinneqarput, tamannali pillaatisiassaanngilaq. „Taamaammat inatsisit malinneqarnissaat politiit akisussaaffiginngilaat,“ politiit allapput.

Politikerit suna kissaatigaat?

Taxanik angallassinermut immikkut malittarisassaqartoqarneranik Kalaallit Nunaanni Politiit ilisimasaqaratik erseqqissaapput, inatsimmili suut malittarisassaanersut suullu malittarisassaannginnersut pillugit inaarutaasumik akissuteqarnissaq aqqusinikkut angallannermi aqutsisoqarfiup aamma/imaluunniit angallannermut ministeriaqarfiup akisussaaffigaat, taakkumi inatsimmut akisussaammata.

Apeqqut: Pissutsit politiit qanoq isigaat — inatsisinik nutaanik kissaateqarpat, politikkikkulluunniit tamanna aalajangigassaava?

- Tamanna politikkikkut sumik kissaateqarnermut tunngassuteqarpoq, tamannalu immikkut ittumik Kalaallit Nunaanni Politiit isumaqarfiginngilaat, politiit allapput.