Malittarisassat nutaat: Namminersorlutik Oqartussat napparsimasunik toqusunik angerlartitsinermut akiliissapput
Naalakkersuisut aalajangerput, qanigisaasut akiligassinneqassanngitsut napparsimasoq katsorsarneqarluni angerlarsimaffimminit avinngarusimasumiitilluni toquppat. Angerlartitsineq pisortanit akilerneqartassaaq - peqqinnissaqarfiulli qanoq angallassisoqassanersoq aalajangertassavaa.
Foto: Kassaaluk Kristensen
Napparsimasoq Kalaallit Nunaanni nunattaluunniit avataani najugarinngisamini katsorsarneqarnermi nalaani toquppat, ilaqutaasut toqusimasup angerlartinnissaanut angallannermut aningaasartuutit isumakuluutigisassanngilaat. Tamanna nalunaarutip nutaap, Naalakkersuisut maajip 15-ani 2025-mi akuerisaani atuarneqarsinnaavoq.
Aaqqissuussinerup nutaap qulakkeerpaa innuttaasut katsorsarneqarnermi nalaanni, assersuutigalugu Danmarkimi napparsimmavimmiitilluni imaluunniit nunatsinni illoqarfimmi allamiitilluni toquppat, angerlamut angallannermut aningaasartuutit nunatsinni peqqinnissaqarfiup akilertassagai. Tamanna atuuppoq Kalaallit Nunaanni nunaniluunniit allani toqusoqaraluarpat – napparsimasoq angerlarsimaffimminit peqqinnissaqarfimmit aallartinneqarsimatillugu.
– Inuttut ataqqinnilluinnartumik aalajangerneruvoq. Innuttaasoq peqqinnissaqarfipput tatigalugu katsorsarneqariartorluni aallaraangami – ilaatigut angerlarsimaffimmit ungasissumut – aamma aqqutaanut akisussaasariaqarpugut. Pisussaq ajornerpaaq aamma pigaluarpat. Inunnut ataasiakkaanut qimagaasunullu ataqqinninnermut tunngavoq, peqqissutsimut naalakkersuisoq Anna Wangenheim (D) tusagassiuutinut nalunaarummi oqarpoq.
Illerfiusuaannarsinnaanngilaq - peqqinnissaqarfik toqqaasassaaq
Angallassineq ilaqutaasunut akeqarunnaaraluartoq imaanngilaq ilaqutaasut namminneq aalajangersinnaalissagaat toqusoq qanoq angerlartinneqarniarnersoq. Peqqinnissaqarfiummi aalajagissavaa toqusoq illerfimmi, imaluunniit toqusup arsai qummuatammut ikillugu angallanneqassanersoq. Tamatumunnga pilersaarusiorneq peqqinnissaqarfiup akisussaaffigissavaa.
Peqqinnissaqarfiup toqusup ilaqutaasaluunniit kissaataat sapinngisamik eqqumaffigissavaat, kissaatilli piviusunngortinnissaa tamatigut qulakkeerneqarsinnaasassanngitsoq, nalunaarummi nutaami allassimavoq. Kissaatigisat itigartinneqarsinnaapput atoriaannaanngikkunik, akisuallaarunik imaluunniit allanik pingaaruteqarsinnaasunik pissutissaqarunik.
Akisuallaartumik angallassisussanngornissaq pissutigalugu itigartitsisoqarpat, ilaqutaasut namminneq akiliinissamik neqeroorfigineqarsinnaapput nakorsat inaarutaasumik aalajangiitinnagit, nalunaarusiami allassimavoq.
Ilaquttanut toqqissisimaneq
Suliamut aningaasanut inatsimmi 2025-mut 1,8 milliuunit koruuninik aningaasaliisoqareerpoq, periuserlu atulersinneqareerluni. Siornatigut tamatumunnga tunngatillugu erseqqissunik malittarisassaqanngilaq, ilaannilu ilaqutaasut toqusimasup angerlartinneqarneranut namminneq akiliisariaqartarsimapput – amerlanertigut akisuumik.
- Ilaqutariit aliasuuteqartut ilimaginngisamik aamma akiligassamik eqqunngitsumik akiliisarnissaat naleqqutinngilaq. Ataqqinninnermut, toqqissisimanermut akisussaaffimmullu tunngavoq – pisortallu akisussaaffimmik tigusinerat pissusissamisoorpoq, Anna Wangenheim oqarpoq.
Angallassineq silaannakkut imaatigullu ingerlanneqartassaaq, ilaatigut angallasseriaatsit taakku marluk tamaasa atorneqartassallutik, peqqinnissaqarfiup naliliinera apeqqutaatillugu. Nunanit allanit angallassigaanni nunami tassani maleruagassat naapertorlugit aamma angallassisoqartassaaq.
