Mamakujunnut akitsuutit amerlanerussuteqartut maanna atorunnaarsikkusunngilaat

Mamakujunnut assigiinngitsunut akitsuutit atorunnaarsinneqarnissaannut Atassutip siunnersuutini iluatsinngilaa. Aningaasaqarnermut Akileraartarnermullu Ataatsimiititaliami amerlanerussuteqartut Naalakkersuisut mamakujunnik akikillisitsisumik akitsuummik “naliliinissaat” tapersersorpaat, tamanna innuttaasut peqqissusaannut ajoqutaassanngippat.

Aningaasaqarnermut Akileraartarnermullu Ataatsimiititaliami amerlanerussuteqartut assersuutigalugu sukkulaatit akitsuusersorneqarnerat atorunnaarsinnianngilaat, akitsuutilli atorunnaarsinneqassappata innuttaasut peqqissusaannut qanoq kinguneqarumaarneranik misissuisoqarnissaa tapersersorpaat.

Sukkulaanut, lakridsinut, marcipaninut, karamellinut, milukaanut sukkuaqqanullu akitsuutip peerneqarnissaanut Atassutip siunnersuutaa Aningaasaqarnermut Akileraartarnermullu Ataatsimiititaliami amerlanerussuteqartut itigartippaat.

Atassutilli inatsisissatut siunnersuutaata siullermeerneqarnerani Inatsisartut ataatsimiittarfianni oqallinnermi innuttaasut peqqissusaannut ajoqutaanngitsumik mamakujuit akikillinissaat qulakkeerniarlugu isumaqatigiittoqarsinnaasutut nipeqaleraluarpoq.

Allannguutissatut siunnersuut

Ataatsimiititaliami amerlanerussuteqartut IA-meersut Siumumeersullu isumaliutissiissummi ersersippaat Naalakkersuisut allannguutissatut siunnersuutaat tapersersorsinnaallugu, imatut oqaasertalerneqarsimasoq:

”Akileraartarnermik akitsuusiisarnermillu aaqqissuusseqqinneq ”Nunarput najoruminarnerulersitsigu” pillugu isumaqatigiissummi aaqqissuusseqqinnerup illernerit sisamaata ilaattut sukkulaatit sukkulaatiniillu nioqqutissiat suulluunniit (kakaoi pinnagu), lakridsit lakridsiniillu nioqqutissiat suulluunniit, marcipanit marcipaniniillu nioqqutissiat suulluunniit, karamilit, bonbonit assigisaallu, aamma sukkunik akullit sukkunillu akoqanngitsut Inatsisartut inatsisaanni nr. 19, 30. oktober 1992-imeersumi, § 1, imm. 1 nr.2-mi taaneqartut nalilersornissaannik Naalakkersuisut peqquneqarnissaat pillugu Inatsisartut aalajangiiffigisassaattut siunnersuut.”

Kaammattuutit

Isumaliutissiissummi Naalakkersuisut ima kajumissaarneqarput:

  • inatsisit aqqutigalugit akitsuutinik allannguinerit aammalu niuertarfiit akinik aalajangersaanerisa sunniutaasa ataqatigiinnerannik takutitsisinnaasut ingerlanneqarnissaannik misissuinerit pisariaqartut
  • misissuinerit pisariaqartut akit ineriartornerisa innuttaasullu peqqissusiata akornanni ataqatigiittoqarsinnaaneranik takutitsisinnaasut.
  • peqqissutsimut kinguneqartarneranik isumaqarneq kisitsisitigut paasissutissaatigineqartukkut qanoq takutinneqarnersoq pillugu nassuiaammik saqqummiusseqqullugit.

Demokraatit Aningaasaqarnermut Akileraartarnermullu Ataatsimiititaliami sinniisaata Atassutip siunnersuutaa, sisamanngornermi maajip 23-ani aappassaaneerneqartussaq, tapersersorpaa.

Powered by Labrador CMS