Suliffeqarfinni pisortat pigisaanni arlalinni pisortat
akissarsiarissaarnerat Mariane Paviasen Jensenip, IA, apeqquserpaa.
Suliffeqarfinni pisortat pigisaanni arlalinni pisortat
akissarsiarissaarnerat Mariane Paviasen Jensenip, IA, apeqquserpaa.
Narsami, nunatsinni illoqarfiit piitsuunerpaat
ilaanni, politikerip pisortat suliffeqarfiutaanni pisortat
akissarsiaqarpallaarnerat assuaraa. Namminersorlutik Oqartussat
suliffeqarfiutaat Royal Greenland siuttoralugu inissiaatileqatigiiffimmut
Iseritsimut, Kommuneqarfik Sermersuumit pigineqartumut.
- Inuiaqatigiit pigisaanni assersuutigalugu Royal
Greenland, INI A/S, Iserit A/S, Royal Arctic Line A/S, il.il
pisortaqartitsinikkut qaffasissorujussuarnik aningaasarsiaqartitsisarneq
akuersaaginnarsinnaanngilarput.
Inatsisartunut ilaasortaq ineqarnermut
naalakkersuisuusimasoq Mariane Paviasen Jensen, paragraf 37 naapertorlugu
Naalakkersuisunut apeqqutiminut arfinilinnut taama tunngavilersuivoq.
- Naalakkersuisut pisortat/inuiaqatigiit pigisaani
piginneqatigiiffinni aktiaatileqatigiiffiit pisortaanut
aningaasarsiaritinneqartartunut qaffasissorujussuannut qanoq isumaqarpat?
- Inuiaqatigiit pigisaanni aktiaatileqatigiiffinni
pisortaatinneqartartut aningaasarsiaat Naalakkersuisunit pissusissamisoortutut
isigineqarpat?
- Naalakkersuisut piginneqatigiilluni suliffeqarfiit
inuiaqatigiinniit pigineqartut pisortaasa aningaasarsiaannut imminut
naleqqunnerusunngorsarniarlugit sulissuteqarnissamut piumassuseqarpat?
Mariane Paviasen Jensenip paragraf 37 naapertorlugu
Naalakkersuisunut ilaatigut taama apeqqutilliivoq.
Akissarsiat qaffasinnerpaaffissalerlik
Naalakkersuisut suliffeqarfiutaanni pisortat
akissarsiaasa ajunngitsorsiaallu qaffasinnerpaaffissaat
aalajangerniarneqarnersut aamma apeqqutigaa.
- Naalakkersuisut pisortat qanoq
akissarsiaqartigisinnaanerat killilissagaat, suliffeqarfiillu siulersuisuisa
akissarsiat appartikkumaaraat neriuutigaara. Royal Greenlandimi pisortap
ukiumut akissarsiai 8 millionit koruunit INI-milu pisortap ukiumut akissarsiai
2 millionit koruunit amerlavallaarput, Mariane Paviasen Jensen Sermitsiamut
oqarpoq.
Tunisinermi akiusut appasippallaartut
Mariane Paviasen Jensen naapertorlugu inuit
amerlanerit, aalisartunit sulisartunut, pisortat ilaat
akissarsiaqarpallaarnerat paasiuminaatsissinnaavaat.
Aasaanerani Sermitsiami allaaserineqartutut Susanne
Arfelt Rajamand nunatsinni suliffeqarfiit annersaanni, Royal Greenlandimi,
pisortaq Namminersorlutik Oqartussat suliffeqarfiutaanni
akissarsiaqarnerpaavoq. Siorna taanna 8,1 millionit koruuninik aningaasarsivoq.
- Royal Greenlandip aalisartut assersuutitut
saarullinnik tunisinermi akikitsuararsuarnik akilertarpai, kiilumut 4 koruunit
missaanniissinnaasartunik. Aalisartut inuussuteqarniarnerannut ajornakusoortoq,
Mariane Paviasen Jensen oqarpoq.
Namminersorlutik Oqartussat suliffeqarfiutaasa
annersaasa maajimi juunimilu Sermitsiap misissuiffigimmagit, pisortaanerit
siorna millionilikkaanik akissarsisinneqarsimasut paasinarsivoq. Kisitsisit
suliffeqarfiit nammineq ukiumut nalunaarutaanniit paasissutissaataanniillu
pissarsiaapput.
Namminersorlutik Oqartussat
suliffeqarfiutaanni annerpaani Royal Greenlandimi, Royal Arctic Linemi, KNI-mi,
Tusassimi aamma Air Greenlandimi pisortat akissarsiaqarnerpaapput.
Royal Arctic Linemi pisortaanerusimasoq Verner
Hammeken 5,7 millionit koruuninik akissarsiaqarpoq. Tusassimi
pisortaanerusimasoq Kristian Reinert Davidsen 4 millionit koruunit sinnerlugit
akissarsiaqarpoq, KNI-milu Jeppe Jensen 4 millionit koruuninik akissarsiaqarpoq.
Air Greenlandimi pisortaaneq Jakob Nitter Sørensen aamma INI-mi pisortaaneq
Henrik Rafn 3,8 aamma 2 millionit koruuninik akissarsiaqarlutik.
Ineqarnermut tunngasuni pisortat, assersuutigalugu
INI-mi pisortat, akissarsiaqarpallaarnerat pillugu IA-meersup Mariane Paviasen
Jensenip aamma Demokraatineersup Jens Frederik-Nielsenip siornatigut aamma
apeqqutigisimavaat.
Aamma immikkut ilisimasalik inissiaatileqatigiiffinni
pisortat akissarsiaannik misissuisartoq Henrik Rafnip akissarsiaanut
tunngatillugu sakkortuumik oqaaseqarpoq.
- Suliffeqarfimmi 9.000-it missaannik ininik
attartortitsisarfiusumi akissarsiai qaffasilluinnarput.
Inissiaatileqatigiiffiup pisortaa 2 million koruuninik akissarsiaqarpat tamanna
qaffasippallaarpoq. Suliffeqarfik namminersortuunngilaq, professori Kurt Klaudi
Klausen INI-mi pisortap aningaasarsiai pillugit Sermitsiamut juuni naanerani
apersorneqarnermini oqarpoq.
