Maskinmesterinngorniarnissamut qinnuteqartut amerliartorput

Kalaallit Nunaanni maskinmesteritut ilinniarfik Københavnimi Maskinmesterskolen suleqatigalugu Tech College Greenland KTI Sisimiuni 2022-mi aggustimi aallartinneqarpoq.

 2022-mi KTI-p sannaviani ilinniartut siulliit qulingiluaapput. Aggustimi ilinniartut nutaat 16-iussapput.

 - Ukiut marluk matuma siorna ilinniarfiup aallartinneraniilli 44 procentimik amerleriarput, Jokum Møller, KTI-mi pisortaasoq, oqarpoq.

Ilinniartut inuusuttut 

Maskinmesteritut ilinniarfik ingammik inuusuttuaqqanit soqutigineqartarpoq, tamannalu iluaqutissartaqarpoq. Inuusuttut pisussaaffeqannginnerummata atuarneq oqinnerusarpoq, taamaalillunilu naammassilluarnissaat ilimanarnerussalluni.

 Ilinniartut tamarmik ilinniarnertuunngorniarfimmi naammassisimapput, ilinniartussanullu nutaanut ilaasut ilarpassui ilinniakkaminnik naammassinneqqammerput. – Taamaalillutik naalagaaffeqatigiinni ilinniaqqiffiit piumasaqaateqarnerpaat ilaannut toqqaannartumik isersinnaapput. Siunissami Kalaallit Nunaanni nunami imaanilu teknikkikkut atortunik atortorissaarunillu ingerlatsinermik aserfallatsaaliuinermillu suliaqarnermik suliaqartussaapput. Ukiut sisamat affarlu ilinniagaqareerunik kusanartumik bacheloritut allagartartaarlutillu maskinmesteritut taaguuteqalissapput, Jokum Møller, Sisimiuni maskinmesterinngorniarluni ilinniakkap tigulluarneqarneranik nuannaarutiginningaartoq, oqarpoq.

– Tamanna Kalaallit Nunaanni inuussutissarsiornermut pingaaruteqarluinnarpoq, tassanimi maskinmesterinik ilinniarsimasunik pisariaqartitsineq annertuvoq. Kalaallit maskinmesteriusut maannakkut nunatsinni maskimesteriusut akornanni ikittuinnaapput.

Savissaliorneq, aatsitassanik pilaaneq svejserinerlu

Kalaallit Nunaanni maskinmesteritut ilinniarfiup atulersinneqarnerata maani najugallit ilinniakkamik sivisuumik piumasaqarfiusumillu naammassinninnissamut aningaasatigut periarfissaqarnerulersippai. Tamanna pingaartumik ilinniartunut ilaqutalinnut pitsaanerpaavoq.

KTI-mi sannavimmi ilinniarneq sannavimmi sulinermik atuagarsornermillu ingerlanneqartarpoq. Ilinniartut amerlasuut ilinniarnertuunngorniarfimmit toqqaannartumik aallartittarput, taamaattumillu suliamut tunngatillugu tunuliaqutaqanngillat. Taamaattumik savissaliorneq, aatsitassanik pilaaneq svejserinerlu ilinniartarpaat. Maskiinat motoorillu katiternissaat aserfallatsaaliornissaallu aamma ilinniarneqartarput. Atuagarsornikkut ilinniartitsissutigineqartartut tassaapput atortussatigut ilinniarneq, sannavimmi teknikki, innaallagisserinermut tunngasut, teknikkimut tunngasunik allattuineq, motoorinut tunngasut aamma silaannarmik naqitsineq kiisalu imerpalasut naqitsinerat atorlugit sulinermik ilinniarneq.

 Snowdog-iliorit

Ilinniartut semesterip aappaata naanerani eqimattanut suliassiissutigineqartunik naammassinnissapput. Snowdog-inik, assaassutinik aputaajaammilluunniit innaallagiatortumik naqqanit pilersitsinissaq 2024-mi suliassiissutigineqarpoq. Snowdog tassaavoq maskiina aputikkoorutaasinnaallunilu sikukkoorutaasinnaasoq, qamuteralaaqqanut assingusoq.

 Semesterip pingajuani qaammatini arfinilinni ilinniarnermut atatillugu suliffimmiittoqassaaq. Nunami immamilu maskinmesteritut ilinniartunut ilinniarnermut atatillugu suliffippassuaqarpoq. Ulluinnarni suleriaaseq aamma maskiinat teknikkikkullu atortut aserfallatsaaliornerat ilinniartut tassani ilinniassavaat. Sanaartornermi maskinmesterinngornianik ilinniarnermut atatillugu suliffimmiisitserusuttut amerliartuinnarput, tamatumalu saniatigut imaani suliffissaqarpoq.

– Ilinniartut nunami maskinmesteritut sulilerusuttut Nukissiorfinni, Pituffimmi Sakkutooqarfimmi, Mittarfeqarfinni aamma Nunatsinni Peqqinnissaqarfimmi suliffimmik misiliisinnaapput. Imaatigut umiarsuaatileqatigiiffinni soorlu Royal Arctic Linemi, aalisarnermik ingerlatsivinni soorlu Royal Greenlandimi, Polar Seafoodimi kilisaatinilu annerusuni suliffimmik misiliisinnaapput, Jokum Møller oqaluttuarpoq.

Ilinniartitaanermut tapiliussaq tamaat uani atuaruk.